GENESIS 43 - Edisana ñwed Abasi Ibom

Nditɔ Eka Joseph Emen Benjamin Eyen-eka Mmɔ Eka ke Egypt

¹ EKEM, akaŋ ɔsɔŋ ubɔk ke isɔŋ oro.

² Edikem ke adaŋoro ema ekedia ibokpot oro ekedade ke Egypt edi, ete mmɔ ɔdɔhɔ mmɔ ete, Mbufo efiak eka, ekedep ekpri udia enɔ nnyin.

³ Ndien Judah ete enye, Owo oro ɔkɔŋwɔŋwɔŋɔ ɔnɔ nnyin, ete Mbufo idikwe iso mi, ke eyen-ete mbufo midige ye mbufo.

⁴ Afo amayak eyen-ete nnyin aka ye nnyin, iyesuhɔre idep udia inɔ fi:

⁵ edi afo muyakke, nnyin idisuhɔkede, koro owo oro ɔkɔdɔhɔde nnyin ete, Mbufo idikwe iso mi, ke eyen-ete mbufo midige ye mbufo.

⁶ Ndien Israel ɔdɔhɔ mmɔ ete, Nsinam mbufo ekediɔkde ye ami, eke mbufo esiande enɔ owo oro ete, Ke mbufo emenyene eyen-ete eŋwen?

⁷ Ndien mmɔ ete, Owo oro ototim obup abaŋa idem nnyin, ye oruk nnyin, ete, Nte ete mbufo mmɔŋ ododu uwem kaŋa? nte mbufo emenyene eyen-eka? ndien nnyin ibɔrɔ enye ke inua ikɔ oro: ikpanam didie ifiɔk ite ke enye eyedɔhɔ ete, Mbufo eda eyen-ete mbufo esuhɔre edi?

⁸ Ndien Judah ɔdɔhɔ Israel, ete esie, ete, Yak eyen oro aka ye ami, ndien nnyin iyedaha ika; man idu uwem, ikukpaŋa, ye nnyin, ye afo, ye nditɔwɔŋ nnyiŋ.

⁹ Ami nyetie ubiɔŋ esie; afo ediyom enye ke ubɔk mi: mendidaha enye nsɔk fi, nnyuŋ ntem enye ke iso fo, nyetie nte edue-isop ye afo ke nsinsi:

¹⁰ koro nnyin mikpebigike, ke emi ke ikpetreke ndifiak mi utim ikaba.

¹¹ Ndien Israel ete mmɔ ɔdɔhɔ ye mmɔ, ete, Ama edi ntre, ndien, enam ntem; eda akakan mfri edem emi esin ke ŋkpɔ mbufo, esuhɔre enɔ owo oro ke enɔ, ekpri balm, ye ekpri aran ɔkwɔk, ye edifuɔŋ-ŋkpɔ, ye myrrh, ye mbansaŋ, ye almond:

¹² enyuŋ ekɔt silver iba ke ubɔk mbufo; enyuŋ eda silver oro ekesinde ke inua ekpat mbufo, ekama ke ubɔk edaha eka; mme mmɔ ekededue:

¹³ Enyuŋ eda eyen-ete mbufo edaha, efiak etiene owo oro:

¹⁴ Abasi Andikeme kpukpru akam onyuŋ esin owo oro atua mbufo mbɔm, onyuŋ ayak eyen-ete mbufo eken ɔnɔ mbufo, ye Benjamin. Ndien ami, edieke ebɔde mi nditɔ, yak ebɔ mi.

¹⁵ Ndien mmɔ oro eda enɔ emi, enyuŋ ekɔt silver iba ke ubɔk mmɔ ye Benjamin; ndien edaha esuhɔre ke Egypt, ekeda ke iso Joseph.

¹⁶ Ndien ke adaŋemi Joseph okutde Benjamin ye mmɔ, enye ɔdɔhɔ akama ŋkpɔ ufɔk esie ete, Da mme mmɔ emi ka ke ufɔk, ndien wot unam nyuŋ tem udia; koro mmɔ emi eyedia ŋkpɔ ye ami ke uwemeyo emi.

¹⁷ Ndien owo oro anam nte emi Joseph ɔdɔhɔde; enye onyuŋ ada mmɔ aka ke ufɔk Joseph.

¹⁸ Ndien ndik anam mmɔ, ke edade mmɔ edi ke ufɔk Joseph; mmɔ enyuŋ edɔhɔ ete, Ke eda nnyin edi ke ikɔ silver oro ekesinde ke ekpat nnyin akpa; man enye oyom nnyin ikɔ, onyuŋ akan nnyin ubɔk, onyuŋ ada nnyin onim ke ifin, ye mme ass nnyin.

¹⁹ Ndien mmɔ etiene akama-ŋkpɔ ufɔk Joseph, enyuŋ edɔhɔ ye enye ke enyin-usuŋ ufɔk,

²⁰ ndien mmɔ ete, Mbɔk, ɔbɔŋ, nnyin ikesuhɔre akpa ini idi ndidep udia:

²¹ edikem ke ini nnyin isimde ke ebiet eke nnyin idaŋde, nnyin itat ekpat nnyin, ndien sese silver owo kpukpru ke inua ekpat mmɔ, silver nnyin nte edomode enye: ndien nnyin imada enye ke ubɔk nnyin ifiak idi.

²² Imonyuŋ ida silver eŋwen ke ubɔk nnyin isuhɔre idi udia ndidep; nnyin ifiɔkke owo eke akadade silver nnyin esin ke ekpat nnyin.

²³ Ndien enye ete, Osuk ɔfɔn ye mbufo, ekufehe ndik; Abasi mbufo, ye Abasi ete mbufo, ɔkɔnɔ mbufo inyene ke ekpat mbufo: silver mbufo okoduk mi ke ubɔk.

²⁴ Ndien enye osio Simeon ɔnɔ mmɔ. Ndien enye ada mmɔ oto oduk ke ufɔk Joseph, onyuŋ ɔnɔ mmɔŋ, ndien mmɔ eyet ukot mmɔ; onyuŋ ɔnɔ ass mmɔ se etade.

²⁵ Mmɔ enyuŋ etim enɔ oro enim tutu Joseph edi ke ufɔt uwemeyo, koro ekopde ete ke mmimɔ iyedia ŋkpɔ do.

²⁶ Ekem, Joseph edi ke ufɔk, ndien mmɔ emen enɔ oro odude mmɔ ke ubɔk esɔk enye ke ufɔk, enyuŋ enuhɔ ke isɔŋ enɔ enye.

²⁷ Enye onyuŋ obup mmɔ ete mme idem ɔsɔŋ mmɔ, onyuŋ ɔdɔhɔ ete, Nte idem ɔsɔŋ ete mbufo, akani owo oro mbufo ekedɔhɔde? nte enye osuk odu uwem kaŋa?

²⁸ Ndien mmɔ ete, Ke idem ɔsɔŋ owo fo ete nnyin, enye ke odu uwem kaŋa.

²⁹ Ndien mmɔ enuhɔ enyuŋ etuak ibuot enɔ enye. Ndien enye emenere enyin esie, okut Benjamin eyen-eka esiemɔ, onyuŋ ɔdɔhɔ ete, Nte emi edi ekpri eyen-ete mbufo oro mbufo ekedɔhɔde mi? Ndien enye ete, Abasi osuk ɔfɔn ido ye afo eyen mi. Ndien Joseph awara;

³⁰ koro itɔŋ eyen-eka esie ɔdɔŋde enye; ndien enye oyom ɔtɔ eke atuade; ndien enye oduk ubet, atua do.

³¹ Ekem, enye eyet iso esie, ɔwɔrɔ, onyuŋ omum idem esie akama, ndien ɔdɔhɔ ete, Mbufo ebon udia.

³² Ndien mmɔ ebon udia enɔ enye ke idem esie, ebon enɔ mmɔ oro ke idem mmɔ, ebon enɔ nditɔ Egypt emi ediade ŋkpɔ ye enye, ke idem mɔ: koro nditɔ Egypt mikemeke ndidia ŋkpɔ ye nditɔ Hebrew: koro nditɔ Egypt ebetde ntem.

³³ Ndien mmɔ etie enye ke iso, akpan ke itie akpan, ye udɔ ke itie udɔ: ndien mbon oro kiet ese kiet eyik.

³⁴ Ndien eda udeme udia emi odude enye ke iso esɔk mmɔ: edi udeme Benjamin okpon akan udeme kpukpru mmɔ oro utim ikotion. Mmɔ enyuŋ eŋwɔŋ ŋkpɔ, enyuŋ ebre ye enye.