1 CHRONICLES 10 - Edisana ñwed Abasi Ibom

Ini Emi Edidem Saul Akakpade

¹ EKEM mme Philistine eŋwana ekɔŋ ye Israel; ndien mbon ekɔŋ Israel efeŋe ke iso mme Philistine, enyuŋ eduɔŋɔ afai ke obot Gilboa.

² Mme Philistine enyuŋ ebine Saul ŋko ye nditɔ esie ke edem; mme philistine enyuŋ ewot Jonathan, ye Abinadab, ye Malchi-shua, nditɔ Saul.

³ Ndien ekɔŋ ɔsɔŋ ebine Saul, ndien mbon-utiga etiga enye, ndien enye edikhe ke iso mbon-utiga.

⁴ Ndien Saul ɔdɔhɔ andibiom ŋkpɔ-ekɔŋ esie, ete, Sio ofut fo, di kim mi ke esit, mbak mbon edut emi edidi edituhɔ mi. Edi andibiom ŋkpɔ-ekɔŋ esie inyimeke: koro enye edikhede eti-eti. Ndien Saul ada ofut esie ɔduɔ ke esit.

⁵ Ndien adaŋemi andibiom ŋkpɔ-ekɔŋ esie okutde ete ke Saul amakpa, enye onyuŋ ɔduɔ ke ofut esie akpa.

⁶ Ntem ke Saul akpa, ye nditɔ esie ita, ofuri ufɔk esie enyuŋ ekpaŋa ini kiet.

⁷ Ekem adaŋemi kpukpru nditɔ Israel emi edude ke una isɔŋ oro, ekutde nte mmɔ efeŋede, ye nte Saul ye nditɔ esie ekpade, mmɔ ekpɔŋ obio mmɔ efeŋe: ndien mme Philistine edi ediduŋ ke mmɔ.

⁸ Edikem mkpɔŋ, adaŋemi mme Philistine ekade ndisioŋo mme akpa-mkpa ŋkpɔ ke idem, mmɔ esim Saul ye nditɔ esie, nte enade ke obot Gilboa.

⁹ Ndien ke ema ekesio enye ŋkpɔ ke idem, mmɔ eda ibuot esie, ye ŋkpɔ-ekɔŋ esie, enɔ esaŋa ke idut mme Philistine ekanare ekuk, man etɔt ndem mmɔ ye mbio-obio.

¹⁰ Ndien mmɔ eda ŋkpɔ-ekɔŋ esie esin ke ufɔk ndem mmɔ, enyuŋ ekɔŋ mkpɔ-kpɔrɔ esie ke ufɔk Dagon.

¹¹ Ekem ke ini ofuri Jabeshgilead ekopde kpukpru se mme Philistine ekenamde Saul.

¹² Kpukpru mbon uko edaha ke enyɔŋ eka ekekɔŋɔre obukpit Saul, ye mbukpit nditɔ esie, eka ke Jabesh, enyuŋ ebuk ɔkpɔ mmɔ ke idak ofriyo ke Jabesh, enyuŋ etre udia usen itiaba.

¹³ Ntre ke Saul akpa ke eridue emi enye eduede Jehovah, kpa ke ikɔ Jehovah emi enye mikonimke, koro enye etienede nsaŋa ekpo,

¹⁴ onyuŋ obupde enye; ndien mibupke Jehovah: mmɔdo Enye owotde enye, onyuŋ akabarede ubɔŋ ɔnɔ David eyen Jesse.