HABAKKUK 1 - Edisana ñwed Abasi Ibom

Etop Habakkuk ke Abaŋa Ufik

¹ UYO JEHOVAH EMI KE HABAKKUK PROPHET OKOKUT.

² O Jehovah, adaŋa didie ke ndiseme, ndien afo ukopke! nditua afai nnɔ fi, ndien unyaŋake!

³ Nsinam afo owutde mi idiɔk ido, onyuŋ esede ukut? Nsobo ye afai enyuŋ edu mi ke iso; utɔk onyuŋ odu, eŋwan onyuŋ emen idem.

⁴ Oro esin ibet okpu, ikpe inyuŋ iwɔrɔke nte asaŋade ye akpanikɔ: koro mme idiɔk owo ekande nti owo ekuk; mmɔdo edikwaŋa ikpe ɔwɔrɔde.

⁵ Mbufo ese ke otu mme idut, enyuŋ etiŋ enyin, enyuŋ eyik, enyuŋ enyene ndyɔ: koro mmɔŋ nnam erinam ke eyo mbufo, eke mbufo midinimke ke akpanikɔ ke owo editiŋde.

⁶ Koro, sese, ami mmɔŋ ndemere mme Chaldean, ndot-ndot ye owowo idut oro asaŋade ke ntaŋwaŋ ebiet ererimbot, ndida ebiet iduŋ emi minyeneke enye.

⁷ Idut oro edi mkpa-idem ye eka-ndik: ikpe mmɔ ye ubɔŋ mmɔ eto ke idem mmɔ.

⁸ Mme horse mmɔ esɔp ekan nawuri-ekpe: esɔp ekan wolf mbubreyo: mbon-horse mmɔ enyuŋ eyɔrɔ kpukpru ebiet, mbon-horse mmɔ enyuŋ eto ke anyan ebiet: mmɔ efeŋe nte ntrukpom ɔsɔpde aka ndita.

⁹ Kpukpru mmɔ edi ndinam afai: akwa otu iso mmɔ eneŋere ese; ndien mmɔ eyetaŋ mbuot-ekɔŋ nte ntan.

¹⁰ Ndien mmɔ eyese ndidem ke mbio, mbɔŋ enyuŋ edi ŋkpɔ nsahi ye mmɔ; mmɔ eyenyuŋ esak kpukpru mkpɔsɔŋ ebiet: ndien mmɔ eyekubi ntan enyuŋ eda mmɔ.

¹¹ Ndien spirit edemere, mmɔ enyuŋ eka iso, enyuŋ edue isop: odudu mmɔ emi edi abasi mmɔ.

¹² Nte afo udige Jehovah edisana Abasi mi toto ko? Nnyin idikpaha. O Jehovah, afo onim mmɔ ɔnɔ ikpe; O akwa itiat, afo owuk mmɔ onim ɔnɔ nduari.

¹³ Afo amasana enyin akan nte okutde idiɔk, unyuŋ ukemeke ndise utuk: nsinam afo esede mbon abiaŋa, onyuŋ odopde uyo ke ini idiɔk owo osobode owo eke enende akan enye;

¹⁴ onyuŋ anamde owo ebiet iyak akwa mmɔŋ, ebiet mme andinyɔni emi minyeneke etubom?

¹⁵ Enye okot mmɔ kpukpru ke uwam esie; ada iyire esie oduri mmɔ osio, onyuŋ ada mukanda esie omum mmɔ obon. Mmɔdo enye adatde esit onyuŋ ebrede mbre.

¹⁶ Mmɔdo mmɔ ewade idiɔŋ enɔ iyire mmɔ, enyuŋ efɔpde incense enɔ mukanda mmɔ; koro oto mmɔ udeme mmɔ enyene isek, udia mmɔ onyuŋ enyene ikpɔŋ.

¹⁷ Nte mmɔ ke edisioŋo owo ke iyire mmɔ ndien, inyuŋ idopke ndiwot mme idut?