1 ŊWED CORINTH 4 - Edisana ñwed Abasi Ibom

Mme Akama Ukpɔhɔre Ndibe Ŋkpɔ Abasi

¹ YAK owo abat nnyin ntem, ete nnyin idi mme anam-utom Christ ye mme akama-ukpɔhɔre ndibe-ŋkpɔ Abasi.

² Ŋkɔm owo eyom ete mme akama-ukpɔhɔre edi mme anam-akpanikɔ.

³ Edi idige mi baba ŋkpɔ kiet mbufo ndidomo mi, mme owo ekededi ndidomo idem mi.

⁴ Mfiɔkke ŋkpɔ eke obiomde mi, edi oro itebeke mi ikpe.

⁵ Andidomo mi edi Ɔbɔŋ. Mmɔdo ekuben ini iso ebiere ikɔ, tutu Ɔbɔŋ edi: Enye eyeda se idibede ke ekim ɔwɔrɔ edi ke uŋwana, onyuŋ ayarare uduak eke esinede owo ke esit. Adaŋoro ndien ke kpukpru owo kiet kiet edibɔ itoro ke ubɔk Abasi.

⁶ Nditɔ-ete mi, mma nsio ikɔ emi nte ŋke, ntiŋ ndian idem mi ye Apollos, kabaŋa ufɔn mbufo; man mbufo eda nnyin ekpep se ikɔ emi ɔdɔhɔde ete, Kunam ŋkpɔ ube se ekewetde, ɔwɔrɔde; man mbufo ekunyuŋ ekohore idem, eda ye andikpep kiet, eŋwana ye andikpep eken.

⁷ Koro anie anam fi ɔkpuhɔre ye owo eŋwen? Nso ŋkpɔ ke onyuŋ enyene eke mukɔbɔhɔ bɔ? Ndien edieke ɔkɔbɔde bɔ, nsinam oburede mbure nte ŋkpɔ eke mukɔbɔhɔ.

⁸ Ke emi mbufo emɔyuhɔ; emakabare mbon inyene ke emi; emada ubɔŋ ke ini nnyin miduhe aba ye mbufo; mbufo ekpekam eda ubɔŋ ke akpanikɔ, man nnyin ŋko ikpetiene mbufo ida ubɔŋ.

⁹ Koro osuk etie mi nte Abasi okosiode nnyin, mme apostle, onim nte ukperedem ndise nte owo mkpa. Koro ema enam nnyin ikabare idi ŋkpɔ ndise inɔ ererimbot ye mme angel ye owo.

¹⁰ Nnyin idi ndisime kabaŋa Christ, edi mbufo edi mme enyene-ibuot owo ke Christ; nnyin idi mmeme, edi mbufo emokop idem; mbufo enyene ukpono, edi nnyin idia esuene.

¹¹ Tutu osim idahemi nnyin ke ikop biɔŋ ye nsat-itɔŋ ye tuep; mme owo ke etuai nnyin; nnyin inyuŋ inyeneke iwuk ebiet iduŋ; nnyin ke ikpa utom, inam utom ke ubɔk nnyin.

¹² Ke ini owo esuŋide nnyin, nnyin idiɔŋ mmɔ; ke ini ekɔbɔde nnyin, nnyin ime ime;

¹³ ke ini ebiatde nnyin enyiŋ, nnyin isuk ikpe ye owo. Nnyin imakabare itie nte ndek-ndek ŋkpɔ ke ererimbot, ye nte ndisɔi ŋkpɔ, tutu osim mfin emi.

¹⁴ Idige ndisuene mbufo ke ŋwet ntem, edi man nnɔ mbufo item, nte ndima nditɔ mi.

¹⁵ Koro mbufo ekpenyenyene mme andikpep thousand duop ke Christ, mbufo inyeneke ediwak ete; koro edi ami ŋkada gospel mbon mbufo ke Christ Jesus.

¹⁶ Mmekpe ye mbufo ndien, nte mbufo edi mme andikpebe mi.

¹⁷ Ke ntak emi mmosio Timothy ndɔŋ ke ɔtɔ mbufo. Enye edi edima eyen mi, emi anamde akpanikɔ ye Ɔbɔŋ: enye eyenyuŋ anam mbufo eti mme edu mi emi edude ke Christ, kpa se ŋkpepde kpukpru mme ufɔk Abasi ke kpukpru ebiet.

¹⁸ Edi ndusuk owo ke otu mbufo ekohore idem, nte mme nditiene mbufo ke idem mi.

¹⁹ Edi nyewara ndi ke ɔtɔ mbufo, edieke Ɔbɔŋ amade, ndien nyefiɔk odudu mbon ŋkohore-idem, idige ndutiŋ mmɔ.

²⁰ Koro Ubɔŋ Abasi isaŋake ke ndutiŋ, edi asaŋa ke odudu.

²¹ Ewe ke mbufo eyom? ete, nsaŋa ye ikpa ntiene mbufo, me nsaŋa ke ima ye spirit emi ofurede?