ISAIAH 53 - Edisana ñwed Abasi Ibom

Ufen Emi Enyemi Abasi Emekde Ɔbɔde

¹ ANIE onim mbuk nnyin ke akpanikɔ? Ubɔk Jehovah onyuŋ ayarare ɔnɔ anie?

² Ndien enye okotibe nte nsehe ke iso esie, ye nte oruŋ eke otode edisat isɔŋ: enye inyeneke ubɔŋ, inyuŋ inyeneke uyai; ndien nnyin ise enye, edi inyeneke ŋwut-idem eke nnyin ikoyomde enye.

³ Owo ese enye ke ndek, enyuŋ esin enye; enye edi owo ukut, onyuŋ emehe ke mfuhɔ; onyuŋ etie nte owo eke odipde nnyin iso; esin enye ke ndek, nnyin inyuŋ ibatke enye ke owo.

⁴ Ke akpanikɔ edi mfuhɔ nnyin ke enye akada, edi ubiak nnyin ke enye okobiom: ndien nnyin ise ite ke Abasi ɔkɔtɔ enye, oyibi enye, onyuŋ ɔtuhɔ enye.

⁵ Edi enye akada unan abaŋa mme idiɔk ido nnyin, anuaha abaŋa mme ukwaŋ-ŋkpɔ nnyin: ufen odoro enye ke idem man nnyin ikut emem; ndien inia esie ɔkɔk nnyin.

⁶ Kpukpru nnyin idiyo nte erɔŋ: kpukpru nnyin ikabare iduk ke usuŋ nnyin; ndien Jehovah ada idiɔk ido nnyin kpukpru odori enye ke idem.

⁷ Etuk enye, enye onyuŋ ɔsuhɔre idem esie onim, inyuŋ itatke inua esiemɔ; eda enye nte eyen-erɔŋ eka, ete ekewot, ndien kpa nte uman erɔŋ odopde inua ke iso mme andifat enye, kpa ntre enye inyuŋ itatke inua esiemɔ.

⁸ Esio enye ke ukut ye ke ikpe: ndien anie ekeme ndibuk emana esie? Koro esibede enye efep ke isɔŋ mme odu-uwem: ke abaŋa mme idiɔk ido ikɔt mi ke enye ada ufen.

⁹ Mmɔ enim udi esie ye mme idiɔk owo, edi enye odu ye owo inyene ke mkpa esie; koro enye mikanamke baba afai, abiaŋa mikonyuŋ iduhe enye ke inua.

¹⁰ Ndien Jehovah ama enye ndinuak; esin enye ɔdɔŋɔ: ukpɔŋ esie ama osio isop idiɔk-ŋkpɔ, enye eyekut ubɔŋ esiemɔ, mme usen esie eyebigi, ndien se Jehovah amade eyesiaha enye ke ubɔk.

¹¹ Enye eyekut se itode ke ukut ukpɔŋ eise ɔyuhɔ: edinen owo mi eyeda ifiɔk esie anam ikɔ asana ediwak owo; eyenyuŋ obiom mme idiɔk ido mmɔ.

¹² Mmɔdo nyedeme ŋkpɔ ke otu ikpɔ owo nnɔ enye, enye eyenyuŋ edeme mbume ye mkpɔsɔŋ owo; koro enye akaŋwaŋade ukpɔŋ esiemɔ ɔnɔ mkpa: enyuŋ ebatde enye esin ke otu mme anam-idiɔk; enye onyuŋ obiom mme idiɔk ido ediwak owo, eyenyuŋ anam mkpe-ubɔk ɔnɔ mme anam-idiɔk.