ISAIAH 24 - Edisana ñwed Abasi Ibom

Ubiomikpe Abasi ke Ofuri Ererimbot

¹ SESE, Jehovah aŋwaŋa ŋkpɔ ke isɔŋ efep, anam enye edi ukpɔk, onyuŋ okubi iso esie, onyuŋ asuan mme andiduŋ enye.

² Ndien nte etiede ye mbio-obio, kpa ntre ke editie ye oku; nte etiede ye ofin, kpa ntre ye ete esie; nte ye ofin aŋwan, kpa ntre ye eka esie; nte ye andidep, kpa ntre ye andinyam; nte ye owo eke ɔnɔde ŋkpɔ ke ebuɔt, kpa ntre ye owo eke ɔbuɔtde; nte ye owo isɔn, kpa ntre ye owo eke enye akamade enye isɔn.

³ Eyekɔrɔde ofuri isɔŋ, enyuŋ ebume enye kpukpru: koro edi Jehovah ɔdɔhɔ ikɔ emi.

⁴ Ererimbot atua, akpa ekondo eyemere, akpa, ata ikpɔ mbon ererimbot eyemere.

⁵ Isɔŋ onyuŋ edehe ke idak mmɔ emi eduŋde ke esit: koro mmɔ eduede mbet, ebiatde ewuhɔ, enim nsinsi ediomi ke ikpikpu.

⁶ Oro esin isuŋi adiade isɔŋ, enyuŋ enɔ mme andiduŋ ke esit ufen: oro esin mme andiduŋ isɔŋ efɔbɔde, mbio emi esuhɔde enyuŋ edi esisit.

⁷ Obufa wine ke atua, vine ke eyemere, kpukpru mbon idaresit emum.

⁸ Idara ekɔmɔ etre, mkpo mme ebre mbre odop, idara harp etre.

⁹ Mmɔ idiŋwɔŋke wine ke ikwɔ; mmin eyedoro mmɔ eke eŋwɔŋde enye.

¹⁰ Ikpikpu obio amanuaha mbak-mbak: emekɔbi kpukpru ufɔk, owo idukke duk.

¹¹ Eseme wine ke aŋwa; ofuri idaresit omokure, idara ererimbot amatak.

¹² Se isukde ke obio edi ŋwure, itim onyuŋ abiara fap.

¹³ Koro ntem ke editie ke ufɔt ererimbot ke otu mme idut, nte etuakde olive, ye nte mfiɔhɔ grape ke emade utet.

¹⁴ Mmɔ eyemenere uyo mmɔ ke enyɔŋ, ekwɔ, ubom Jehovah eyesin mmɔ eke edude ke inyaŋ efiori.

¹⁵ Mbufo ke edem uŋwana ekpono ndien Jehovah, mbufo ke isuo inyaŋ ekpono enyiŋ Jehovah Abasi Israel.

¹⁶ Nnyin itie ke utit ererimbot ikop ikwɔ, ete “Nɔ eti owo ubɔŋ.” Edi ami ndɔhɔ nte, Ɔdiɔk mi, ɔdiɔk mi, ifɔnke fɔn inɔ mi! mbon ŋwo ke ewoŋwo: mbon ŋwo ke ewo ŋwo.

¹⁷ Ndik, ye ukpe, ye mfine, ke ena enɔ fi, O andiduŋ isɔŋ.

¹⁸ Ndien ama ekem, owo eke efehede abak uyom ndik eyeduɔ ke ukpe; ndien owo eke otode ke ufɔt ukpe ɔdɔk eyemum ke mfine: koro eberede window ke enyɔŋ, idak isɔŋ onyuŋ enyek.

¹⁹ Ererimbot obomo fap, ererimbot asiaha mbai-mbai, ererimbot enyek ɔkpɔsɔŋ.

²⁰ Ererimbot eteteŋ nte owo mmin, onyuŋ ofofum nte hammock; isop esie onyuŋ odobi enye ke edem; ndien enye ɔduɔ, idinyuŋ idahake aba ke enyɔŋ.

²¹ Ndien ama ekem ke usen oro, Jehovah eyeda ufen etiene udim enyɔŋ, etiene ndidem isɔŋ ke isɔŋ.

²² Eyenyuŋ etaŋ mmɔ ebon ɔtɔ kiet, nte mbon ŋkpɔkɔbi ke obube, enyuŋ ekɔbi mmɔ ebaha ke ufɔk ukwak, ndien ke ediwak usen ema ebe, eyenɔ mmɔ ufen.

²³ Ndien but eyenam ɔfiɔŋ, utin eyenyuŋ ofuk but iso, koro Jehovah mme udim adade ubɔŋ ke obot Zion, ye ke Jerusalem, ubɔŋ onyuŋ odu ke iso mbiowo esie.