ESTHER 8 - Edisana ñwed Abasi Ibom

Esther Anyaŋa Mme Jew Osio ke Nsobo

¹ KE usen oro Ahasuerus ada ufɔk Haman, usua mme Jew, ɔnɔ Esther ɔbɔŋ-aŋwan. Mordecai onyuŋ edi ke iso edidem: koro Esther akasiakde, ete ke enye edi oruk imɔ.

² Ndien edidem osio mkpanuen esie, emi enye ɔkɔbɔde Haman, ada ɔnɔ Mordecai. Esther onyuŋ onim Mordecai ke ete ufɔk Haman.

³ Ekem Esther ɔtɔŋɔ ntak ɔdɔhɔ ke iso edidem, onyuŋ ɔduɔ enye ke ukot, onyuŋ atua eyet ekpe enye ubɔk, ete enye akpan idiɔk ŋkpɔ Haman Agagite, ye uduak oro enye akaduakde abaŋa mme Jew.

⁴ Ndien edidem anyan mmɔnyɔ o-gold ɔnɔ Esther.

⁵ Ntre ke Esther adaha ada ke iso edidem, onyuŋ ɔdɔhɔ ete, Edieke edidem esede ete ke ɔfɔn, ami nnyuŋ nnemde enye esit, ikɔ emi onyuŋ enende ke iso edidem, ami nnyuŋ mfɔnde enye ke enyin, yak ewet ete ekpuhɔre ŋwed oro Haman, eyen Hamme-datha, Agagite, okotibide, emi enye ekewetde, ete isobo mme Jew emi edude ke kpukpru mme province edidem:

⁶ koro ndinam didie ŋkeme ndikut idiɔk-ŋkpɔ emi edisimde iman mi? Ndinyuŋ ŋkeme didie ndikut nsobo oruk mi?

⁷ Ndien edidem Ahasuerus ɔdɔhɔ Esther, ɔbɔŋ-aŋwan, ye Mordecai Jew, ete, Sese, mmada ufɔk Haman nnɔ Esther, ema enyuŋ eyiri enye ke eto, koro enye anyande ubɔk esie otuk mme Jew.

⁸ Mbufo ewet ndien, ebaŋa mme Jew, kpa se mbufo emade, esin ke enyiŋ edidem, enyuŋ eda mkpanuen edidem efik enye; koro owo mikemeke ndikpuhɔre ŋwed eke ewetde esin enyiŋ edidem, enyuŋ edade mkpanuen edidem efik.

⁹ Ntre ke mmɔ ekot mme ewet-ŋwed edidem edi, ke ini oro, ke ɔyɔhɔ ɔfiɔŋ ita, oro edi ɔfiɔŋ Sivan, ke ɔyɔhɔ usen esie edip ye ita; ndien mmɔ ewet kpukpru nte Modercai etemede, enɔ mme Jew, ye ikpɔ mbɔŋ, ye mme andikara, ye mme etubom mme province, emi etɔŋɔde ke India tutu esim ke Ethopia, province ikie ye edip ye itiaba, province kiet kiet nte ŋwed esie asaŋade ye idut kiet kiet nte usem esie asaŋade, ye mme Jew nte ŋwed mmɔ ye usem mmɔ esaŋade.

¹⁰ Ndien enye ewet esin enyiŋ edidem Ahasuerus, onyuŋ efik ke mkpanuen edidem, ndien esin ŋwed oro ke ubɔk mbon-itɔk emi edorode horse eke esɔpde itɔk, ye ke mule eke uman horse emande, ete eda esɔk:

¹¹ emi edidem ayakde mme Jew emi edude ke kpukpru obio, ebono, enyuŋ eda ekpeme uwem mmɔ, man esobo, enyuŋ ewot, enyuŋ ebiat kpukpru mme udim owo, ye mme province eke etukde mmɔ, ŋkpri nditɔwɔŋ, ye iban, enyuŋ ebume ŋkpɔ mmɔ,

¹² ke usen kiet, ke kpukpru mme province edidem Ahasuerus, ke ɔyɔhɔ usen duop-eta, ke ɔyɔhɔ ɔfiɔŋ duopeba; enye edi ɔfiɔŋ Adar.

¹³ Mmɔ ekaŋa nwed emi, man etaŋa enye ke ewuhɔ ke kpukpru mme province kiet kiet, enyuŋ esian kpukpru mme idut, ete mme Jew enam ŋkpɔ ebeŋe usen emi, man esio usiene ye mme asua mmɔ.

¹⁴ Ndien mbon utɔk edoro ke horse eke esɔpde ukot, ye ke mule, ewɔŋɔ, uyo edidem onyuŋ esin mmɔ emen idem eka. Mmɔ enyuŋ etaŋa ewuhɔ oro ke palace Shushan.

¹⁵ Ndien Mordecai oto ke iso edidem ɔwɔrɔ, esine ɔfɔŋidem ubɔŋ, awawa ye afia, onyuŋ ayara akamba anyanya o-gold, esine ekura eti linen ye purple. Ntre ke obio Shushan osio mkpo idara.

¹⁶ Mme Jew ekut uŋwana, ye idara, ye inem, ye ukpono.

¹⁷ Ndien ke kpukpru mme province, ye ke kpukpru obio, ebiet emi uyo edidem ye ewuhɔ esie esimde, mme Jew ekut idara, ye inem, ye akwa udia ye eti usen. Ndien ediwak owo ke otu mme idut ke edem oro ekabare edi Jew: koro ndik mme Jew anamde mmɔ.