EZEKIEL 9 - Edisana ñwed Abasi Ibom

Abasi Ɔnɔ Mme Anam Idiɔk Ufen

¹ NDIEN enye ofiori mi akwa uyo ke utɔŋ, ete, Yak mmɔ eke ekpemede obio esaŋa ekpere, kpukpru owo ye ŋkpɔ afai mmɔ ke ubɔk.

² Ndien sese, owo itiokiet eto ke enyɔŋ-enyɔŋ usuŋ inua-otop emi esede edem edere, kpukpru owo ye ŋkpɔ ekɔŋ mmɔ ke ubɔk; owo kiet emi esinede ɔfɔŋ-idem linen onyuŋ odu ke otu mmɔ, ndien enye ɔkɔŋɔ ekpeme ewet-ŋwed ke isin esie: ndien mmɔ eduk edida ke ŋkaŋ itie-uwa okpoho.

³ Ndien ubɔŋ Abasi Israel ɔkɔdɔk ɔkpɔŋ cherub emi enye odorode ke esit, aka ke asaŋudɔk ufɔk. Ndien enye ofiori okot owo oro esinede linen emi ɔkɔŋɔde ekpeme ewet-ŋwed ke ŋkaŋ esie.

⁴ Ndien Jehovah ɔdɔhɔ enye, ete, Saŋa ke ufɔt obio, ke ufɔt Jerusalem be; nyuŋ nim idiɔŋɔ ke ɔkpɔ-iso mmɔ eke esemede enyuŋ etuade ebaŋa kpukpru mbubiam ido emi mmɔ enamde ke ufɔt esie.

⁵ Ndien enye ɔdɔhɔ mmɔ eken ke utɔŋ mi, ete, Mbufo etiene enye, esaŋa ke ufɔt obio ebe, enyuŋ ewot: enyin mbufo okunyene mbɔm, mbufo ekunyuŋ eyak.

⁶ Mbufo ewot ebiowo ye akparawa ye eyen-aŋwan ye iban, esobo; edi ekusaŋa ekpere baba owo kiet eke idiɔŋɔ oro odude enye ke idem; mbufo enyuŋ etɔŋɔ ke edisana ebiet mi.

⁷ Ndien mmɔ etɔŋɔ ye mbiowo oro edude ke iso ufɔk. Ndien enye ɔdɔhɔ mmɔ, ete, Mbufo esabare ufɔk emi, enyuŋ ewot owo eyɔhɔ ke okure: mbufo ewɔŋɔ. Ndien mmɔ ewɔŋɔ eka ekewot owo ke obio.

⁸ Edikem adaŋemi mmɔ esuk ewowot ami nsuk, ndien nduɔ ke isɔŋ ŋkubi iso mi, nnyuŋ nseme, nnyuŋ ndɔhɔ, nte, Ah, Ɔbɔŋ Jehovah, nte afo ɔmɔŋ osobo ofuri ubak Israel emi esuhɔde, ke eriŋwaŋa ifuresit fo ke Jerusalem?

⁹ Ndien enye ɔdɔhɔ mi, ete, Idiɔk ido ufɔk Israel ye Judah omokpon eti-eti; iyip onyuŋ ɔyɔhɔ ke isɔŋ emi; ndek onyuŋ ɔyɔhɔ ke obio: koro mmɔ edɔhɔde ete, Jehovah ɔmɔkpɔŋ isɔŋ emi, Jehovah inyuŋ ikwe.

¹⁰ Ndien ama edi ami ŋkɔ, enyin mi idinyeneke mbɔm; ndinyuŋ nyakke; mmada usuŋ mmɔ ndori mmɔ ke ibuot.

¹¹ Ndien, sese, owo oro esinede linen, emi ekpeme ɔkɔŋɔde enye ke isin ada ikɔ afiak edi, ete, Mmanam kpa nte afo eketemede mi.