1 CHRONICLES 20 - Edisana ñwed Abasi Ibom

Edidem David Akan Rabbah Onyuŋ Ada Enye ke Mbuot Ekɔŋ

¹ EDIKEM ke ini isua akabarede, ke ini ndidem ekam ewɔŋɔde (eka ekɔŋ), Joab ada mbon-ekɔŋ usuŋ akabiat isɔŋ nditɔ Ammon, onyuŋ aka akakan Rabbah okuk. Edi David etie ke Jerusalem. Ndien Joab asuan Rabbah, onyuŋ osobo enye.

² David onyuŋ ayarare edidem mmɔ anyanya esie ke ibuot, onyuŋ okut ete ke udobi esie edi talent gold kiet, ɔsɔŋ-urua itiat enyuŋ esine ke esit; ndien eda enye eyara David ke ibuot: enye onyuŋ ataŋ ata ediwak mbume ke obio ɔnyɔŋ.

³ Onyuŋ osio mmɔ eke edude ke esit, ɔyɔk [mmɔ] ke uyɔkŋkpɔ, ye ke mme harrow ukwak, ye ke ekudi. Ntem ke David anam ye kpukpru obio nditɔ Ammon. Ndien David ye kpukpru owo enyɔŋ ke Jerusalem.

⁴ Edikem ke ŋkpɔ oro ema ebe, ekɔŋ otibe ye mme Philistine ke Gezer; ke ini oro Sibbecai Hushathite owot Sippai emi otode ke nditɔ Rapha; ndien mmɔ emem isin.

⁵ Ekɔŋ onyuŋ ɔtɔŋɔ ntak otibe ye mme Philistine; ndien Elhanan eyen Jair owot Lahmi, eyen ete Goliath Gittite, emi eto eduat esie ebietde eto ɔdɔk-ɔfɔŋ.

⁶ Ndien ekɔŋ ɔtɔŋɔ ntak otibe ke Gath, ndien anyan owo odu do, emi enyenede nnuenubɔk ye nnuenukot itiokiet, itiokiet, edip ye inaŋ; enye onyuŋ amana ɔnɔ Rapha.

⁷ Ndien ke ini enye esinde Israel ke ndek, Jonathan eyen Shimea, eyen-eka David owot enye.

⁸ Mme mmɔ emi ekemana enɔ Rapha ke Gath; ndien mmɔ eduɔŋɔ ke ubɔk David, ye ke ubɔk ikɔt esie.