EZEKIEL 25 - Edisana ñwed Abasi Ibom

Etiŋ Prophecy Ebaŋa Nditɔ Ammon

¹ EDIKEM uyo Jehovah osim mi, ete, Eyen owo, wuk iso fo se nditɔ Ammon,

² nyuŋ tiŋ prophecy baŋa mmɔ;

³ nyuŋ dɔhɔ nditɔ Ammon, ete, Mbufo ekop uyo Ɔbɔŋ Jehovah: ntem ke Ɔbɔŋ Jehovah ɔdɔhɔ ete, Koro afo ɔkɔdɔhɔde Aha, abaŋa edisana ebiet mi, koro esabarede enye; onyuŋ abaŋa isɔŋ Israel, koro amabiara; onyuŋ abaŋa ufɔk Judah, koro eketaŋde mmɔ enyɔŋɔ;

⁴ mmɔdo, sese, ami nyeda fi nnɔ nditɔ edem usiaha-utin, nte eda enyene, ndien mmɔ eyebɔp ebiet ufene mmɔ ke ufɔt fo, enyuŋ enim ebiet iduŋ mmɔ ke ufɔt fo: mmɔ eyedia mfri fo, eyenyuŋ eŋwɔŋ mmɔŋ eba fo.

⁵ Ndien nyeda Rabbah nnim ke iduŋ camel; nnyuŋ nda nditɔ Ammon nnim ke ebiet eke ŋkpri ufene enade. Ndien mbufo eyefiɔk ete ke ami ndi Jehovah.

⁶ Koro ntem ke Ɔbɔŋ Jehovah ɔdɔhɔ, ete, Koro afo akwakde ubɔk fo, onyuŋ amiade ikpat, onyuŋ adatde esit ke ofuri iseri fo abaŋa isɔŋ Israel.

⁷ Mmɔdo, sese, ami mmɔŋ nyanare ubɔk mi ndori fi ke idem, nnyuŋ nda fi nnɔ mme idut ke ŋkpɔ mbume, nnyuŋ nsibe fi ke mme idut mfep, nnyuŋ nsobo fi mfep ke mme obio: nyenyuŋ mbiat fi; ndien afo eyefiɔk ete ke ami ndi Jehovah.

⁸ Ntem ke Ɔbɔŋ Jehovah ɔdɔhɔ, ete, Koro Moab ye Seir edɔhɔde, ete, Sese, ufɔk Judah ebiet kpukpru mme idut;

⁹ mmɔdo, sese, nyetat ŋkaŋ Moab ɔtɔŋɔde ke mme obio, ke mme obio esie ke mme adaŋa esie, ata ediye idut, Beth-jeshi-moth, Baal-meon, ye Kiriathaim,

¹⁰ nnɔ nditɔ edem usiaha-utin emi ekperede nditɔ Ammon, nyenyuŋ nda enye nnɔ nte enyene, man ekuti aba nditɔ Ammon ke otu mme idut.

¹¹ Nyenyuŋ nnam ikpe ye Moab; ndien mmɔ eyefiɔk ete ke ami ndi Jehovah.

¹² Ntem ke Ɔbɔŋ Jehovah ɔdɔhɔ, ete, Koro Edom enamde ufɔk Judah ke erisio usiene, enyuŋ eduede isop eti-eti, enyuŋ esiode usiene ye mmɔ:

¹³ mmɔdo ntem ke Ɔbɔŋ Jehovah ɔdɔhɔ ete, Ami mmɔŋ nnyan ubɔk mi ndori Edom, nyenyuŋ nsibe owo ye ufene ke esit mfep; nnyuŋ nnam enye edi ndon ɔtɔŋɔde ke Teman, ndien mmɔ eyeduɔŋɔ ke ofut tutu osim ke Dedan.

¹⁴ Nyenyuŋ nda usiene mi ndori Dedan ke idem ke ubɔk ikɔt mi Israel; ndien mmɔ eyenam Edom nte ekemde ke iyaresit mi ye ifuresit mi, ndien mmɔ eyefiɔk usiene mi, Uyo Ɔbɔŋ Jehovah edi emi.

¹⁵ Ntem ke Ɔbɔŋ Jehovah ɔdɔhɔ, ete, Koro mme Philistine enamde ntem ke usiene, enyuŋ esiode usiene ke iseri eke odude ke esit, enyuŋ emade ndisobo enye ke nsinsi usua;

¹⁶ mmɔdo ntem ke Ɔbɔŋ Jehovah ɔdɔhɔ ete, Sese, ami mmɔŋ nnyanare ubɔk mi nnam mme Philistine, nnyuŋ nsibe mme Cherethite mfep, nnyuŋ nsobo se isuhɔde ke mben-inyaŋ.

¹⁷ Ndien nyenam ikpɔ usiene ke otu mmɔ ke nduari ifuresit. Ndien mmɔ eyefiɔk ete ke ami ndi Jehovah, ke ini ndidade usiene mi ndori mmɔ ke idem.