1 CHRONICLES 21 - Edisana ñwed Abasi Ibom

Edidem David Abat Owo ke Israel ye ke Judah

¹ EKEM Satan adaha ke enyɔŋ ndibiat Israel, onyuŋ esin David abat Israel.

² Ndien David ɔdɔhɔ Joab ye mbɔŋ obio, ete, Mbufo eka ekebat Israel, ɔtɔŋɔde ke Beer-sheba tutu osim ke Dan; ndien eda edisɔk mi, man mfiɔk ibat mmɔ.

³ Ndien Joab ɔdɔhɔ, ete, Yak Jehovah adian ɔnɔ ikɔt esie utim ikikie akan adaŋa nte mmɔ edide: ɔbɔŋ mi edidem, nte kpukpru mmɔ itiehe nte ikɔt ɔbɔŋ mi? Nsinam ɔbɔŋ mi oyomde ŋkpɔ emi? Nsinam enye oyomde ndikabare ndi ntak isop nnɔ Israel?

⁴ Edi uyo edidem ɔsɔŋ akan Joab: ndien Joab ɔwɔrɔ akasaŋa ke ofuri Israel ndien edi ke Jerusalem.

⁵ Ekem Joab ɔnɔ David ibat mbio-obio emi ekebatde. Ndien ofuri Israel edi tɔsin owo ke itie tɔsin, ye tɔsin owo ikie eke esiode ofut: Judah enyuŋ edi tɔsin owo ke itie ikie inaŋ, ye tɔsin ata ye duop eke esiode ofut.

⁶ Edi enye ibatke Levi ye Benjamin isin ke otu mmɔ: koro Joab mimaŋa uyo edidem.

⁷ Ndien ŋkpɔ emi ɔdiɔk ke iso Abasi: mmɔdo enye amiade Israel.

⁸ Ndien David ɔdɔhɔ Abasi, ete, Mmanam idiɔk-ŋkpɔ eti-eti, koro ŋkanamde ŋkpɔ emi: edi, mbɔk, dahado ndien ke idiɔk ido owo fo: koro mmanam ndisime eti-eti.

⁹ Ndien Jehovah ɔdɔhɔ Gad okut ŋkukut David, ete,

¹⁰ Ka kɔdɔhɔ David, ete, Ntem ke Jehovah ɔdɔhɔ, ete, Mmanyan ŋkpɔ ita nnɔ fi: mek kiet ke otu mmɔ ke idem fo, man nda nnam fi.

¹¹ Ndien Gad aka ebiet David, ɔkɔdɔhɔ enye, ete, Ntem ke Jehovah ɔdɔhɔ, ete, Bɔ ke idem fo.

¹² Edide isua akaŋ ita; edide ɔfiɔŋ ita eke mme asua fo edibiatde fi, ofut mme asua fo onyuŋ osimde fi; edide usen ita eke ofut Jehovah, kpa ata idiɔk udɔŋɔ, edidude ke isɔŋ, angel Jehovah onyuŋ osobode ke ofuri adaŋa Israel. Kere, ndien, ibɔrɔ eke ndidade mfiak nsɔk andidɔŋ mi.

¹³ Ndien David ɔdɔhɔ Gad, ete, Mbaba ababa mi eti-eti: mbɔk, yak nduɔ Jehovah ke ubɔk, koro mbɔm esie awakde eti-eti: edi ŋkuduɔ owo ke ubɔk.

¹⁴ Ndien Jehovah esin idiɔk udɔŋɔ anam Israel: ndien tɔsin owo Israel ke itie ata ye duop eduɔŋɔ.

¹⁵ Abasi onyuŋ ɔdɔŋ angel esie, ete aka okosobo Jerusalem: ndien ke ini enye osobode, Jehovah ese, onyuŋ atua mkpɔfiɔk ke idiɔk-ŋkpɔ oro, onyuŋ ɔdɔhɔ angel emi osobode, ete, Ekem, suk ubɔk fo, ndien. Ndien angel Jehovah ke ada ke ebiet-ubek-ibokpot Ornan Jebusite.

¹⁶ Ndien David emenere enyin esie okut angel Jehovah, nte enye adade ke ufɔt isɔŋ ye enyɔŋ ke akama ofut afai ke ubɔk, anyan ese Jerusalem. Ndien David ye mbiowo esine ɔfɔŋ-ikpo ke idem eduɔŋɔ ke isɔŋ ekubi iso mmɔ.

¹⁷ David onyuŋ ɔdɔhɔ Abasi, ete, Nte idige ami ŋkɔdɔhɔ, nte ebat mbio-obio? Nte idige ami ŋkedue ŋko, nnyuŋ nnam idiɔk eti-eti? Edi ama edi ufene emi, nso ke mmɔ ekenam? Jehovah Abasi mi, mbɔk, da ubɔk fo dori mi ke idem, ye ufɔk ete mi; edi kudori ikɔt fo, kunyuŋ umia mmɔ ufen.

¹⁸ Ndien angel Jehovah ɔdɔhɔ Gad, ete etiŋ ɔnɔ David, ete, Yak David ɔdɔk, aka akanam itie-uwa ɔnɔ Jehovah ke ebiet-ubek-ibokpot Ornan Jebusite.

¹⁹ Ndien David ɔdɔk ekem ke uyo Gad oro enye ɔkɔdɔhɔde ke enyiŋ Jehovah.

²⁰ Ndien Ornan akabare okut angel oro; nditɔ-iren esie inaŋ ŋko eka ekedibe.

²¹ Ndien Ornan ke ebebek wheat. Ekem adaŋemi David osimde Ornan, Ornan ese, onyuŋ okut David, onyuŋ oto ke ebiet-ubek-ibokpot ɔwɔrɔ ɔkɔnuhɔ ɔnɔ David, otuk iso esie ke isɔŋ.

²² Ndien David ɔdɔhɔ Ornan, ete, Nɔ mi ebiet-ubek-ibokpot emi, man nnam itie-uwa nnɔ Jehovah ke esit: da enye nɔ mi ke ofuri ekɔm-urua: man enam idiɔk udɔŋɔ emi etre ɔkpɔŋ mbio emi.

²³ Ndien Ornan ɔdɔhɔ David, ete, Bɔ ke idem fo; yak edidem ɔbɔŋ mi onyuŋ anam se enye amade, sese, mmɔnɔ enaŋ ke edifɔp uwa, ye ŋkpɔ ubek ke ifia, ye wheat ke eke inuak-udia; nnɔnɔ kpukpru.

²⁴ Ndien edidem David ɔdɔhɔ Ornan, ete, Ih ih; yak ndep ke ofuri ekɔm-urua: koro mme ndidaha se inyenede fi nsɔk Jehovah, ndinyuŋ ŋwaha edifɔp uwa ke se mikpaha ŋkpɔ.

²⁵ Ndien David odomo udop shekel gold ikie itiokiet, ɔnɔ Ornan ke ebiet oro.

²⁶ David onyuŋ anam itie-uwa do ɔnɔ Jehovah, onyuŋ awa edifɔp uwa ye uwa emem, onyuŋ eseme ɔnɔ Jehovah; ndien enye etie ke enyɔŋ eyere enye ke ikaŋ ke itie ufɔp-uwa.

²⁷ Jehovah onyuŋ ɔdɔhɔ angel oro; ndien enye akabare ofut esie esin ke efɔk esie.

²⁸ Ke ini oro, ke David okutde ete ke Jehovah ama eyere imɔ ke ebiet-ubek-ibokpot Ornan Jebu-site, enye awa uwa do.

²⁹ Ndien ebiet-iduŋ Jehovah oro Moses akanamde ke wilderness, ye itie edifɔp-uwa edu ke ini oro ke edikoŋ ebiet ke Gibeon.

³⁰ Edi David ikwe nte akade enye ke iso, ndibup Abasi: koro ndik anamde enye abaŋa angel Jehovah.