1 CHRONICLES 24 - Edisana ñwed Abasi Ibom

Mme Utom Emi Mme Oku Ekenyenede Ndinam

¹ NDIEN mme ŋka nditɔ Aaron esaŋa ntem. Nditɔ-iren Aaron; Nadab ye Abihu, Eleazar ye Ithamar.

² Ndien Nadab ye Abihu ebem ete mmɔ iso ekpa, inyuŋ ibonke nditɔ.

³ Ndien Eleazar ye Ithamar ekabare edi oku. Ndien David, ye Zadok emi otode ke nditɔ Eleazar, ye Ahimelech emi otode ke nditɔ Ithamar, ebahare mmɔ esin ke mme ŋka mmɔ enɔ utom mmɔ.

⁴ Ndien mmɔ ekut nte nditɔ Eleazar ewakde mme etubom ikpɔ owo ekan nditɔ Ithamar; ndien ntem ke ebahare mmɔ. Mmɔ eda mme etubom ufɔk mme ete efurekiet enɔ nditɔ Eleazar, enyuŋ eda mme etubom ufɔk mme ete itiaita enɔ nditɔ Ithamar.

⁵ Enyuŋ eda afia ebahare mmɔ, mme mmɔ emi ye mme mmɔ eken; koro mbɔŋ edisana efe, ye mbɔŋ Abasi etode ke nditɔ Eleazar, ye ke nditɔ Ithamar.

⁶ Ndien Shemaiah eyen Nethanel ewet ŋwed emi otode ke esien Levi, ewet mmɔ ke iso edidem, ye mbɔŋ, ye Zadok oku, ye Ahimelech eyen Abiathar, ye mme etubom mme ete mme oku ye mme Levite: ke eda ufɔk ete Eleazar kiet, enyuŋ eda eke Ithamar.

⁷ Ekem akpa afia ɔwɔrɔ Jehoiarib, udiana ɔwɔrɔ Jedaiah,

⁸ ɔyɔhɔ ita ɔwɔrɔ Harim, ɔyɔhɔ inaŋ ɔwɔrɔ Seorim,

⁹ ɔyɔhɔ ition ɔwɔrɔ Malchijah, itiokiet ɔwɔrɔ Mijamin, ɔyɔhɔ itiaba ɔwɔrɔ Hakkoz,

¹⁰ itia-ita ɔwɔrɔ Abijah,

¹¹ ɔyɔhɔ usukkiet ɔwɔrɔ Jeshua, duop ɔwɔrɔ Shecaniah,

¹² duopekiet ɔwɔrɔ Eliashib, duopeba ɔwɔrɔ Jakim,

¹³ Duopeta ɔwɔrɔ Huppah, duopenaŋ ɔwɔrɔ Jeshebead,

¹⁴ efut ɔwɔrɔ Bilgah, efurekiet ɔwɔrɔ Immer,

¹⁵ efureba ɔwɔrɔ Hezir, efureta ɔwɔrɔ Happizzez

¹⁶ pizzez efurenaŋ ɔwɔrɔ Pethahiah, edip ɔwɔrɔ Jehezkel,

¹⁷ ɔyɔhɔ edip ye kiet ɔwɔrɔ Jachin, edip ye iba ɔwɔrɔ Gamul,

¹⁸ edip ye ita ɔwɔrɔ Delaiah, edip ye inaŋ ɔwɔrɔ Maaziah.

¹⁹ Ntem ke edori mmɔ ke utom mmɔ, man eduk ke ufɔk Jehovah ke ido mmɔ, ke ubɔk Aaron ete mmɔ, kpa nte Jehovah Abasi Israel eketemede enye.

²⁰ Ndien ama edi nditɔ Levi eke esuhɔde: eke nditɔ Amram, Shubael; nditɔ Shubael, Jehdeiah.

²¹ Ama edi Rehabiah, etubom nditɔ Rehabiah edi Isshiah.

²² Eke mme Izharite, Shelomoth: eke nditɔ Shelomoth, Jahath.

²³ Eke nditɔ (Hebron) ŋko; Jeriah, Amariah udɔ, Jahaziel ududɔ Jekameam ɔyɔhɔ inaŋ.

²⁴ Eke nditɔ Uzziel, Micah; eke nditɔ Micah, Shamir.

²⁵ Eyen-ete Micah edi Isshiah: eke nditɔ Isshiah, Zechariah.

²⁶ Nditɔ Merari edi Mahli, ye Mushi: nditɔ Jaaziah; Beno.

²⁷ Nditɔ Merari, eke Jaaziah, Beno, ye Shoham, ye Zaccur, ye Ibri.

²⁸ Eleazar oto ke Mahli, edi enye ibonke eyen.

²⁹ Ama edi Kish: eyen Kish edi Jerahmeel.

³⁰ Nditɔ Mushi ŋko: Mahli, ye Eder, ye Jerimoth. Mme mmɔ emi edi nditɔ Levi nte ufɔk mme ete mmɔ esaŋade.

³¹ Mme mmɔ emi ŋko enyuŋ esin afia, kpasuk nte nditɔ-ete mmɔ, nditɔ Aaron, ke iso David edidem, ye Zadok, ye Ahimelech, ye mme etubom mme ete mme oku, ye mme Levite; akpan mme ete ekem ye ŋkpri nditɔ-ete mmɔ.