ESTHER 6 - Edisana ñwed Abasi Ibom

Edidem Anam Ekpono Mordecai

¹ KE okoneyo oro, edidem ikwe nte edede idap; ndien enye ɔdɔhɔ, ete eda ŋwed emi ewetde ŋkpɔ kpukpru usen: ndien ekot mmɔ ke iso edidem.

² Ndien mmɔ ekut ebiet emi ewetde, nte Mordecai akasiakde abaŋa Big-thana, ye Teresh, mme eunuch edidem iba ke otu mme andikpeme inua-otop, emi ekeyomde usuŋ nte enyande ubɔk etuk edidem Ahasuerus.

³ Ndien edidem obup, ete, Ekenam Mordecai nso ŋkpɔ ubɔŋ ye ukpono ebaŋa emi? Ndien mkparawa edidem, mme asaŋutom esie, ebɔrɔ, ete, Ikenamke enye baba ŋkpɔ kiet.

⁴ Ndien edidem obup ete, Anie owo odu ke okure? Ndien Haman ama oduk ke akpa okure ufɔk edidem, ete ididɔhɔ edidem eyiri Mordecai ke eto oro enye okowukde ɔnɔ enye.

⁵ Ndien ikɔt edidem edɔhɔ enye, ete, Sese Haman ke ada ke okure. Ndien edidem ete, Yak enye ebe oduk.

⁶ Ntre ke Haman ebe oduk. Ndien edidem obup enye, ete, Nso ke edinam ye owo emi edidem amade ndikpono? Ndien Haman ekere ke esit esie, ete, Anie ke edidem amama ndikpono ŋkan mi?

⁷ Ndien Haman ɔbɔrɔ edidem, ete, Ama edi owo emi edidem amade ndikpono,

⁸ yak eda edisine-ŋkpɔ edidem, emi edidem esinede ke idem, ye horse emi edidem odorode, enyuŋ eyara owo oro anyanya edidem ke ibuot:

⁹ yak enyuŋ eda edisine-ŋkpɔ emi, ye horse, esin ke ubɔk ata akamba ɔbɔŋ edidem kiet, man esine owo emi edidem amade ndikpono, enyuŋ edori enye ke edem horse oro, esaŋa ke aŋwa obio, enyuŋ ekwɔrɔ enye ke iso, ete, Ke ntem ke edinam ye owo emi edidem amade ndikpono.

¹⁰ Ndien edidem ɔdɔhɔ Haman, ete, Wara da edisine-ŋkpɔ, ye horse, kpa nte afo ɔdɔhɔde, nyuŋ nam kpa ntre ye Mordecai, Jew emi etiede ke inua-otop edidem: kukpɔŋ baba ŋkpɔ kiet emi afo ɔdɔhɔde.

¹¹ Ntre Haman ada edisine-ŋkpɔ, ye horse, esine Mordecai ke idem, onyuŋ odori enye ke edem horse asaŋa ke aŋwa obio, onyuŋ ɔkwɔrɔ enye ke iso, ete, Ke ntem ke edinam ye owo emi edidem amade ndikpono.

¹² Ekem Mordecai afiak ke inua-otop edidem. Edi Haman awara aka ke ufɔk esie, atua, onyuŋ ɔfuhɔ ŋkpɔ ke ibuot esie.

¹³ Ndien Haman emen kpukpru se ikotibede ye enye, obuk ɔnɔ Zeresh ŋwan esie, ye mme ufan esie kpukpru. Ndien mme ɔfiɔk-ŋkpɔ owo esie, ye Zeresh ŋwan esie, edɔhɔ enye, ete, Edieke Mordecai emi afo ɔtɔŋɔde ndisuhɔre enye ke iso, otode ke oruk mme Jew, afo udukemeke ubɔk ye enye, edi udutreke ndisuhɔre enye ke iso.

¹⁴ Ke adaŋemi mmɔ esuk edɔhɔde kaŋa ikɔ ye enye, eunch edidem edi, ndien ewara eda Haman eka udia emi Esther akanamde.