EZEKIEL 1 - Edisana ñwed Abasi Ibom

Ŋkukut Prophet Okutde Abaŋa Ebekpo Abasi

¹ EDIKEM ke ɔyɔhɔ isua edip ye duop, ke ɔyɔhɔ ɔfiɔŋ inaŋ, ke ɔyɔhɔ usen ɔfiɔŋ ition, ke ini ami ndude ke otu mbon ntaŋ-mfep ke mben akpa Chebar, enyɔŋ okubɔre, ndien ŋkut ŋkukut Abasi.

² Ke ɔyɔhɔ usen ɔfiɔŋ ition, oro edi ɔyɔhɔ isua ition nte eketaŋ edidem Jehoiachin efep,

³ ikɔ Jehovah osim Ezekiel eyen Buzi oku, ke isɔŋ mme Chaldean, ke mben akpa Chebar, ubɔk Jehovah onyuŋ odoro enye ke idem do.

⁴ Ndien ŋkut, ndien, sese, ofum idio oto ke edem edere edi, akamba obubit enyɔŋ ye ikaŋ eke emineŋde, uyama onyuŋ akan enye okuk, ufɔt-ufɔt esie onyuŋ ebiet enyin edisem okpoho, ke ufɔt ikaŋ oro.

⁵ Mbiet ŋkpɔ inaŋ enyuŋ edu enye ke ufɔt, iso mmɔ enyuŋ etie ntem; mmɔ ebiet owo.

⁶ Kiet kiet onyuŋ enyene iso inaŋ, kiet kiet onyuŋ enyene mba inaŋ.

⁷ Ukot mmɔ enyuŋ edi edinen ukot; ikpat ukot mmɔ onyuŋ ebiet ikpat ukot eyen enaŋ: ndien mmɔ esem nte enyin okpoho eke etukde.

⁸ Ubɔk kiet kiet nte eke owo odu mmɔ ke idak mba ke idem mmɔ mbinaŋ, mmɔ mbinaŋ enyuŋ enyene iso mmɔ ye mba mmɔ.

⁹ Mba mmɔ eyi ediana kiet ye kiet; mmɔ ikabakede ke ini mmɔ esaŋade; kpukpru mmɔ kiet kiet eneŋere iso esaŋa.

¹⁰ Ndien ama edi mbiet iso mmɔ, iso owo ye iso lion edu mmɔ mbinaŋ ke nnasia: mmɔ mbinaŋ enyuŋ enyene iso enaŋ ke ufien; mmɔ mbinaŋ enyuŋ enyene iso ntrukpom.

¹¹ Ndien iso mmɔ ye mba mmɔ ebahare ke enyɔŋ; mba mmɔ iba iba kiet eyi ke kiet, iba enyuŋ efuk idem mmɔ.

¹² Ndien kpukpru mmɔ kiet kiet eneŋere iso esaŋa: mmɔ eka ke ebiet ekededi eke spirit oyomde ndika do: ikabakede ke ini mmɔ esaŋade.

¹³ Ndien ama edi mbiet ŋkpɔ oro, mmɔ ebiet ebok ikaŋ eke asakde, ebiet nte utuenikaŋ etiede, enye asaŋa aka iso, asaŋa afiak edem ke otu ŋkpɔ uwem oro, ikaŋ onyuŋ asak, mineŋ-mineŋ onyuŋ oto ke ikaŋ oro.

¹⁴ Ndien ŋkpɔ uwem oro efehe ndien efiak edem, ebiet mineŋ-mineŋ.

¹⁵ Ndien nse ŋkpɔ uwem oro, ndien, sese, wheel kiet ke isɔŋ ada ke ŋkaŋ ŋkpɔ uwem kiet, nte iso mbinaŋ mmɔ esaŋade.

¹⁶ Mme wheel ye ubɔk-usɔ mmɔ ebiet itiat Tarshish: mmɔ mbinaŋ enyuŋ enyene iso kiet, iso mmɔ ye ubɔk-usɔ mmɔ enyuŋ etie nte wheel odude ke ufɔt wheel.

¹⁷ Mmɔ eka edem mbinaŋ ke ini mmɔ esaŋade: ikabakede ke ini mmɔ esaŋade.

¹⁸ Ama edi mkpanuen mmɔ, mmɔ ekoŋ enyuŋ enyene ndik; enyin-enyin enyuŋ eyɔhɔ mkpanuen ekanare mmɔ mbinaŋ ekuk.

¹⁹ Ndien ke ini ŋkpɔ uwem oro esaŋade, mme wheel esaŋa mmɔ ke ŋkaŋ: ke ini enyuŋ emenerede ŋkpɔ uwem ekpɔŋ isɔŋ, mmɔ enyuŋ emenere mme wheel.

²⁰ Ke edem eke spirit oyomde ndika do, mmɔ eka do eke spirit oyomde ndika; enyuŋ emenere mme wheel ekem ye mmɔ: koro spirit ŋkpɔ uwem odude ke mme wheel.

²¹ Ke ini mmɔ esaŋade, mmɔ eken esaŋa; ndien ke ini mmɔ etuakde eda, mmɔ eken etuak eda; ke ini enyuŋ emenerede mmɔ ke isɔŋ efep, emenere mme wheel ekem ye mmɔ: koro spirit ŋkpɔ uwem odude ke mme wheel.

²² Ndien ikpa-enyɔŋ eke odude mbuot ŋkpɔ-uwem ke enyɔŋ ebiet enyin crystal enyene ndik, eneŋere enye ke enyɔŋ ibuot mmɔ.

²³ Ndien eneŋere mba mmɔ, kiet eyi kiet, ke idak ikpa-enyɔŋ: kpukpru mmɔ kiet kiet enyene iba eke efukde idem mmɔ ke edem emi, kiet kiet enyuŋ enyene iba eke efukde idem mmɔ ke edem eken.

²⁴ Ndien ŋkop uyo mba mmɔ nte uyom ediwak mmɔŋ, nte uyom Ata Ɔkpɔsɔŋ, ke ini mmɔ esaŋade, uyom mkpo ofut nte uyom nna-ekɔŋ; ke ini mmɔ etuakde eda, mmɔ esuhɔre mba mmɔ.

²⁵ Ndien adaŋemi mmɔ etuakde eda, enyuŋ esuhɔrede mba mmɔ, uyom oto ke ikpa-enyɔŋ eke odude mbuot mmɔ ke enyɔŋ.

²⁶ Ndien ŋkpɔ eke ebietde itiat a-sapphire, mbiet ebekpo, odoro ke ikpa-enyɔŋ eke odude ibuot mmɔ ke enyɔŋ: mbiet eke etiede nte idem owo onyuŋ odoro ke mbiet ebekpo oro ke enyɔŋ esie.

²⁷ Ndien ŋkut ŋkpɔ eke ebietde enyin edisem okpoho, ŋkpo eke ebietde ikaŋ odu enye ke esit akan okuk; ɔtɔŋɔde ke mbiet isin esie ɔdɔk, onyuŋ ɔtɔŋɔde ke mbiet isin esie ɔsuhɔre, ŋkut ŋkpɔ eke ebietde ikaŋ, uyama onyuŋ odu enye ke esit akan okuk.

²⁸ Kpa nte akpara emi odude ke obubit enyɔŋ ke usen edim, etiede, kpasuk ntre ke uyama emi akande enye okuk etie. Mbiet ubɔŋ Jehovah etie ntem. Ndien ke ini ŋkutde, nduɔ ke isɔŋ ŋkubi iso mi, nnyuŋ ŋkop uyo eke etiŋde ikɔ.