2 CHRONICLES 5 - Edisana ñwed Abasi Ibom

Edidem Solomon Emen Ekebe Ediomi Jehohah Ekenim ke Temple

¹ NTEM ke ofuri utom ufɔk Jehovah emi Solomon akanamde okure: ndien Solomon emen edisana ŋkpɔ David ete esie oduk: enye onyuŋ ada silver, ye gold, ye kpukpru mkpoduoho, esin ke ebiet unim-ŋkpɔ uto ufɔk Abasi.

² Ekem Solomon owuk mme ebio-owo Israel, ye kpukpru mbuot mme esien, kpa mbɔŋ mme ete nditɔ Israel, ete ebono ke Jerusalem, man ekemen ekebe ediomi Jehovah ke obio David, emi edide Zion, edɔk.

³ Ndien kpukpru nditɔ Israel ebono ke ɔtɔ edidem, ke usɔrɔ emi odude ke ɔyɔhɔ ɔfiɔŋ itiaba.

⁴ Kpukpru mbiowo Israel enyuŋ edi: mme Levite enyuŋ emen ekebe oro.

⁵ Ntre ke mmɔ emen ekebe ye efe esop, ye kpukpru edisana ŋkpɔ emi edude ke efe, edɔk; mme mmɔ emi ke mme oku ye mme Levite eda edɔk.

⁶ Ndien edidem Solomon ye ofuri esop Israel emi esopde ye enye ke iso ekebe oro, ewa ŋkpri ufene ye enaŋ, emi uwak mmɔ miyakke owo etiŋ minyuŋ iyakke abat.

⁷ Mme oku enyuŋ eda ekebe ediomi Jehovah eduk ke ebiet esie ke ubet-etak, kpa ata edisana ubet, enim ke idak mba mme cherubim.

⁸ Ndien mme cherubim etat mba enyan ke enyɔŋ ebiet ekebe; mme cherubim enyuŋ efuk ekebe ye esaŋ esie.

⁹ Mmɔ enyuŋ edudi mme esaŋ ebon, ndien owo ada ke iso ubet-etak okut mbuot esaŋ emi edade esim ke ekebe; edi idaha ke esien ikut mmɔ. Ndien mmɔ edu do tutu osim mfin emi.

¹⁰ Baba ŋkpɔ kiet iduhe ke ekebe, ke mibɔhɔke itiat-ŋwed iba oro Moses ekesinde ke Horeb, ke ini Jehovah odiomide ediomi ye nditɔ Israel, adaŋemi mmɔ eketode ke Egypt.

¹¹ Edikem ke ini mme oku etode ke edisana ubet ewɔrɔ: (koro kpukpru oku eke edude do, ekenamde idem mmɔ esana, inyeneke ndinim ŋka:

¹² mme Levite ŋko eke ekwɔde ikwɔ, kpukpru mmɔ, ye Asaph, ye Heman, ye Jeduthun, ye nditɔ mmɔ, ye nditɔ-ete mmɔ esine eti linen, ekama cymbal, ye psaltery, ye harp, eda ke edem usiaha-utin itie-uwa, oku ikie ye edip enyuŋ edu ye mmɔ, efuri ukorowo):

¹³ edikem adaŋemi mme andifuri ye mme andikwɔ, nte owo kiet, enamde uyom ke uyo kiet, ekɔm enyuŋ etoro Jehovah; ke ini mmɔ enyuŋ emenerede uyo edian ye ukorowo, ye cymbal, ye ŋkpɔ-ikwɔ, enyuŋ etorede Jehovah, koro enye ɔfɔnde, koro ima esie edide nsinsi: ndien obubit enyɔŋ ɔyɔhɔ ke ufɔk, kpa ufɔk Jehovah.

¹⁴ Ndien obubit enyɔŋ oro iyakke mme oku eda enam ŋkpɔ: koro ubɔŋ Jehovah ɔyɔhɔde ke ufɔk Abasi.