2 CHRONICLES 9 - Edisana ñwed Abasi Ibom

Ɔbɔŋ Aŋwan Sheba Edise Edidem Solomon

¹ EKEM ɔbɔŋ-aŋwan Sheba okop etop Solomon, ndien enye adaha aka ke Jerusalem ndidomo Solomon ke ŋke, asaŋa ye ata akamba udim, ye camel eke ebiomde ufuɔŋkpɔ, ye ata ediwak gold, ye itiat eke esɔŋde urua: ndien adaŋemi enye osimde ɔtɔ Solomon, enye ada kpukpru se idude enye ke esit, eneme ye enye.

² Ndien Solomon asiak kpukpru ikɔ esie ɔnɔ enye: baba ikɔ kiet idibeke Solomon eke enye misiakke inɔ enye.

³ Ndien ɔbɔŋ-aŋwan Sheba okut ifiɔk Solomon, ye ufɔk oro enye ɔkɔbɔpde,

⁴ ye udia okpokoro esie, ye itie ikɔt esie, ye idaha mme asaŋutom esie, ye edisine-ŋkpɔ mmɔ; ye mme andikama wine esie, ye edisine-ŋkpɔ mmɔ; ye udigukot esie, emi enye ɔdɔkde ke ufɔk Jehovah; ndien ukpɔŋ akpa enye ke idem.

⁵ Ndien enye ɔdɔhɔ edidem, ete, Se ŋkokopde ke edem nnyin, ebaŋa ikɔ fo ye ifiɔk fo, edi akapanikɔ:

⁶ edi ŋkenimke inɔ mmɔ ke akpanikɔ tutu ndidi, enyin mi emenyuŋ ekut; ndien, sese, iketiŋke baba ubak akwa ifiɔk fo emi inɔ mi: afo emebe etop oro ŋkokopde.

⁷ Ɔfɔfɔn ɔnɔ mbio fo, onyuŋ ɔfɔn ɔnɔ ikɔt fo, emi edade ke iso fo kpukpru ini, enyuŋ ekop ifiɔk fo.

⁸ Etoro Jehovah Abasi fo, emi amade fi, onyuŋ odori fi ke ebekpo esie, nte edidem Jehovah Abasi fo: koro Abasi fo amade Israel ke erinam mmɔ esɔŋ eda ke nsinsi, oro esin enye onim fi ke edidem mmɔ, man afo ekpe ikpe eke enende nen.

⁹ Ndien enye ɔnɔ edidem talent gold ikie ye edip, ye ata ediwak ufuɔŋkpɔ, ye nsɔŋ-urua itiat: ndien oruk ufuɔŋ-ŋkpɔ nte oro ɔbɔŋ-aŋwan Sheba ɔnɔde Solomon iduhe.

¹⁰ Ndien ŋko ikɔt Huram ye ikɔt Solomon, emi edade gold ke Ophir edi, eda eto algum, ye nsɔŋ-urua itiat, edi.

¹¹ Ndien edidem ada eto algum oro, anam udigukot ke ufɔk Jehovah, ye ke ufɔk edidem, ye harp, ye psaltery, ɔnɔ mbon-ikwɔ: akananam ikwe oruk oro ke isɔŋ Judah.

¹² Ndien edidem Solomon ɔnɔ ɔbɔŋ-aŋwan Sheba kpukpru se inemde enye esit, eke enye ebeŋede, ɔkɔrɔ ke se enye adade ɔsɔk edidem. Ndien enye asaŋa ye ikɔt esie ɔnyɔŋ ke edem mmɔ.

¹³ Ndien udobi gold emi osimde Solomon ke isua kiet edi talent gold ikie itiokiet, ye ata, ye itiokiet;

¹⁴ ɔkɔrɔ ke se mbon urua, ye mbon mbubine ekam edade edi. Kpukpru mbɔŋ Arabia, ye mme andikara mme idut ekam enyuŋ eda gold ye silver esɔk Solomon.

¹⁵ Ndien edidem Solomon odom gold anam otu-ekɔŋ ikie iba; shekel edidom gold ikie itiokiet eduk ke otu-ekɔŋ kiet.

¹⁶ Enye onyuŋ odom gold anam ŋkpri otu-ekɔŋ ikie ita: shekel gold ikie ita eduk ke otu kiet. Ndien edidem emen mmɔ onim ke ufɔk akai Lebanon.

¹⁷ Edidem onyuŋ anam akwa ebekpo ke oduk-enin, onyuŋ ada edisana gold ofuk enye.

¹⁸ Ebekpo oro enyene udigukot itiokiet, ye udorukot o-gold, eke emumde ebekpo, ye ubɔk ke edem mbiba ke ebiet emi etiede lion iba enyuŋ eda ke ŋkaŋ ubɔk oro.

¹⁹ Lion duopeba enyuŋ eda do ke udigukot itiokiet ke edem mbiba; akanam inamke oruk emi ke baba idut kiet.

²⁰ Ndien kpukpru uŋwɔŋ-ŋkpɔ edidem Solomon edi gold, kpukpru ŋkpɔ nduŋ ufɔk akai Lebanon enyuŋ edi edisana gold; silver iduhe; ibatke enye ke ŋkpɔ ke eyo Solomon.

²¹ Koro ubom edidem akade Tarshish ye ikɔt Huram: mme ubom Tarshish edi ini kiet ke isua ita, ini kiet ke isua ita, ebiom gold, ye silver ye oduk-enin, ye ebɔk, ye mme peacock.

²² Ntem ke edidem Solomon okpon akan kpukpru ndidem ererimbot ke inyene, ye ke ifiɔk.

²³ Kpukpru ndidem ererimbot enyuŋ eyom iso Solomon, ete ikop ifiɔk esie, eke Abasi ekesinde enye ke esit.

²⁴ Ndien kpukpru mmɔ enyuŋ eda enɔ mmɔ edi, ŋkpɔ silver, ye ŋkpɔ gold ye edisine-ŋkpɔ, ye ŋkpɔ-ekɔŋ, ye ufuɔŋkpɔ, ye horse, ye mule, ibat nte esiakde ke isua ke isua.

²⁵ Solomon onyuŋ enyene tɔsin ufɔk horse ye chariot ke itie inaŋ, ye tɔsin mbon horse duopeba; ndien enye onim ubak mmɔ ke mme obio chariot, ye ubak ke Jerusalem ke ɔtɔ edidem.

²⁶ Enye onyuŋ akara kpukpru ndidem, ɔtɔŋɔde ke Akpa tutu osim ke isɔŋ mme Philistine, ye ke adaŋa Egypt.

²⁷ Ndien edidem anam silver etie ke Jerusalem nte itiat, onyuŋ anam cedar awak nte sycomore emi edude ke una-isɔŋ edem inyaŋ.

²⁸ Mmɔ enyuŋ eda horse ke Egypt, ye ke kpukpru mme idut, edisɔk Solomon.

²⁹ Ndien ama edi ikɔ Solomon emi esuhɔde, mbemiso ye akpatre, nte ikewetke mmɔ isin ke ŋwed Nathan prophet, ye ke ŋwed prophecy Ahijah Shilonite, ye ke ŋkukut Iddo okut-ŋkukut emi ebaŋade Jeroboam eyen Nebat?

³⁰ Ndien Solomon edi edidem ofuri Israel ke Jerusalem ke isua aba.

³¹ Ekem Solomon ɔsuhɔre ana ye mme ete esie ede, ndien ebuk enye ke obio David ete esie: ndien Rehoboam eyen esie ada ubɔŋ ke itie esie.