2 CHRONICLES 16 - Edisana ñwed Abasi Ibom

Ediade Asa Anam Ediomi ye Edidem Benhadad

¹ KE ɔyɔhɔ isua Asa edip ye efurekiet, Baasha edidem Israel ɔdɔk edi ekɔŋ ye Judah, ndien enye ɔdiɔŋ Ramah, man okuyak owo ɔwɔrɔ onyuŋ oduk etiene Asa edidem Judah.

² Ndien asa osio silver ye gold ke unim-ŋkpɔ ufɔk Jehovah, ye eke ufɔk edidem, ɔnɔ esɔk Ben-hadad edidem Syria, emi oduŋde ke Damascus, ete,

³ Ediomi odu ke ufɔt ami ye afo, ye ke ufɔt ete mi ye usɔ; sese, mmɔnɔ silver ye gold esɔk fi; ka kabiat ediomi fo ye Baasha edidem Israel man enye ɔdɔk ɔkpɔŋ mi.

⁴ Ndien Ben-hadad okop uyo edidem Asa, onyuŋ ɔdɔŋ mme etubom udim-ekɔŋ esie, ete eka ekɔŋ ye mme obio Israel; ndien mmɔ esuan Ijon, ye Dan, ye Abel-maim, ye kpukpru obio-unim-ŋkpɔ ke Naphtali.

⁵ Ekem ke ini Baasha okopde, enye etre ndidiɔŋ Ramah, onyuŋ odop uyo esie.

⁶ Ndien Asa edidem ada ofuri Judah edi; ndien mmɔ ebiom itiat Ramah, ye eto esie, emi Baasha akadade ɔbɔp; ndien enye ada mmɔ ɔbɔp Geba ye Mizpah.

⁷ Ekem ke ini oro Hanani okut-ŋkukut edi ke ɔtɔ Asa edidem Judah, edidɔhɔ enye, ete, Koro afo ɔbuɔtde idem fo ye edidem Syria, ndien mubuɔtke idem fo ye Jehovah Abasi fo, mmɔdo udim-ekɔŋ edidem Syria ɔmɔbɔhɔ fi ke ubɔk.

⁸ Nte mme Ethiopian ye mme Libian ikedige akwa udim, ke chariot ye mbon-horse ata ediwak eti-eti? Ndien koro afo ɔkɔbuɔtde idem fo ye Jehovah, enye ada mmɔ esin fi ke ubɔk.

⁹ Koro enyin Jehovah esaŋade ke ofuri ererimbot, ete isɔŋɔ imum mmɔ eke ofuri esit mmɔ odude ye enye ikama. Afo amanam ndisime ke ŋkpɔ emi; koro toto ke ini emi afo eyenyene ekɔŋ.

¹⁰ Ndien Asa ayat esit ye okut-ŋkukut oro, onyuŋ esin enye ke ufɔk ebuka; koro enye akpahade esit ye enye abaŋa ŋkpɔ emi. Asa onyuŋ otuk ndusuk mbio-obio suk ini oro.

¹¹ Ndien, sese, ikɔ Asa mbem-iso ye akpatre, sese, ekewet mmɔ esin ke ŋwed ndidem Judah ye Israel.

¹² Ekem ke ɔyɔhɔ isua ubɔŋ esie edip ye efurenaŋ, udɔŋɔ anam Asa ke ukot esie, tutu udɔŋɔ esie ɔsɔŋ eti: edi ke udɔŋɔ esie, enye ibineke Jehovah, edi ebine mbia-ibɔk.

¹³ Ekem Asa ɔsuhɔre ana ye mme ete esie ede, ndien akpa ke ɔyɔhɔ isua ubɔŋ esie aba ye kiet.

¹⁴ Ndien mmɔ ebuk enye ke udi esiemɔ, emi enye okotibide ɔnɔ idem esie ke obio David, enyuŋ enim enye ke bed emi kpukpru oruk ufuɔŋkpɔ abuahade ke usɔ ubuak-ufuɔŋkpɔ ɔyɔhɔde ke esit; ndien mmɔ efɔp ŋkpɔ eti-eti enɔ enye.