IKWƆ SOLOMON 8 - Edisana ñwed Abasi Ibom

Ima Ɔsɔŋ Idem Nte Ŋkpa

¹ AFO akpakam edi eyen-eka mi eren, emi awapde eba eka mi! Ŋkpokut fi ke aŋwa, ŋkpotim fi inua: ikponyuŋ isehe mi ke ndek.

² Nyeda fi usuŋ, nda fi nduk ke ufɔk eka mi; afo eyeteme mi: nyeda edifuɔŋ wine ye mmɔŋ pomegranate mi nnɔ fi ɔnwɔŋ.

³ Yak ufien esie adak mi ke ibuot, yak nnasia esie onyuŋ afat mi.

⁴ O nditɔ-iban Jerusalem, mmowuk mbufo, nte mbufo ekudemere, ekudedemere ama mi tutu enye ama!

⁵ Anie owo edi emi otode ke wilderness, eberedem ke ama esie? Ŋkedemere fi ke idak eto apple: do ke uka akaman fi: do ke uman okotuk andiman fi.

⁶ Nim mi nte seal ke esit fo, ye nte seal ke ubɔk fo: koro ima ɔmɔsɔŋ nte mkpa; ufup onyuŋ ɔsɔŋ ubɔk nte udi: edemikaŋ esie esesak nte edemikaŋ Jehovah.

⁷ Ediwak mmɔŋ ikemeke ndinime ima emi, akpa mmɔŋ inyuŋ imenke enye: owo ɔkpɔnɔ ofuri inyene ufɔk esie ke ima emi, ekpesin enye ke ndek.

⁸ Eyen-eka nnyin emekpri, ndien inyeneke eba: nnyin idinam didie ye eyen-eka nnyin ke usen eke edidɔhɔde ebaŋa enye?

⁹ Enye ama edi ibibene, nnyin iyebɔp enye akwa ufɔk silver ke enyɔŋ: edi enye ama edi enyin-usuŋ, nnyin iyekɔŋ enye obukpɔk cedar isiri.

¹⁰ “Ami ndi ibibene, eba mi enyuŋ ebiet tower: ndien enye ese mi ke owo eke okutde emem.”

¹¹ Solomon emenyene iŋwaŋ-vine ke Baal-hamon; enye ada iŋwaŋ-vine oro ɔnɔ owo eke ekpemede: kpukpru mmɔ kiet kiet enɔ tɔsin shekel silver ke mfri esie.

¹² Iŋwaŋ vine okimmɔ odu mi ke iso: O Solomon, da tɔsin oro; mme andikpeme mfri esie enyuŋ eda ikie iba.

¹³ O ŋwan emi oduŋde ndiye iŋwaŋ, mme nsaŋa ke ekpaŋ utɔŋ ke uyo fo: yak ŋkop enye.

¹⁴ O ama mi, sɔp ukot, nyuŋ biet edop, ye eyen ebet ke ikpɔ obot ufuɔŋkpɔ.