EZEKIEL 44 - Edisana ñwed Abasi Ibom

Inua Otop Emi Esirede

¹ NDIEN enye ada mi afiak ke inua-otop edisana ebiet, emi odude ke esien, emi esede edem usiaha-utin, ndien enye esire.

² Ndien Jehovah ɔdɔhɔ mi, ete, Usuŋ emi eyesire, idiberekede enye, owo idinyuŋ ibehe iduk ke esit; koro Jehovah Abasi Israel emebe oduk ke esit: yak enye esire.

³ Ɔbɔŋ, kpa ɔbɔŋ ke idem-esie eyetie ke esit, ata uyo ke iso Jehovah: enye eyeto ke usuŋ etehe inua-otop oduk, onyuŋ ɔwɔrɔ ke kpasuk usuŋ oro.

⁴ Ekem enye ada mi oduk ke usuŋ edem edere edi ke iso ufɔk, ndien ŋkut, ndien, sese, ubɔŋ Jehovah ɔyɔhɔ ke ufɔk Jehovah: ndien nduɔ ke isɔŋ ŋkubi iso mi.

⁵ Ndien Jehovah ɔdɔhɔ mi, ete, Eyen owo, nim esit fo, nyuŋ se ke enyin fo, nyuŋ da utɔŋ fo kop kpukpru se ami ndɔhɔde fi, mbaŋa kpukpru mme ewuhɔ ufɔk Jehovah, nnyuŋ mbaŋa ofuri mbet esie; nyuŋ nim esit fo ke mme ebiet emi edukde ke ufɔk, ye kpukpru mme ebiet emi ewɔrɔde ke edisana ebiet.

⁶ Nyuŋ dɔhɔ mbon nsɔŋ-ibuot, kpa ufɔk Israel, ete, Ntem ke Ɔbɔŋ Jehovah ɔdɔhɔ, ete, Ofuri mbubiam mbufo, O ufɔk Israel, ekem ye mbufo:

⁷ koro mbufo emade mbon idut emi minaŋa mbobi ke esit, minyuŋ inaŋa mbobi ke obukidem, eduk, man mmɔ edu ke edisana ebiet mi, enyuŋ esabare ufɔk mi, ke adaŋemi mbufo edade uyo mi, ye ikpɔŋ, ye iyip edisɔk; ndien mmɔ ebiat ediomi mi, oto ke kpukpru mbubiam mbufo.

⁸ Mbufo inyuŋ isaŋake utom ndisana ŋkpɔ mi: edi emeda owo efen enim ke idem mbufo, ete esaŋa utom mi ke edisana ebiet mi.

⁹ Ntem ke Ɔbɔŋ Jehovah ɔdɔhɔ, ete, Kuyak baba eyen esen owo kiet eke minaŋa mbobi esit, minyuŋ inaŋa mbobi obukidem, oduk ke edisana ebiet mi; baba eyen esen owo kiet eke odude ke otu nditɔ Israel.

¹⁰ Edi mme Levite emi ekekpɔŋde mi anyan usuŋ, ke adaŋemi nditɔ Israel emi ekpɔŋde mi ediyo, eyode ebine ibɔk mmɔ; ndien mmɔ eyebiom idiɔk ido mmɔ.

¹¹ Ndien mmɔ eyedi mme anam-ŋkpɔ ke edisana ebiet mi, enam utom ukpeme ke inua-otop ufɔk, enyuŋ enam ŋkpɔ ufɔk: mmɔ eyeyɔk edifɔp uwa ye uwa emen enɔ mbio-obio; mmɔ eyenyuŋ eda ke iso mmɔ edinam ŋkpɔ enɔ mmɔ.

¹² Koro mmɔ ekenamde ŋkpɔ enɔ mmɔ ke iso mme ibɔk mmɔ: enyuŋ edide se inamde nditɔ Israel eduɔŋɔ ke idiɔk ŋkpɔ: mmɔdo mmemen ubɔk mi mbaŋa mmɔ, ndien mmɔ eyebiom idiɔk ido mmɔ: Ɔbɔŋ Jehovah ɔdɔhɔ.

¹³ Mmɔ ekunyuŋ esaŋa ekpere mi ndinam utom oku nnɔ mi, ekunyuŋ etuk baba edisana ŋkpɔ mi kiet ke ata edisana ebiet: edi mmɔ eyebiom esuene mmɔ, ye mbubiam mmɔ emi mmɔ ekenamde.

¹⁴ Ndien nyenim mmɔ ke owo eke esaŋade utom ufɔk mi, ke ofuri utom esie, ye ke kpukpru se mmɔ enamde ke esit.

¹⁵ Edi mme oku, mme Levite, nditɔ Zadok, emi esaŋade utom edisana ebiet mi, ke adaŋemi nditɔ Israel ekpɔŋde mi ediyo, mmɔ eyesaŋa ekpere mi, ndinam ŋkpɔ nnɔ mi, enyuŋ eda ke iso mi edida ikpɔŋ ye iyip esɔk mi: Ɔbɔŋ Jehovah ɔdɔhɔ.

¹⁶ Edi mmɔ ediduk ke edisana ebiet mi, onyuŋ edi mmɔ edisaŋa ekpere okpokoro mi, edinam ŋkpɔ enɔ mi, edinyuŋ esaŋa utom mi.

¹⁷ Ndien ama ekem ke ini mmɔ edukde ke inua-otop esa, mmɔ eyesine ɔfɔŋ idem linen, ndien idet erɔŋ okusine mmɔ ke idem, ke ini mmɔ enamde ŋkpɔ ke inua-otop esa, ye ke esit ufɔk.

¹⁸ Yak mmɔ eyara uyaribuot linen ke ibuot, enyuŋ esine ɔfɔŋ-ukot linen ke isin mmɔ; mmɔ ekubɔbɔ ke ŋkpɔ eke esinde ibibiak.

¹⁹ Ndien adaŋaemi mmɔ ewuɔŋɔde eka akwa okure, kpa akwa okure etiene mbio-obio, yak mmɔ esioŋo ɔfɔŋ idem mmɔ emi enamde ŋkpɔ ke esit; eda mmɔ enim ke edisana ubet, enyuŋ esine edisine-ŋkpɔ eŋwen; ekunyuŋ eda edisine-ŋkpɔ mmɔ enim mbio-obio ke ndisana.

²⁰ Ndien mmɔ ekukporo idet, ekunyuŋ eyak idet mmɔ ɔduɔhɔ; edi yak mmɔ efat idet ibuot mmɔ.

²¹ Kuyak baba oku kiet ɔŋwɔŋ wine, ke ini mmɔ edukde ke esa.

²² Mmɔ ekunyuŋ edɔ ebe-akpa, ye ŋwan eke esiode ndɔ: ke mibɔhɔke nditɔ-iban eke etode ke ubon ufɔk Israel: edi mmɔ emekeme ndidɔ ebe-akpa eke ɔkɔdɔde oku.

²³ Yak mmɔ enyuŋ etim esian ikɔt mi ŋkpɔ Abasi ye ŋkpɔ owo, enyuŋ eteme mmɔ ediɔŋɔ se idehede dehe, ye se isanade sana.

²⁴ Ndien ama edi ikpe, yak mmɔ eda ke itie ubiere-ikɔ; enyuŋ eda ikpe mi ekpe enye; enyuŋ enim ibet mi ye mme ewuhɔ mi ke kpukpru mme esop mi; enyuŋ enim mme sabbath mi ke edisana.

²⁵ Enye okunyuŋ aka ɔtɔ okpo owo, okunyuŋ asabare idem esie; edi mmɔ emekeme ndisabare idem mmɔ mbaŋa ete ye eka, ye eyen-eren ye eyen-aŋwan, ye eyen-eka eren ye eyen-eka aŋwan eke owo mika-idɔhɔ kaŋa.

²⁶ Ndien ke ini enye ama anam idem esie asana, yak mmɔ ebat usen itiaba enɔ enye.

²⁷ Ndien ke usen eke enye odukde ke edisana ebiet, ke esa, ndinam ŋkpɔ ke edisana ebiet, yak enye awa uwa idiɔk ido esie. Uyo Ɔbɔŋ Jehovah edi emi.

²⁸ Oro eyenyuŋ edi udeme mmɔ: ami ndi udeme mmɔ: ndien mbufo ekunɔ mmɔ se ekpedade enyene ke Israel: ami ndi se mmɔ edidade enyene.

²⁹ Mmɔ eyedia inuak-udia, ye uwa idiɔk ido, ye uwa ndudue: kpukpru se enimde enɔ Abasi ke Israel eyenyuŋ enyene mmɔ.

³⁰ Mme akpa-ubak kpukpru oruk ŋkpɔ eke edide mbemiso, ye kpukpru edimenere uwa kpukpru oruk ŋkpɔ eke otode ke mme edimenere uwa mbufo, eyenyene mme oku: mbufo enyuŋ eda akpa-ubak ndom ibokpot mbufo enɔ mme oku, man ufɔn osuk ana ke ufɔk mbufo.

³¹ Mme oku ekuta baba ŋkpɔ kiet eke akpade ikpɔŋ, ye se ewaide, edide inuen, onyuŋ edide ufene.