EZEKIEL 2 - Edisana ñwed Abasi Ibom

Abasi Okot Ezekiel

¹ NDIEN enye ɔdɔhɔ mi, ete, Eyen owo, daha da ke ukot fo, ndien nyedɔhɔ ye afo.

² Ndien spirit oduk mi ke idem ke ini enye ɔdɔhɔde ye ami, onyuŋ emen mi owuk ke ukot mi, ndien ŋkop uyo enye emi ɔdɔhɔde ye ami.

³ Ndien enye ɔdɔhɔ mi, ete, Eyen owo, ami mmɔŋ ndɔŋ fi utom ke ɔtɔ nditɔ Israel, ke ɔtɔ mbon idut enyene nsɔŋ-ibuot emi esɔŋɔde ibuot ye ami: mmɔ ye mme ete mmɔ emenam idiɔk ye ami, tutu osim idem mfin emi.

⁴ Ndien mmɔ enyuŋ edi nditɔ usɔŋ enyin ye eke itun esit. Mmɔŋ ndɔŋ fi utom ke ebiet mmɔ; dɔhɔ mmɔ ndien, ete, Ntem ke Ɔbɔŋ Jehovah ɔdɔhɔ.

⁵ Ndien ama edi mmɔ, ke mmɔ ekopde, ye ke mikopke (koro mmɔ edide ufɔk nsɔŋ-ibuot) iditreke ndifiɔk ete ke prophet odu ke otu mmɔ.

⁶ Afo, ŋko, eyen owo, kufehe mmɔ, kunyuŋ udikhe ubaŋa ikɔ mmɔ koro akpap ye ŋkukim ŋkpɔ edude ye afo, afo onyuŋ oduŋ ke otu scorpion: kufehe ubaŋa ikɔ mmɔ, kunyuŋ udikhe ubaŋa iso mmɔ, koro mmɔ edide ufɔk nsɔŋ-ibuot.

⁷ Nyuŋ tiŋ ikɔ emi nɔ mmɔ, ke mmɔ ekopde, ye ke etrede ndikop: koro mmɔ edide mbon nsɔŋ-ibuot.

⁸ Edi afo, eyen-owo, kop se ami ndɔhɔde fi; kusɔŋ ibuot nte ufɔk nsɔŋ-ibuot emi: tat inua fo, nyuŋ dia se ami nnɔde fi.

⁹ Ndien ami nse, ndien, sese, enyanare ubɔk enɔ mi: ndien, sese, ikpa-ŋwed odu enye ke esit;

¹⁰ ndien enye atat enye ke iso mi: ndien ewet enye ke esit ye ke edem: ewet eyet, ye utuaŋa, ye eseme esin enye ke esit.