2 CHRONICLES 8 - Edisana ñwed Abasi Ibom

Mme Ikpɔ Utom Efen Emi Edidem Solomon Akanamde

¹ EDIKEM ke utit isua edip nte Solomon ɔkɔbɔp ufɔk Jehovah, ye ufɔk esiemɔ,

² ndien Solomon ɔdiɔŋ mme obio oro Huram akayakde ɔnɔ Solomon, onyuŋ anam nditɔ Israel eduŋ do.

³ Ndien Solomon aka ke Hamath-zobah, onyuŋ akan enye.

⁴ Enye onyuŋ ɔbɔp Tadmor ke wilderness, ye kpukpru obio unim-ŋkpɔ emi enye ɔbɔpde ke Hamath.

⁵ Enye onyuŋ ɔdiɔŋ Beth-horon ke enyɔŋ, ye Beth-horon ke usuhɔre, obio eke ibibene, ye mme itim, ye eto usin-usuŋ esɔŋde;

⁶ ye Baalath, ye kpukpru obio unim-ŋkpɔ oro Solomon enyenede, ye kpukpru obio mme chariot, ye obio mbon horse, ye kpukpru udɔŋ eke ɔdɔŋde Solomon ndibɔp ke Jerusalem, ye ke Lebanon, ye ke ofuri isɔŋ emi enye akarade.

⁷ Ama edi kpukpru mme Hittite, ye mme Amorite, ye mme Perizzite, ye mme Hivite, ye mme Jebusite emi esuhɔde, emi midige Israel,

⁸ emi edide nditɔ mmɔ eke ekesuhɔde mmɔ ke edem ke isɔŋ, emi nditɔ Israel mikesoboke, mmɔ ke Solomon ada onim ke mbon-utomo, tutu osim mfin emi.

⁹ Edi Solomon inimke nditɔ Israel ke ifin unam utom: edi mmɔ edi mbon-ekɔŋ, ye mme etubom mme andikpeme enye, ye mme etubom mme chariot esie, ye mbio mme horse esie.

¹⁰ Ndien mme mmɔ emi edi mme etubom mme adidaha emi edidem Solomon enyenede, owo ikie iba ye aba ye duop, emi esede mbon-utom.

¹¹ Ekem Solomon ada eyen Pharoah aŋwan ke obio David ɔdɔk ke ufɔk emi ɔkɔbɔpde ɔnɔ enye: koro enye ɔdɔhɔde, ete, Ŋwan mi ididuŋke ke ufɔk David edidem Israel: koro ebiet emi ekebe Jehovah okodukde ke esit, edide edisana.

¹² Ndien Solomon awa edifɔp uwa ɔnɔ Jehovah ke enyɔŋ itie-uwa Jehovah oro enye ɔkɔdiɔkde ke iso etehe,

¹³ nte ibat kpukpru usen asaŋade, ke awa nte ibet Moses asaŋade, ke mme sabbath, ye ke mbufa ɔfiɔŋ, ye ke ini eke edoride, utim ikata ke isua, ke isua, ke usɔrɔ uyo eke leaven miduhe, ye ke usɔrɔ mme urua, ye ke usɔrɔ mme ataya.

¹⁴ Ndien enye ada ido David ete esie, onim mme ŋka oku ke itie-unam-ŋkpɔ mmɔ, ye mme Levite ke itie-ukpeme mmɔ, man mmɔ etoro, enyuŋ esaŋa utom ke iso mme oku, kpa nte ŋkpɔ kpukpru usen asaŋade; ye mme itie-usuŋ ke ŋka mmɔ, ke kpukpru inua-otop: koro ntem ke David owo Abasi eketeme.

¹⁵ Ndien mmɔ ikpɔŋke item emi edidem eketemede mme oku, ye mme Levite, abaŋa kpukpru ŋkpɔ, ye ŋkpɔ-uto.

¹⁶ Ntre ke eketim ofuri usɔ Solomon tutu osim usen emi etɔŋɔde ndibɔp ufɔk Jehovah, ye ini emi emade enye, tutu ufɔk Jehovah okure.

¹⁷ Ekem Solomon aka ke Ezion-geber ye ke Eloth, ke mben inyaŋ ke isɔŋ Edom.

¹⁸ Ndien Huram ada ubom ye ifin eke efiɔkde inyaŋ, ɔnɔ ikɔt esie ke ubɔk, ete esɔk Solomon; ndien mmɔ etiene ikɔt Solomon eka Ophir, ekeda talent gold ikie inaŋ ye aba ye duop do, edisɔk Solomon edidem.