EZEKIEL 18 - Edisana ñwed Abasi Ibom

Ukpɔŋ Emi Anamde Idiɔk Ŋkpɔ Eyekpa Ŋkpa

¹ EDIKEM uyo Jehovah osim mi, ete, Mbufo enam didie etop ŋke emi ebaŋa isɔŋ Israel, ete,

² Mme ete emedia grape ikɔt, ndien edet nditɔ emedoro isuɔ?

³ Ɔbɔŋ Jehovah ɔdɔhɔ, ete, Ma uwem mi, inyeneke aba nte mbufo edikede ŋke emi ke Israel.

⁴ Sese, kpukpru ukpɔŋ enyene mi; ukpɔŋ ete ebiet eke eyen, mmɔ edi okimmɔ: ukpɔŋ eke anamde idiɔk eyekpa mkpa.

⁵ Ndien ke owo enende, onyuŋ anamde ikpe ye se inende,

⁶ ndien midiaha ŋkpɔ ke ikpɔ obot, minyuŋ imenekede enyin esie ise ibɔk ufɔk Israel, minyuŋ isabakede ŋwan mbɔhiduŋ esie, minyuŋ itieneke ŋwan eke odude ke esien;

⁷ minyuŋ itukke owo, edi esana ubiɔŋ esie ayak, ndien midaha ŋkpɔ ke ŋwo, ada udia esie ɔnɔ owo biɔŋ, onyuŋ ada ɔfɔŋ-idem ofuk iferi;

⁸ eke mibuɔtke ŋkpɔ idia usiene ikaha; minyuŋ ibɔhɔ akwa udori, osio ubɔk esie ke idiɔk ido efep, ekpe ikpe akpanikɔ ke ufɔt owo ye owo:

⁹ eke asaŋade ke mme ewuhɔ mi, onyuŋ onimde mme item mi, onyuŋ anamde akpanikɔ; enye edi edinen, iditreke ndidu uwem. Uyo Ɔbɔŋ Jehovah edi emi.

¹⁰ Enye ama obon eyen ŋwo eke ɔduɔkde iyip, onyuŋ anamde eyen-eka baba ŋkpɔ emi kiet;

¹¹ ndien enye minamke baba ŋkpɔ emi kiet, edi adia ŋkpɔ ke ikpɔ obot, onyuŋ asabare ŋwan mbɔhɔ-iduŋ esie;

¹² eke otukde owo ukut ye ubuene, owode ŋwo, ndien misanake ubiɔŋ iyak, onyuŋ emenere enyin esie ese ibɔk, anam mbubiam;

¹³ eke ɔbuɔtde ŋkpɔ adia usiene akaha, onyuŋ ɔbɔde akwa udori: nte enye eyedu uwem? Enye okudu uwem: enye amanam kpukpru mbubiam emi: iditreke ndikpa; iyip esie eyedoro enye ke idem.

¹⁴ Ndien, sese, enye ama obon eyen, ndien eyen okut kpukpru mme idiɔk ido ete esie emi enye anamde, ndien efehe ndik, ndien minamke baba ŋkpɔ kiet eke ebietde mmɔ.

¹⁵ Enye midiaha ŋkpɔ ke enyɔŋ ikpɔ obot, minyuŋ imenekede enyin esie ise ibɔk ufɔk Israel, misabakede ŋwan mbɔhɔ-iduŋ esie;

¹⁶ minyuŋ itukke owo, minumke ubiɔŋ, minyuŋ iwoho ŋwo, eke adade uyo esie ɔnɔ owo biɔŋ, onyuŋ esinede iferi ɔfɔŋ-idem;

¹⁷ enye odorore owo ukut ubɔk ke idem efep, ibɔhɔ akwa usiene ye udori, anam mme item mi, asaŋa ke mme ewuhɔ mi; enye idikpaha ke mme idiɔk ido ete esie, edi eyedu uwem.

¹⁸ Ama edi ete esie, koro enye efikde ufik, owode eyen-eka, onyuŋ anamde se mifɔnke ke otu oruk esie, sese, ndien enye akpa ke idiɔk ido esie.

¹⁹ Ndien mbufo edɔhɔ, ete, Eyen anam didie mibiomke idiɔk ido ete esie? Ke ini eyen oro anamde edinen ikpe, onimde kpukpru mme ewuhɔ mi, onyuŋ anam mmɔ, enye iditreke ndidu uwem.

²⁰ Edi ukpɔŋ eke anamde idiɔk eyekpa. Eyen idibiomke ufen ete esie; ete idinyuŋ ibiomke ufen eyen esie; edinen ido edinen owo eyedoro enye ke idem; idiɔk ido idiɔk owo eyenyuŋ odoro enye ke idem.

²¹ Ndien ama edi idiɔk owo, ke ini enye ɔkpɔŋde kpukpru mme idiɔk ido esie emi enye akanamde, afiak edem, onyuŋ onimde kpukpru mme ewuhɔ mi, onyuŋ anam edinen ikpe, enye iditreke ndidu uwem, idikpaha mkpa.

²² Iditihi mme idiɔk ido esie eke enye akanamde baba kiet inɔ enye: edinen ido esie eke enye akanamde eyesin enye odu uwem.

²³ Ɔbɔŋ Jehovah ɔdɔhɔ ete, Nte mkpa idiɔk owo enem mi esit baba? Nte erikabare eke enye akabarede ɔkpɔŋ usuŋ esie, odu uwem, inemke mi esit?

²⁴ Ndien ke adaŋemi edinen owo ɔkpɔŋde edinen ido esie afiak edem, onyuŋ anam mme ukwaŋ-ŋkpɔ, onyuŋ anam nte asaŋade ye kpukpru mbubiam ido emi idiɔk owo anamde, nte enye eyedu uwem? Iditihi edinen ido esie eke enye anamde baba kiet: enye eyekpa ke ndudue esie eke enye eduede, ye ke idiɔk ido eke enye anamde.

²⁵ Ndien mbufo ke edɔhɔ ete, “Usuŋ Ɔbɔŋ inenke.” O ufɔk Israel, mbufo ekop, mbɔk; nte usuŋ mi inenke? Nte idige usuŋ mbufo inenke?

²⁶ Ke adaŋemi edinen owo ɔkpɔŋde edinen ido esie, onyuŋ anamde ukwaŋ-ŋkpɔ, ndien akpa ke abaŋa mmɔ; enye eyekpa ke ukwaŋ-ŋkpɔ emi enye anamde.

²⁷ Ndien adaŋemi idiɔk owo ɔkpɔŋde idiɔk ido esie emi enye akanamde, afiak, onyuŋ anamde edinen ikpe, enye eyenim ukpɔŋ esiemɔ ke uwem.

²⁸ Koro enye abakde, onyuŋ ɔkpɔŋde kpukpru mme idiɔk ido esie eke enye akanamde, afiak, enye iditreke ndidu uwem, idikpaha.

²⁹ Ndien ufɔk Israel edɔhɔ ete, Usuŋ Ɔbɔŋ inenke. O ufɔk Israel, nte usuŋ mi inenke? Nte idige usuŋ mbufo inenke?

³⁰ Mmɔdo Ɔbɔŋ Jehovah ɔdɔhɔde ete, Nyekpe ikpe ye mbufo, O ufɔk Israel, ye kpukpru owo nte ekemde ke usuŋ mmɔ. Mbufo ekabare enyuŋ esioŋo idem mbufo efep ke kpukpru mme oburobut ido mbufo, man ukwaŋ-ŋkpɔ okunam mbufo etak.

³¹ Mbufo esioŋo kpukpru mme oburobut ido eke mbufo ekeduede ke esit ke idem mbufo efep; enyuŋ enam obufa esit ye obufa spirit esin mbufo ke idem: koro mbufo edinam didie ekpaŋa, O ufɔk Israel?

³² Koro Ɔbɔŋ Jehovah ɔdɔhɔde, ete. Mkpa akpa-mkpa inemke mi esit: mbufo ekabare, ndien edu uwem.