2 SAMUEL 5 - Edisana ñwed Abasi Ibom

Eyet David Aran Enim Nte Edidem ke Ofuri Israel

¹ EKEM kpukpru esien Israel eka ke ɔtɔ David ke Hebron, ekedɔhɔ ete, Sese, nnyin idi ɔkpɔ fo ye obukidem fo.

² Tutuko adaŋemi Saul edide edidem nnyin, edi afo akada Israel ɔwɔrɔ, onyuŋ ada oduk. Jehovah okonyuŋ ɔdɔhɔ fi, ete, Afo eyebɔk ikɔt mi Israel, afo eyenyuŋ edi etubom Israel.

³ Ntre ke kpukpru mbiowo Israel etiene edidem ke Hebron; ndien edidem David onyuŋ odiomi ediomi ye mmɔ ke Hebron ke iso Jehovah: ndien mmɔ eyet David aran enim ke edidem Israel.

⁴ David osim isua edip ye duop ke ini enye adade ubɔŋ, onyuŋ edi edidem ke isua aba.

⁵ Enye edi edidem Judah ke Hebron ke isua itiaba ye ɔfiɔŋ itiokiet; onyuŋ edi edidem ofuri Israel ye Judah ke Jerusalem ke isua edip ye duopeta.

⁶ Ekem edidem ye ikɔt esie eka Jerusalem, ete iŋwana ekɔŋ ye mme Jebusite, mme andiduŋ isɔŋ oro: ndien mmɔ edɔhɔ David, ete, Afo ududukke mi, edi mme nnan ye mme mbuŋɔ eyekpan fi: ete ke, David ididukke mi.

⁷ Edi David ada ɔkpɔsɔŋ ebiet Zion: oro edi obio David.

⁸ David onyuŋ ɔdɔhɔ ke usen oro, ete, Yak kpukpru owo eke ewotde mme Jebusite, eda mmɔ ŋko eduɔk ke udiɔŋ mmɔŋ, ye mme mbuŋɔ ye nnan emi esit David asuade. Mmɔdo edɔhɔde ete, Mbuŋɔ ye nnan ididukke ke ufɔk.

⁹ Ndien David oduŋ ke ɔkpɔsɔŋ ufɔk oro: onyuŋ osio enye enyiŋ Obio David. David onyuŋ anam ibibene akan okuk, ɔtɔŋɔde ke Millo oduk ke esit.

¹⁰ Ntre ke David ɔdɔdiɔŋ okpon aka iso, Jehovah Abasi mme udim onyuŋ odu ye enye.

¹¹ Ekem Hiram edidem Tyre ɔdɔŋ mme isuŋutom etiene David, ye eto cedar, ye mbon-usɔ eto, ye mbon eke esɔide itiat ibibene: ndien mmɔ ebɔp ufɔk enɔ David.

¹² Ndien David ɔfiɔk ete ke Jehovah omonim imɔ ke edidem Israel, omonyuŋ emen itie ubɔŋ imɔ onim ke enyɔŋ abaŋa ikɔt esie Israel.

¹³ Ekem David ɔdɔ iban-esa ye iban efen eke etode Jerusalem, adaŋemi enye okotode ke Hebron edi: nditɔ-iren ye iban enyuŋ emana ŋko enɔ David.

¹⁴ Ndien mme mmɔ emi edi enyiŋ mmɔ oro ekemanade enɔ enye ke Jerusalem; Shammua, ye Shobab, ye Nathan,

¹⁵ ye Solomon, ye Ibhar, ye Elishua,

¹⁶ ye Nepheg, ye Japhia, ye Elishama, ye Eliada, ye Eliphelet.

¹⁷ Ekem adaŋemi mme Philistine ekopde ete ke ema eyet David enim ke edidem Israel, kpukpru mme Philistine edɔk ekeyom David; ndien ke ini David okopde, enye ɔsuhɔre aka ke ɔkpɔsɔŋ ebiet oro.

¹⁸ Ndien mme Philistine edi ediyɔhɔ ke itihere Rephaim.

¹⁹ Ndien David obup Jehovah, ete, Nte ndɔk ŋka ekɔŋ ye mme Philistine? Nte afo edida mmɔ esin mi ke ubɔk? Ndien Jehovah ɔdɔhɔ David, ete, Dɔk: koro mmenditreke ndida mme Philistine nsin fi ke ubɔk.

²⁰ Ekem David aka ke Baal-perazim, David onyuŋ asuan mmɔ do, onyuŋ ɔdɔhɔ ete, Jehovah ama ebem mi iso obumere mme asua mi, kpa nte mmɔŋ obumerede ɔwɔrɔ. Mmɔdo enye osiode ebiet oro enyiŋ Baal-perazim.

²¹ Mmɔ enyuŋ ekpɔŋ mbiet abasi mmɔ do, ndien David ye ikɔt esie etaŋ mmɔ efep.

²² Ekem mme Philistine etɔŋɔ ntak edɔk ediyɔhɔ ke ebedeŋ mme Rephaim.

²³ Ndien ke ini David obupde Jehovah, enye ɔdɔhɔ ete, Kudɔk; wɔŋɔre ke edem mmɔ, kosim mmɔ ke edem eto mulberry.

²⁴ Ama ekem, ke ini afo okopde uyom ikpat ke mbuot eto mulberry, men idem ndien; koro ke ini oro ke Jehovah edibem fi iso ɔwɔrɔ akasuan nna-ekɔŋ mme Philistine.

²⁵ Ndien David anam ntre, kpa nte Jehovah eketemede enye; ndien enye asuan mme Philistine ɔtɔŋɔde ke Geba tutu osim ke Gezer.