EZEKIEL 15 - Edisana ñwed Abasi Ibom

Eto Vine Emi Minyeneke Ufɔn

¹ EDIKEM uyo Jehovah osim mi, ete, Eyen owo, eto vine akan kpukpru eto eŋwen ke nso?

² Ŋkɔk eke odude ke otu mme eto akai?

³ Nte eyeda ubak eto esie enam utom? Nte eyeda ubak esie ekɔŋ ntok, man ekɔŋ ŋkpɔ ekededi ke esit?

⁴ Sese, eda enye esin ke ikaŋ eta: ikaŋ ata enye ke utit mbiba; ufɔt esie onyuŋ ɔfɔbɔ. Nte enye ɔfɔn ke utom?

⁵ Sese, adaŋemi enye edide edehe, idaha enye inam utom: ŋwaŋwa-ediso adaŋemi ikaŋ atade enye, enye onyuŋ ɔfɔbɔ: nte ekeme ndida enye nnam utom ŋko?

⁶ Mmɔdo ntem ke Ɔbɔŋ Jehovah ɔdɔhɔ, ete, Kpa nte vine ke otu mme eto akai emi ami ndade nnɔ ikaŋ ke ifia, kpa ntre ke ndinɔ mme andiduŋ Jerusalem.

⁷ Ndien nyewuk iso mi nse mmɔ; mmɔ eyeto ke ikaŋ kiet, ndien ikaŋ eŋwen eyeta mmɔ: ndien mbufo eyefiɔk ete ke ami ndi Jehovah, eke ŋwukde iso mi nse mmɔ.

⁸ Ndien nyenim isɔŋ ke ndobo, koro mmɔ enamde idiɔk-ŋkpɔ: uyo Ɔbɔŋ Jehovah edi emi.