1 CHRONICLES 15 - Edisana ñwed Abasi Ibom

Edidem David Emen Ekebe Ediomi Ɔnyɔŋ Edi Jerusalem

¹ EKEM David ɔbɔp ufɔk esiemɔ ke obio David; onyuŋ otim ebiet ɔnɔ ekebe Abasi, onyuŋ owuk tent ɔnɔ enye.

² Ndien David ɔdɔhɔ, ete, Owo okubiom ekebe Abasi, ke mibɔhɔke mme Levite: koro mmɔ ke Jehovah ekemek ndibiom ekebe Abasi, ndinyuŋ nnam ŋkpɔ esie ke nsinsi.

³ Ekem David okot ofuri Israel edi ke Jerusalem, man eda ekebe Jehovah edɔk edi ke ebiet esie oro enye okotimde ɔnɔ enye.

⁴ David onyuŋ osop nditɔ Aaron ye mme Levite:

⁵ eke nditɔ Kohath; Uriel etubom, ye nditɔ-ete esie ikie ye edip:

⁶ eke nditɔ Merari, Asaiah etubom, ye nditɔ-ete esie ikie iba ye edip:

⁷ eke nditɔ Gershom; Joel etubom,

⁸ ye nditɔ-ete esie ikie ye edip ye duop: Elizaphan; Shemaiah etubom, ye nditɔ-ete esie ikie iba: nditɔ Hebron; Eliel etubom,

⁹ ye nditɔ ete esie anaŋ, nditɔ Uzziel;

¹⁰ Amminadab etubom, ye nditɔ-ete esie, ikie ye duopeba.

¹¹ Ekem David okot Zadok ye Abiathar mme oku, ye mme Levite, ye Uriel, ye Asaiah, ye Joel, ye Shemaiah, ye Eliel, ye Amminadab,

¹² onyuŋ ɔdɔhɔ mmɔ, ete, Mbufo edi mbɔŋ mme ete mme Levite: enam idem mbufo ye nditɔ-ete mbufo esana, enyuŋ eda ekebe Jehovah Abasi Israel edɔk edi ke ebiet emi ntimde nnim nnɔ enye.

¹³ Koro mbufo mikanamke ntre akpa ini, esin Jehovah Abasi nnyin obumere anam nnyin: koro nnyin mikoyomke enye ke ido esie.

¹⁴ Ndien mme oku ye mme Levite enam idem mmɔ esana, man eda ekebe Jehovah Abasi Israel edɔk.

¹⁵ Ndien nditɔ mme Levite edori esaŋ ke afara mmɔ ebiom ekebe Abasi, kpa nte Moses eketemede ke uyo Jehovah.

¹⁶ David onyuŋ eteme mbɔŋ mme Levite, ete enim nditɔ-ete mmɔ, ete eda ndido, ye harp, ye cymbal, ekwɔ ikwɔ, enam eyom ke erimenere uyo ke idara.

¹⁷ Ntre ke mme Levite enim Heman eyen Joel, ye ndusuk nditɔ-ete esie, ye Asaph eyen Berechiah, ye ndusuk nditɔ Merari, nditɔ-ete mmɔ; ye Ethan eyen Kushaiah;

¹⁸ ndien nditɔ-ete mmɔ, ke udiana, kpa Zechariah, ye Ben, ye Jaaziel, ye Shemiramoth, ye Jehiel, ye Unni, ye Eliab, ye Benaiah, ye Maaseiah, ye Mattithiah, ye Eliphelehu, ye Mikneiah, ye Obed-edom, ye Jeiel, mme etie-usuŋ, esaŋa ye mmɔ.

¹⁹ Ndien mme ɔkwɔ-ikwɔ, Heman, ye Asaph, ye Ethan, ekama cymbal okpoho, man ebre ɔkpɔsɔŋ.

²⁰ Ndien Zechariah, ye Aziel, ye Shemiramoth, ye Jehiel, ye Unni, ye Eliab, ye Maaseiah, ye Benaiah, ekama psaltery edi mme etubom Alamoth.

²¹ Ndien Mattithiah, ye Eliphelehu, ye Mik-neiah, ye Obed-edom, ye Jeiel, ye Azaziah, ekama harp edi mme etubom Sheminith, ete eteme (mmɔ).

²² Ndien Chenaniah ɔbɔŋ mme Levite akama utom ikwɔ: edi enye eteme mmɔ ke ikwɔ, koro enye enyenede ikike.

²³ Ndien Berechiah ye Elkanah edi mme etie-usuŋ ke eke ekebe.

²⁴ Shebaniah ŋko, ye Joshaphat, ye Nethanel, ye Amasai, ye Zechariah, ye Benaiah, ye Eliezer, mme oku, edi mme andifuri ukorowo ke iso ekebe Abasi; Obed-edom ye Jehiah enyuŋ edi mme etie-usuŋ ke eke ekebe.

²⁵ Ndien David, ye mbiowo Israel, ye mme etubom mme tɔsin eka ekeda ekebe ediomi Jehovah ke ufɔk Obed-edom, edɔk edi ke idara.

²⁶ Edikem adaŋemi Abasi aŋwamde mme Levite oro ebiomde ekebe ediomi Jehovah, mmɔ ewa enaŋ itiaba, ye okukim erɔŋ itiaba.

²⁷ David onyuŋ esine ɔfɔŋ idem eti linen; kpukpru mme Levite oro ebiomde ekebe, ye mme andikwɔ ikwɔ, ye Chenaniah etubom ikwɔ mme andikwɔ (enyuŋ esine linen): David onyuŋ esine ephod linen.

²⁸ Ofuri Israel enyuŋ eda ekebe ediomi Jehovah edɔk ke mkpo, ye ke uyom obukpoŋ, ye ukorowo, ye cymbal, ke enam uyom ke psaltery, ye ke harp.

²⁹ Edikem adaŋemi ekebe ediomi Jehovah osimde obio David, Michal eyen Saul aŋwan etie ke window ese, onyuŋ okut nte edidem David enekde unek, onyuŋ ebrede mbre; ndien Michal esin enye ke ndek ke esit esie.