2 CHRONICLES 11 - Edisana ñwed Abasi Ibom

Edidem Rehoboam Ɔbɔp Ibibene Esin Judah ye Benjamin

¹ EKEM Rehoboam edi ke Jerusalem, edibon ufɔk Judah ye Benjamin, tɔsin edimek mbon-ekɔŋ itie ikie ye anaŋ, ete eŋwana ekɔŋ ye Israel, man eda ubɔŋ efiak enɔ Rehoboam.

² Edi uyo Jehovah osim Shemaiah owo Abasi, ete,

³ Dɔhɔ Rehoboam eyen Solomon, edidem Judah, ye ofuri Israel ke Judah, ye ke Benjamin, ete, Ntem ke Jehovah ɔdɔhɔ ete,

⁴ Mbufo ekudɔk, ekunyuŋ eŋwana ekɔŋ ye nditɔ-ete mbufo: yak kpukpru owo efiak ke ufɔk mmɔ: koro ŋkpɔ emi otode mi. Ndien mmɔ ekop uyo Jehovah, enyuŋ efiak, ikaha aba ekɔŋ ye Jeroboam.

⁵ Ndien Rehoboam oduŋ ke Jerusalem, onyuŋ ɔdiɔŋ obio ibibene ke Judah.

⁶ Ntre ke enye ɔdiɔŋ Beth-lehem, ye Etam, ye Tekoa,

⁷ ye Beth-zur, ye Soco, ye

⁸ Adullam, ye Gath, ye Mareshah, ye

⁹ Ziph, ye Adoraim, Lachish, ye

¹⁰ Azekah, ye Zorah, ye Aijalon, ye Hebron, obio ibibene emi edude ke Judah ye Benjamin.

¹¹ Enye onyuŋ ɔdiɔŋ mkpɔsɔŋ obio, onyuŋ onim mme etubom ke esit, ye ediwak udia, ye aran, ye wine.

¹² Onyuŋ onim otu-ekɔŋ ye eduat ke kpukpru obio, anam mmɔ esɔŋ eti-eti. Ndien Judah ye Ben-jamin eda ye enye.

¹³ Ndien mme oku ye mme Levite emi edude ke ofuri Israel, eto ke kpukpru adaŋa mmɔ editiene enye.

¹⁴ Koro mme Levite ekpɔŋde mben-isɔŋ obio mmɔ, ye udeme mmɔ, edi ke Judah ye Jerusalem: koro Jeroboam ye nditɔ esie ekebinde mmɔ ke itie oku Jehovah efep:

¹⁵ ndien enye ke idem esie onim oku ɔnɔ edikoŋ ebiet, ye okpo-ebot, ye nditɔ-enaŋ oro enye akanamde.

¹⁶ Ndien mme mmɔ eke enimde esit mmɔ eyom Jehovah Abasi Israel, etiene mmɔ ke edem, eto ke kpukpru esien Israel, edi ke Jerusalem ndiwa uwa nnɔ Jehovah Abasi mme ete mmɔ.

¹⁷ Ntre ke mmɔ emum ubɔŋ Judah ekama, enyuŋ enam Rehoboam eyen Solomon ɔsɔŋɔ ke isua ita: koro mmɔ esaŋade ke usuŋ David ye eke Solomon ke isua ita.

¹⁸ Ekem Rehoboam ada Mahalath eyen Jerimoth eyen David, ye Abihail eyen Eliab, eyen Jesse, ɔdɔ;

¹⁹ ndien enye aman nditɔ ɔnɔ enye: Jeush, ye Shemariah, ye Zaham.

²⁰ Enye onyuŋ ɔdɔ Maacah eyen Absalom, ɔkɔrɔ ye enye eken; ndien enye aman Abijah, ye Attai, ye Ziza, ye Shelomith ɔnɔ enye.

²¹ Rehoboam onyuŋ ama Maacah eyen Abasalom akan kpukpru iban esie, ye iban-esa esie: (koro enye ɔdɔde iban efureta, ye iban-esa ata; onyuŋ obon nditɔ-iren edip ye itiaita, ye nditɔ-iban ata.)

²² Ndien Rehoboam onim Abijah eyen Maacah ke etubom, man enye edi akpa owo ke otu nditɔ-ete esie: koro oyomde ndinim enye ke edidem.

²³ Enye onyuŋ anam asian-asian, asuan kpukpru nditɔ-iren esie onim ke ofuri isɔŋ Judah, ye Benjamin, ke kpukpru mkpɔsɔŋ obio: onyuŋ ɔnɔ mmɔ ediwak udia. Enye onyuŋ oyom ediwak iban.