ESTHER 5 - Edisana ñwed Abasi Ibom

Esther Okot Edidem Ahasarus ye Haman Udia

¹ EDIKEM ke ɔyɔhɔ usen ita, Esther esine edisine-ŋkpɔ ɔbɔŋ-aŋwan, edi edida ke esit okure ufɔk edidem, asak iso ese ufɔk edidem: ndien edidem etie ke ebekpo ubɔŋ esie ke ufɔk edidem, asak iso ese usuŋ ufɔk.

² Edikem adaŋemi edidem okutde Esther ɔbɔŋ-aŋwan adade ke okure, enye ese enye ke ima: ndien edidem anyan mmɔnyɔ o-gold emi odude enye ke ubɔk, ɔnɔ Esther. Ndien Esther asaŋa ekpere okotuk iso mmɔnyɔ.

³ Ndien edidem ɔdɔhɔ enye, ete, Nsitibe ye afo, Esther ɔbɔŋ-aŋwan? Afo onyuŋ oyom nso? Eyenɔ fi, ekpedi idem ubak edem kiet ubɔŋ.

⁴ Ndien Esther ɔdɔhɔ, ete, Edieke edidem amade, yak edidem ye Haman edi udia eke nnamde nnɔ mmɔ mfin emi.

⁵ Ndien edidem ɔdɔhɔ ete, Mbufo edɔhɔ Haman, ete enye awara anam ke uyo Esther. Ntre ke edidem ye Haman eka udia oro Esther akanamde.

⁶ Ekem ke ini uŋwɔŋ wine edidem obup Esther, ete, Afo ebeŋe nso? Ke eyenɔ fi. Afo onyuŋ oyom nso? Ke eyenam, ekpedi idem ubak edem kiet ubɔŋ.

⁷ Ndien Esther ɔbɔrɔ, ete Ebeŋe mi ye mkpe-ubɔk mi edi emi:

⁸ edieke mfɔnde edidem ke enyin, edidem ama onyuŋ ama ndinɔ ebeŋe mi, nnyuŋ nnam ke mkpe-ubɔk mi, yak edidem ye Haman edi udia emi ndinamde nnɔ mmɔ, ndien mkpɔŋ nyenam ke uyo edidem.

⁹ Ndien usen oro Haman ɔwɔrɔ, adara, onyuŋ enem esit: edi ke ini Haman okutde Mordecai ke inua-otop edidem, ndien enye midahake enyɔŋ, minyuŋ inyekke idem ibaŋa enye, Haman ofut esit eti-eti ye Mordecai.

¹⁰ Edi Haman omum idem esie akama; ndien ke ini enye osimde ufɔk esie, enye ɔdɔŋ ekekot mme ufan esie, ye Zeresh ŋwan esie edi.

¹¹ Ndien Haman obuk ubɔŋ inyene esie, ye uwak nditɔ-iren esie, ɔnɔ mmɔ, ye kpukpru se edidem okponode enye ke esit, ye nte okoforide enye akan mbɔŋ ye ikɔt edidem.

¹² Haman onyuŋ ɔdɔhɔ ete, Esther ɔbɔŋ-aŋwan ŋko iyakke baba owo kiet etiene edidem oduk ke udia emi enye akanamde, ke mibɔhɔke ami; ndien emekot mi, ete ntiene edidem ŋka ke ɔtɔ esie mkpɔŋ.

¹³ Edi kpukpru ŋkpɔ emi inemke mi, adaŋa nte nsuk ŋkokut Mordecai Jew oro etiede ke inua-otop edidem.

¹⁴ Ndien Zeresh ŋwan esie, ye kpukpru mme ufan esie, edɔhɔ enye, ete, Yak enam eto eke okoŋde ibio-idomo-okuk aba ye duop, ndien eyo ama esiere, dɔhɔ edidem, ete eyiri Mordecai ke esit: ndien tiene edidem ka ke itie udia ke idaresit. Ndien Haman ama ikɔ oro, onyuŋ anam eto oro.