1 CHRONICLES 23 - Edisana ñwed Abasi Ibom

Edidem David Anam Ndutim Ɔnɔ mme Levites Ndinam utom ke Temple

¹ EKEM adaŋemi David ɔsɔŋde, onyuŋ ɔyuhɔde usen, enye onim Solomon eyen esie ke edidem Israel.

² Ndien enye obon kpukpru mbɔŋ Israel, ye mme oku, ye mme Levite.

³ Ndien mmɔ ebat mme Levite, ɔtɔŋɔde ke owo isua edip ye duop, ye mmɔ eke ebede oro; ndien ibat mmɔ nte ibuot mmɔ edide, iren-owo, iren-owo, edi tɔsin owo edip ye efureta.

⁴ Tɔsin edip ye inaŋ ke otu mme mmɔ emi enyene nditiŋ enyin nse utom ufɔk Jehovah; tɔsin itiokiet enyuŋ edi mme ewet ŋwed ye mme ekpe ikpe:

⁵ ndien tɔsin inaŋ edi mme etie-usuŋ; tɔsin inaŋ enyuŋ edi mme nditoro Jehovah ke ŋkpɔ emi ami (David) ŋkanamde, nte eda etoro.

⁶ Ndien David abahare mmɔ esin ke udim, nte nditɔ Levi esaŋade, kpa Gershon, ye Kohath, ye Merari.

⁷ Eke nditɔ Gershon, Ladan Ye Shimei.

⁸ Nditɔ Ladan, etubom edi Jehiel, ye Zetham, ye Joel, ita.

⁹ Nditɔ Shimei; Shelomith, ye Haziel, ye Haran, ita. Mme mmɔ emi edi mme etubom mme ete Ladan.

¹⁰ Ndien nditɔ Shimei; Jahath, ye Zina, ye Jeush, ye Beriah.

¹¹ Mbinaŋ emi edi nditɔ Shimei. Jahath onyuŋ edi etubom, Zizah onyuŋ edi udiana: edi Jeush ye Beriah ibonke ediwak nditɔ; ndien etim mmɔ esin ke ufɔk ete kiet.

¹² Nditɔ Kohath; Amram, Izhar, Hebron, ye Uzziel, Inaŋ. Nditɔ Amran; Aaron ye Moses:

¹³ ndien ekedianare Aaron, man enye ye nditɔ esie ŋko ke nsinsi ekpenam ata edisana ŋkpɔ esana, enyuŋ efɔp uwa enɔ Jehovah, enyuŋ enam ŋkpɔ esie, enyuŋ eda enyiŋ esie ediɔŋ owo ke nsinsi.

¹⁴ Ama edi Moses owo Abasi, ekot nditɔ esie edian ye esien Levi.

¹⁵ Nditɔ-iren Moses edi Gershom ye Eliezer.

¹⁶ Shebuel edi etubom nditɔ Gershom.

¹⁷ Ndien nditɔ Eliezer edi Rehabiah etubom. Edi Eliezer ibonke eyen efen; edi nditɔ Rehabiah ewak ekan.

¹⁸ Nditɔ Izhar; Shelomith, etubom.

¹⁹ Nditɔ Hebron; Jeriah, akpan, Amariah udɔ, Jahaziel ududɔ, ye Jekameam ɔyɔhɔ inaŋ.

²⁰ Nditɔ Uzziel; Micah akpan, ye Isshiah udɔ.

²¹ Nditɔ Merari; Mahli ye Mushi: nditɔ Mahi; Eleazar ye Kish.

²² Ekem Eleazar akpa, inyuŋ ibonke nditɔ-iren, edi obon nditɔ-iban; ndien nditɔ-ete mmɔ kpa nditɔ Kish, eda mmɔ edɔ.

²³ Nditɔ Mushi; Mahli, ye Eder, ye Jeremoth, ita.

²⁴ Mme mmɔ emi edi nditɔ Levi nte ufɔk mme ete mmɔ esaŋade; kpa mme etubom mme ete mmɔ, nte ibat mmɔ edide, ke ibat enyiŋ, nte ibuot mmɔ edide, eke enamde utom, enyuŋ esaŋade ŋkpɔ ufɔk Jehovah, ɔtɔŋɔde ke owo isua edip, ye mmɔ eke ebede oro.

²⁵ Koro David ɔdɔhɔde, ete, Jehovah Abasi Israel ama ɔnɔ ikɔt esie nduɔk-odudu, ndien enye eyeduŋ ke Jerusalem ke nsinsi;

²⁶ mme Levite ŋko inyeneke aba ndibiom efe iduŋ, ye kpukpru ŋkpɔ unam utom esie.

²⁷ Koro ke ukperedem ikɔ David, mmɔ oro edi ibat nditɔ-iren Levi, ɔtɔŋɔde ke owo isua edip, ye mmɔ eke ebede oro;

²⁸ koro mmɔ edade ebet nditɔ Aaron, ke erinam ŋkpɔ ufɔk Jehovah, ke okure, ye ke ubet, ye ke erinam kpukpru edisana ŋkpɔ esana, ye ke erinam utom, ye ke erisaŋa ŋkpɔ ufɔk Abasi; ye ke uyo emi ediɔŋde enim,

²⁹ ye ke edifɔn ndom-uyo inuak-udia, ye ke mfefere uyo eke leaven miduhe, ye ke erikaŋ, ye ke erifɔp, ye ke kpukpru oruk idomo ye ubom:

³⁰ ndinyuŋ nda kpukpru usenubɔk ntoro, nnyuŋ ŋkwɔ nnɔ Jehovah, ye ke mbubreyo ŋko kpa ntre;

³¹ ndinyuŋ ŋwa kpukpru edifɔp uwa nnɔ Jehovah, ke mme sabbath, ye ke mbufa ɔfiɔŋ, ye ke ini eke ekedoride, nte ibat mmɔ, ye ido mmɔ edide kpukpru ini ke iso Jehovah:

³² man mmɔ enyuŋ ekpeme ukpeme efe esop, ye ukpeme edisana ebiet, ye ukpeme nditɔ Aaron, nditɔ-ete mmɔ, ke erisaŋa ŋkpɔ ufɔk Jehovah.