EZEKIEL 10 - Edisana ñwed Abasi Ibom

Ubɔŋ Abasi Adaha Ɔkpɔŋ Temple

¹ NDIEN nse, ndien, sese, ŋkpɔ nte itiat sapphire, emi etiede nte mbiet ebekpo, odu ke ikpa-enyɔŋ emi odorode mme cherubim ke ibuot; ndien ekut enye ke enyɔŋ mmɔ.

² Ndien enye eneme ye owo oro esinede linen, onyuŋ ɔdɔhɔ enye, ete, Duk ke ufɔt mme wheel emi esinede ke idak cherub, nyuŋ wobi ebok ikaŋ ke ufɔt mme cherubim yɔhɔ ke ubɔk, sio kasuan ke enyɔŋ obio. Ndien enye adaha ke iso mi aka.

³ Ndien mme cherubim eda edem ufɔk nnasia, ke ini enye owo oro odukde; nsuŋikaŋ onyuŋ ɔyɔhɔ ke esa okure.

⁴ Ndien ubɔŋ Jehovah ɔkpɔŋ cherub oro ɔdɔk ke enyɔŋ asaŋudɔk ufɔk; ndien obubit enyɔŋ ɔyɔhɔ ke ufɔk; uyama ubɔŋ Jehovah ɔyɔhɔ ke okure ŋko-ŋko.

⁵ Ndien ekop uyom mba mme cherubim ke edem okure, ebiet uyo Ata Ɔkpɔsɔŋ Abasi ke ini enye ɔdɔhɔde.

⁶ Edikem adaŋemi enye okowukde owo oro esinede linen, ete, Sio ikaŋ ke ufɔt mme wheel, ke ufɔt mme cherubim; ndien enye oduk edida ke ŋkaŋ mme wheel.

⁷ Ndien mme cherub oro etie ke ufɔt mme cherubim anyan ubɔk esie ke ikaŋ emi odude ke ufɔt mme cherubim, onyuŋ emen esin ke ubɔk owo oro esinede linen: ndien enye ɔbɔ ada ɔwɔrɔ.

⁸ Ndien ekut mbiet ubɔk owo ke idem mme cherubim ke idak mba mmɔ.

⁹ Ndien ŋkut, ndien, sese, wheel inaŋ edu ke ŋkaŋ mme cherubim, wheel kiet ke ŋkaŋ cherub kiet, wheel kiet ke ŋkaŋ cherub kiet, ndien mme wheel ebiet enyin itiat Tarshish.

¹⁰ Ndien ama edi iso mmɔ, mmɔ mbinaŋ enyene mbiet kiet, kpa nte wheel okpodude ke ufɔt wheel.

¹¹ Ke adaŋemi mmɔ esaŋade, mmɔ esaŋa ke edem mmɔ mbinaŋ; iwɔŋɔkede ke ini mmɔ esaŋade, edi mmɔ etiene ibuot eka ebiet emi enyin esede; mmɔ iŋwɔŋɔkede ke ini mmɔ esaŋade.

¹² Enyin, enyin eyɔhɔ ofuri idem mmɔ, ye edem mmɔ, ye ubɔk mmɔ, ye mba mmɔ, ye mme wheel ŋko, ekan mme wheel mmɔ mbinaŋ ekuk.

¹³ Ama edi mme wheel, owo ofiori okot mmɔ ke utɔŋ mi, ete, O wheel!

¹⁴ Ndien kpukpru mmɔ kiet kiet enyene iso inaŋ: akpa iso edi iso cherub, udiana-akpa iso edi iso owo, ɔyɔhɔ ita onyuŋ edi iso Lion ŋko, ɔyɔhɔ inaŋ onyuŋ edi iso ntrukpom.

¹⁵ Ndien emenere mme cherubim ke enyɔŋ. Emi edi ŋkpɔ uwem oro ŋkokutde ke mben akpa Chebar.

¹⁶ Ndien ke ini mme cherubim esaŋade, mme wheel enyuŋ etiene mmɔ esaŋa ke ŋkaŋ: ndien ke ini mme cherubim emenerede mba mmɔ, ete ikpɔŋ isɔŋ idɔk ke enyɔŋ, mme wheel oro inyuŋ iwɔŋɔkede ikpɔŋ ŋkaŋ mmɔ.

¹⁷ Adaŋemi mmɔ etuakde eda, mmɔ oro etuak eda; ke emenerede mmɔ ke enyɔŋ, enyuŋ emenere mmɔ oro ŋko: koro spirit ŋkpɔ uwem odude mmɔ ke idem.

¹⁸ Edikem ubɔŋ Jehovah adaha ke asaŋudɔk ufɔk, ɔwɔrɔ aka akada ke enyɔŋ mme cherubim.

¹⁹ Ndien mme cherubim emenere mba mmɔ ke enyɔŋ, enyuŋ ekpɔŋ isɔŋ edɔk ke iso mi, ke ini mmɔ ewɔŋɔde; ndien mme wheel ekem ye mmɔ; ndien mmɔ eda ke enyin usuŋ inua-otop ufɔk Jehovah ke edem usiaha utin: ubɔŋ Abasi Israel onyuŋ odoro mmɔ ke enyɔŋ.

²⁰ Emi edi ŋkpɔ uwem oro ŋkokutde ke idak Abasi Israel ke mben akpa Chebar; ami nnyuŋ mfiɔk nte ke mmɔ edi mme cherubim.

²¹ Kiet kiet enyene iso inaŋ, kiet kiet onyuŋ enyene mba inaŋ; ŋkpɔ emi ebietde ubɔk owo onyuŋ odu mmɔ ke idak mba.

²² Ndien mbiet iso mmɔ edi kpasuk iso oro ŋkokutde ke mben akpa Chebar, iso mmɔ, ye idem mmɔ: kpukpru mmɔ kiet kiet eneŋere iso mmɔ esaŋa.