EZEKIEL 43 - Edisana ñwed Abasi Ibom

Ubɔŋ Abasi Ofuk ke Temple

¹ EKEM enye ada mi aka ke inua-otop, inua-otop emi esede usuŋ usiaha-utin.

² Ndien, sese, ubɔŋ Abasi Israel oto ke edem usiaha-utin edi: uyo esie onyuŋ ebiet uyo ediwak mmɔŋ: ubɔŋ esie onyuŋ ayama ke isɔŋ.

³ Ndien ndise esie ebiet ndise oro ŋkokutde, ebiet ndise emi ŋkokutde adaŋemi ndide ndisobo obio: ndise esie onyuŋ ebiet ndise emi ŋkokutde ke mben akpa Chebar, ndien nduɔ ke isɔŋ ŋkubi iso mi.

⁴ Ndien ubɔŋ Jehovah oto ke usuŋ inua-otop emi esede edem usiaha-utin, edi ediduk ke ufɔk.

⁵ Ndien spirit emen mi ada mi oduk ke esa; ndien, sese, ubɔŋ Jehovah ɔyɔhɔ ke ufɔk.

⁶ Ndien ŋkop owo etiede ke ufɔk eneme nneme ye ami: owo kiet onyuŋ ada mi ke ŋkaŋ.

⁷ Ndien enye ɔdɔhɔ mi, ete, Eyen owo, emi edi ebiet ebekpo mi, ye ebiet ikpat-ukot mi, emi ndiduŋde ke esit ke otu nditɔ Israel ke nsinsi. Ndien ufɔk Israel ye ndidem mmɔ idisabakede aba edisana enyiŋ mi, ke use mmɔ, ye ke mme okpo ndidem mmɔ ke ŋkokoŋo ebiet mmɔ.

⁸ Koro mmɔ enimde asaŋduɔk mmɔ ke ɔtɔ asaŋudɔk mi, ye obubɔk enyin-usuŋ mmɔ ke ŋkaŋ obubɔk enyin-usuŋ mi, enyuŋ esinde ibibene ke ufɔt mi ye mmɔ, mmɔ esabare edisana enyiŋ mi ke mbubiam mmɔ emi mmɔ ekenamde: ndien ami nta mmɔ ke iyaresit mi.

⁹ Yak mmɔ emen ndien mme use mmɔ, ye mme okpo ndidem mmɔ, ekpɔŋ mi anyan ebiet, ndien ami nyeduŋ ke otu mmɔ ke nsinsi.

¹⁰ Afo eyen owo, wut ufɔk kpa ufɔk Israel, nyuŋ yak but anam mmɔ abaŋa ido mmɔ; yak mmɔ enyuŋ edomo nte etiede.

¹¹ Ndien edieke but anamde mmɔ ebaŋa kpukpru se mmɔ ekenamde, wut mmɔ oruk ufɔk emi ye mbiet esie, ye mme ebiet emi ewɔrɔde, ye mme ebiet emi edukde, ye ofuri oruk esie, ye kpukpru mme ewuhɔ esie, kpa ofuri oruk esie, ye kpukpru ido esie: nyuŋ wet ke iso mmɔ, man mmɔ ekpeme ofuri oruk esie ye kpukpru mme ewuhɔ esie, enyuŋ enam mmɔ.

¹² Emi edi ewuhɔ ufɔk emi; ke enyɔŋ akwa obot ofuri adaŋa esie emi akande okuk edi ata edisana, sese, emi edi ewuhɔ ufɔk emi.

¹³ Ndien mme mmɔ emi edi idomo itie-uwa nte mme ibio-idomo-okuk esaŋade: ibio-idomo-okuk (emi) ekem ye ibio-idomo-okuk kiet ye ubom ubɔk kiet; ndien aba edi ibio-idomo-okuk; ubom onyuŋ edi ibio-idomo-okuk; mben esie tutu osim inua esie edi uniɔŋ ubɔk kiet: edem itie-uwa edi emi.

¹⁴ Ndien ufaŋ ke ufɔt aba oro ke isɔŋ ye ledge ke idak edi ibio-idomo-okuk iba; ubom onyuŋ edi ibio-idomo-okuk kiet; ufaŋ ke ufɔt ekpri ledge ye akamba ledge edi ibio-idomo-okuk inaŋ, ubom esie onyuŋ edi ibio-idomo-okuk kiet.

¹⁵ Itie-uwa onyuŋ edi ibio-idomo-okuk inaŋ; nduk inaŋ eyenyuŋ eto ke itie-uwa edɔk.

¹⁶ Uniɔŋ itie-uwa eyenyuŋ edi ibio-idomo-okuk duopeba; ubom eyenyuŋ edi ibio-idomo-okuk duopeba, ukem-ukem ke edem mbinaŋ.

¹⁷ Settle esie onyuŋ edi ibio-idomo-okuk duopenaŋ ke uniɔŋ, ye ibio-idomo okuk duopenaŋ ke ubom ke edem esie mbinaŋ; mben emi akande enye okuk onyuŋ edi ubak ibio-idomo-okuk: aba esie oro onyuŋ edi ibio idomo-okuk kiet akan okuk; udigukot esie enyuŋ ese edem usiaha-utin.

¹⁸ Ndien enye ɔdɔhɔ mi, ete, Eyen owo, ntem ke Ɔbɔŋ Jehovah ɔdɔhɔ ete, Mme mmɔ emi edi mme ewuhɔ itie-uwa ke usen eke edinamde enye, man efɔp edifɔp uwa ke esit, enyuŋ esime iyip ke esit.

¹⁹ Ndien da enye nɔ mme oku mme Levite emi edide ubon Zador, emi esaŋade ekpere mi ndinam ŋkpɔ mi, abak-enaŋ eyen ufene ke uwa idiɔk ido: uyo Ɔbɔŋ Jehovah edi emi.

²⁰ Nyuŋ da ubak iyip esie yet ke nduk esie mbinaŋ, ye ke inuk settle oro mbinaŋ, ye ke mben kanade kuk: ntem ke afo edinam enye asana, onyuŋ osio isop esie efep.

²¹ Ndien da abak-enaŋ uwa idiɔk ido, kɔfɔp enye ke ebiet ufɔk emi ekenimde ke esien edisana ebiet.

²² Ndien ke udiana-akpa usen, wa okpo ebot eke ɔfɔnde ama ke uwa idiɔk ido; ntem ke mmɔ edisio isop itie-uwa efep kpa nte ekedade abak enaŋ esio isop.

²³ Ndien adaŋemi afo osiode isop esie ama, da abak enaŋ eyen ufene eke ɔfɔnde ama, ye okukim eke ɔfɔnde ama eke otode ke ufene, saŋa kpere.

²⁴ Ndien da mmɔ saŋa kpere ke iso Jehovah, yak mme oku enyuŋ eduɔk mmɔ inuŋ ke idem, ndien efɔp mmɔ enɔ Jehovah ke edifɔp uwa.

²⁵ Ke ofuri usen itiaba wa okpo ebot kpukpru usen ke uwa idiɔk ido: yak mmɔ enyuŋ etim abak-enaŋ eyen ufene ye okukim eke otode ke ŋkpri ufene eke efɔnde ema.

²⁶ Ke ofuri usen itiaba ke mmɔ edisio isop itie-uwa efep, enyuŋ enam enye asana, enyuŋ eyɔhɔ enye ubɔk.

²⁷ Ndien adaŋemi mme usen emi ekurede, edikem ke ɔyɔhɔ usen itiaita ye eke etienede, mme oku eyewa edifɔp uwa mbufo, ye uwa-emem mbufo ke enyɔŋ itie-uwa; ndien mbufo eyenem mi esit. Ɔbɔŋ Jehovah ɔdɔhɔ.