1 CHRONICLES 29 - Edisana ñwed Abasi Ibom

Mme Enɔ Emi ekenɔde Ndida Mbɔp Temple

¹ EKEM David edidem ɔdɔhɔ ofuri esop, ete, Solomon eyen mi, emi Abasi emekde ikpɔŋ-ikpɔŋ, edi eyenɔwɔŋ, onyuŋ esehe, ndien utom oro omokpon: koro temple emi midige eke owo, edi enyene Jehovah Abasi.

² Mma nnyuŋ nda ofuri ukeme mi ntim ŋkpɔ nnim nnɔ ufɔk Abasi mi, gold ke eke gold, ye silver ke eke silver, ye okpoho ke eke okpoho, ye ukwak ke eke ukwak, ye eto ke eke eto; itiat onyx, ye itiat eke esinde, ye edisem itiat, ye ŋwed-nwed itiat, ye kpukpru oruk ɔsɔŋ-urua itiat, ye itiat marble ediwak.

³ Ndien ŋko, koro mmade ufɔk Abasi mi, mmenyene gold ye silver eke edide okimmɔ, nda nnɔ ufɔk Abasi mi, ŋkɔrɔ ye kpukpru se ŋketimde nnɔ edisana ufɔk.

⁴ Kpa tɔsin talent gold ita emi otode ke gold Ophir, ye tɔsin talent eti silver itiaba eke edidade efuk ibibene ufɔk:

⁵ gold ke eke gold, ye silver ke eke silver, ye ke kpukpru oruk utom ke ubɔk mbon-usɔ. Anie ndien omonyime ndiyɔhɔ ubɔk esie mfin emi nnɔ Jehovah?

⁶ Ndien mme etubom mme ete, ye mbɔŋ esien Israel, ye mbɔŋ mme tɔsin, ye mbɔŋ mme ikie, ye mbɔŋ utom edidem, etat ubɔk enɔ.

⁷ Ntre ke mmɔ eda tɔsin talent gold ition, ye tɔsin daric duop, ye tɔsin talent silver duop, ye tɔsin talent okpoho itie efureta, ye tɔsin talent ukwak itie ikie, enɔ ke utom ufɔk Abasi.

⁸ Ndien mmɔ eke enyenede itiat, eda mmɔ esin ke ebiet unim ŋkpɔ ufɔk Jehovah, esin Jehiel Gershonite ke ubɔk.

⁹ Ndien kpukpru owo edat esit, koro mmɔ etatde ubɔk: koro mmɔ etatde ubɔk enɔ Jehovah ke ofuri esit: David edidem ŋko onyuŋ adat esit eti-eti.

¹⁰ Ndien David ɔkɔm Jehovah ke iso ofuri esop; David onyuŋ ɔdɔhɔ, ete, Ekɔm fi, Jehovah Abasi Israel ete nnyin, ke nsinsi-nsinsi.

¹¹ O Jehovah, ubom, ye odudu, ye ubɔŋ, ye akakan, ye uteŋe edi okuomɔ: koro kpukpru ŋkpɔ ke enyɔŋ ye ke isɔŋ emenyene fi; O Jehovah, itie edidem edi okuo, afo onyuŋ okoŋ nte etubom kpukpru.

¹² Inyene ye ukpono eto fi ke iso, afo onyuŋ edi andikara kpukpru: odudu ye uko enyuŋ edu fi ke ubɔk; onyuŋ enyene fi ndinam kpukpru ekpon enyuŋ esɔŋ.

¹³ Nnyin imɔkɔm fi, ndien, O Abasi nnyin, inyuŋ itoro enyiŋ ubɔŋ fo.

¹⁴ Edi ami ndi anie, ikɔt mi enyuŋ edi mme anie, eke nnyin ikemede nditat ubɔk ntem? Ŋkɔm kpukpru ŋkpɔ eto fi, nnyin inyuŋ inɔ fi se itode fi ke ubɔk.

¹⁵ Ŋkɔm nnyin idi isen owo ke iso fo, ye oduduŋ ke iso fo, nte kpukpru mme ete nnyin: mme usen nnyin ke isɔŋ ebiet mfut, idorenyin inyuŋ iduhe.

¹⁶ O Jehovah Abasi nnyin, kpukpru ekese ŋkpɔ emi nnyin itimde ndibɔp ufɔk nnɔ fi ye edisana enyiŋ fo, eto fi ke ubɔk, kpukpru enyuŋ edi okuomɔ.

¹⁷ Mmonyuŋ mfiɔk, O Abasi mi, nte afo odomode esit, onyuŋ amade mmɔ eke enende. Ami ŋkatat ubɔk mi nnɔ kpukpru ŋkpɔ emi ke edinen esit: ndien ke emi ke ndat esit ndikut ikɔt fo emi edude mi, nte etatde ubɔk enɔ fi,

¹⁸ O Jehovah Abasi Abraham, ye eke Isaac, ye eke Israel, mme ete nnyin, nim emi ke nsinsi ke se ekikere esit ikɔt fo ebotde, nyuŋ nam esit mmɔ enen ye afo:

¹⁹ nyuŋ nɔ Solomon eyen mi esit kiet, man enye onim ibet fo, ye ido fo, ye mme ewuhɔ fo, onyuŋ anam kpukpru, onyuŋ ɔbɔp temple emi ntimde ŋkpɔ mbeŋe.

²⁰ Ndien David ɔdɔhɔ ofuri esop oro, ete, Mbufo, ndien etoro Jehovah Abasi mbufo. Ndien ofuri esop oro etoro Jehovah Abasi mme ete mmɔ, enyuŋ enuhɔ, etuak ibuot enɔ Jehovah, ye edidem.

²¹ Ndien mmɔ ewa uwa emem enɔ Jehovah, enyuŋ efɔp edifɔp uwa enɔ Jehovah, ke edem, usen oro, kpa tɔsin enaŋ, ye tɔsin okukim erɔŋ, ye tɔsin nditɔ-erɔŋ, ye edi-ŋwɔŋ uwa mmɔ, ye uwa ediwak, enɔ ofuri Israel;

²² mmɔ enyuŋ edia ŋkpɔ enyuŋ eŋwɔŋ ke iso Jehovah, ke usen oro ke akwa idaresit: mmɔ enyuŋ etɔŋɔ ntak enim Solomon eyen David ke edidem, enyuŋ eyet enye aran enɔ Jehovah enim ke ɔbɔŋ, enyuŋ enim Zadok ke oku.

²³ Ekem Solomon ɔsuhɔre etie ke ebekpo Jehovah nte edidem, ke itie David ete esiemɔ, onyuŋ oforo; ndien ofuri Israel ekop uyo esie.

²⁴ Ndien kpukpru mbɔŋ, ye mbon-uko, ye kpukpru nditɔ edidem David nde, ewuk ubɔk enɔ Solomon edidem.

²⁵ Ndien Jehovah anam Solomon okpon eti-eti ke iso ofuri Israel, onyuŋ ɔnɔ enye oruk ubɔŋ itie edidem eke akananam midoroke baba edidem Israel kiet eke ekebemde enye iso.

²⁶ Ntem ke David eyen Jesse akada ubɔŋ ofuri Israel.

²⁷ Ndien ini emi enye akadade ubɔŋ Israel, edi isua aba; ada ubɔŋ ke Hebron ke isua itiaba, onyuŋ ada ubɔŋ ke Jerusalem ke isua edip ye duopeta.

²⁸ Enye onyuŋ akpa ke eti usɔŋ ɔyuhɔ usen, ye inyene, ye ukpono; ndien Solomon eyen esie ada ubɔŋ ke itie esie.

²⁹ Ndien ama edi ikɔ David edidem akpa ye akpatre, sese, ewet mmɔ esin ke ŋwed Samuel ete-ŋkukut, ye ke ŋwed Nathan prophet, ye ke ŋwed Gad ete-ŋkukut;

³⁰ ye ofuri ubɔŋ esie, ye uko esie, ye ini eke ebede enye, ye Israel, ye kpukpru ndidem mme idut.