EZEKIEL 4 - Edisana ñwed Abasi Ibom

Ezekiel Anam owut Nte Edikande Jerusalem Ekuk

¹ NDIEN afo, eyen owo, nyuŋ da brick kiet ke idem fo, nyuŋ nim enye ke iso fo: ndien kap obio kpa Jerusalem ke esit.

² Nyuŋ nim mbon-ukuk nɔ enye, nyuŋ bɔp tower nɔ enye, nyuŋ kubi ibombom baŋa enye, nyuŋ nam nna-ekɔŋ baŋa enye, nyuŋ diɔk ŋkpɔ uwuri-ibibene kan enye kuk.

³ Afo nyuŋ da akpaŋ-kpaŋ ukwak ke idem fo, nyuŋ nim enye ke ibibene ukwak ke ufɔt fo ye obio; nyuŋ wuk iso se enye, ntem ke edikan enye ekuk, afo eyenyuŋ akan enye okuk. Emi edidi idiɔŋɔ ɔnɔ ufɔk Israel.

⁴ Afo nyuŋ na ke ŋkaŋ fo ufien, nyuŋ dori enye idiɔk ido ufɔk Israel: afo eyebiom idiɔk ido mmɔ ekem ke ibat usen eke afo edinade ke esit.

⁵ Mmonyuŋ ndori fi isua idiɔk ido mmɔ, nte ekemde ke ibat usen, ikie ita ye anaŋ ye duop: ntem ke afo edibiom idiɔk ido ufɔk Israel.

⁶ Ndien ke afo ama ama mme mmɔ emi, tɔŋɔ ntak na ke ŋkaŋ nnasia fo, nyuŋ biom idiɔk ido ufɔk Judah ke usen aba: mmonim usen ke ibuot isua nnɔ fi.

⁷ Ndien wuk iso se ukuk Jerusalem, nyuŋ fuhɔre ubɔk fo, tiŋ prophecy baŋa enye.

⁸ Ndien, sese, nyeda uruk ndori fi, ndien afo kukabare ukpɔŋ edem fo kiet, una ke edem fo eken, tutu afo ama usen ukuk fo.

⁹ Afo nyuŋ da wheat, ye barley, ye ɔkɔti, ye lentil, ye millet, ye spelt, nyuŋ sin mmɔ ke ŋkpɔ kiet, nyuŋ da mmɔ nam uyo fo, ekem ke ibat usen eke afo edinade ke ŋkaŋ fo, ke usen ikie ita ye anaŋ ye duop, ke afo edita enye.

¹⁰ Ndien udia fo eke afo edidiade eyesaŋa ke idomo, shekel edip ke usen, dia enye ke ini ke ini.

¹¹ Nyuŋ ŋwɔŋ mmɔŋ ke udomo, ɔyɔhɔ ubak hin itiokiet: ŋwɔŋ enye ke ini ke ini.

¹² Ta enye nte uyo barley, nyuŋ da ifuɔ eke otode owo ke idem saŋ enye ke iso mmɔ.

¹³ Ndien Jehovah ɔdɔhɔ ete, Ntem ke nditɔ Israel edita edidehe uyo mmɔ ke otu mme idut, eke ndibinde mmɔ nsin do.

¹⁴ Ndien ndɔhɔ nte, O Ɔbɔŋ Jehovah, sese, ukpɔŋ mi akanam isabakede; ŋkonyuŋ ntaha se ikpade ikpɔŋ, ye se unam awaide, toto ke uyen mi tutu osim emi; ndek-ndek unam akanam inyuŋ idukke mi ke inua.

¹⁵ Ndien enye ɔdɔhɔ mi, ete, Sese, mmɔnɔ fi ifuɔ enaŋ ke ibuot ifuɔ owo; da mmɔ ndien nam uyo fo.

¹⁶ Enye onyuŋ ɔdɔhɔ mi, ete, Eyen owo, sese, ami mmɔŋ mbuŋ esaŋ uyo ke Jerusalem; ndien mmɔ eyeta uyo ke udomo ye ke unyek-idem, eyenyuŋ eŋwɔŋ mmɔŋ ke udomo ye ke nduɔesit:

¹⁷ man mmɔ enana uyo ye mmɔŋ, enyuŋ eduɔ esit kiet ye eken, enyuŋ ekpa idem ke mme idiɔk ido mmɔ.