EZEKIEL 5 - Edisana ñwed Abasi Ibom

Ubiomikpe ye Nsobo Emi Esimde Jerusalem

¹ AFO eyen owo nyuŋ da edisɔp ikwa, da akaraŋ ukporo-idet ke idem fo, kporo ibuot fo, ye ntaŋebek fo; ndien da ŋkpɔ-udomo ke idem fo bahare enye.

² Da ɔyɔhɔ ubak ita fɔp ke ikaŋ ke ufɔt obio, ke adaŋemi ini ukuk obio okurede; nyuŋ da ɔyɔhɔ ubak ita kpi enye ke ofut kan kuk, nyuŋ suan ɔyɔhɔ ubak ita nɔ ofum; ndien ami nyesio ofut mbine mmɔ.

³ Nyuŋ sio esisit ke esit ŋko bɔp ke ɔfɔŋidem fo.

⁴ Ndien tɔŋɔ ntak da usuk mmɔ duɔk ke ufɔt ikaŋ, nyuŋ fɔp mmɔ ke ikaŋ; ikaŋ eyeto ke esit osim ofuri ufɔk Israel.

⁵ Ntem ke Jehovah ɔdɔhɔ, ete, Emi edi Jerusalem: mma ndiɔk enye ke ufɔt mme idut, ndien mme obio ekan enye ekuk.

⁶ Edi enye eneni mme item mi, onyuŋ anam idiɔk akan mme idut, eneni mme ewuhɔ mi akan mme obio emi ekande enye ekuk: koro mmɔ esinde mme item mi, minyuŋ isaŋake ke mme ewuhɔ mi.

⁷ Mmɔdo ntem ke Ɔbɔŋ Jehovah ɔdɔhɔ, ete, Koro mbufo edamade ekan mme idut emi ekande mbufo ekuk; minyuŋ isaŋake ke mme ewuhɔ mi, minyuŋ inamke mme item mi, mbufo inyuŋ inamke nte asaŋade ke mme item mme idut emi ekande mbufo ekuk:

⁸ mmɔdo ntem ke Ɔbɔŋ Jehovah ɔdɔhɔ, ete, Sese, ami, kpa ami, nnam ikɔ ye afo: nyenyuŋ ŋkpe ikpe ye mbufo ke iso mme idut.

⁹ Ndien nyenam ke otu mbufo se mme-ŋkanam nnamke, ye se mmendi-namke aba ntre, mbaŋa kpukpru mbubiam mbufo.

¹⁰ Mmɔdo mme ete eyeta nditɔ ke ufɔt fo, nditɔ eyenyuŋ eta mme ete mmɔ; nyenyuŋ ŋkpe ikpe ke otu mbufo, nnyuŋ ŋkpɔri ofuri nsuhɔ fo mfep nsin ke kpukpru mme ofum.

¹¹ Mmɔdo Ɔbɔŋ Jehovah ɔdɔhɔde, ete, Ma uwem mi; koro kpukpru ndek fo ye kpukpru mbubiam fo esabarede edisana ebiet mi, ami ŋko nditreke ndisibe fi mfep; enyin mi idinyuŋ iyakke, ami ŋko ndinyuŋ nnyeneke mbɔm.

¹² Ɔyɔhɔ ubak mbufo ita eyekpaŋa ke udɔŋɔ, eyenyuŋ ekpa idem ke akaŋ ke otu mbufo; ɔyɔhɔ ubak ita eyenyuŋ ekpaŋa ke ofut ekan mbufo ekuk; nyenyuŋ nsuan ɔyɔhɔ ubak ita nsin ke kpukpru mme ofum, nnyuŋ nsio ofut mbine mmɔ.

¹³ Ndien iyaresit mi eyekure, nyenyuŋ nda ifuresit mi ndori mmɔ ke idem, ndien ŋkop ndɔŋ-esit: ndien mmɔ eyefiɔk, ete, ke ami Jehovah ndɔhɔ ke ufup mi, ke ini mmade ifuresit mi ye mmɔ.

¹⁴ Nyenyuŋ nda fi nnim ke ŋkpɔ nsobo ye ŋkpɔ esuene ke otu mme idut emi ekande fi ekuk, ke enyin kpukpru owo eke esaŋade ebe.

¹⁵ Ndien enye eyekabare edi ŋkpɔ but ye esuene, ŋkpɔ item ye ŋkpɔ ndyɔ ɔnɔ mme idut emi ekande fi ekuk, ke ini ŋkpede ikpe ye afo ke iyaresit, ye ke ifuresit, ye ke ikaŋ nduari; edi ami Jehovah ndɔhɔ;

¹⁶ ke ini mmende mme idiɔk idaŋ akaŋ ntop ke otu mmɔ, eke edikabarede edi se edisobode mmɔ, eke ndidɔŋde utom man esobo mbufo; nyenyuŋ ŋkɔrɔ mbufo akaŋ ke idem, nnyuŋ mbuŋ esaŋ uyo mbufo mfep.

¹⁷ Ndien nyedɔŋ biɔŋ ye mme idiɔk unam utom, nte enam mbufo, ndien mmɔ eyebɔ fi nditɔ; idiɔk udɔŋɔ ye iyip eyenyuŋ esaŋa fi ke ufɔt ebe; nyenyuŋ nda ofut ntiene fi. Edi ami Jehovah ndɔhɔ.