टीटस 2 - पुर्वीय मगरसाँचो शिक्षा 1 टर तीतस नाकै चहीँ साँचो शिक्षा खाटा खाट्च कुराको मट्टै पाहाक्च जाट्नी। 2 बुढा भर्मीकोलाक इट डेयार पाहाक्नी, लहे लाहाकी न अढीनाङ डाकी, आदर डुप्की ज्योस्च सेछ व्यवहार जाट्की, इमान्दार छान्की, विश्वासकी बलीयो खास्की, अरुकी माया जाट्की र स्थिर छानार ङुकी। 3 होटजाट्न न बुढी भर्मीकोलाक सेछ चालचलन पाहाक्नी होसे कुरै परमेश्वरकी आदर छान्ले, फोकोकी होटन डोस मालैडीकी र हान रक्सी गार माम्होर्की। कुसे कुरा सेछ ले, होसे कुराको मट्टै होखुरीकै पाहाक्ख्यो। 4 अनी होसे बुढी भर्मीकै बीहा जाट्च आर्नाम मास्टोकोलाक लाहा लहो लेन्जाकोलाक र मीजाकोलाक माया जाट्की, 5 र होखुरीकै लहे लाहाकी न अढीनाङ डाकी, शुद्ध मीमन खास्की, दयालु, सेछ घरजम जाट्की र लेन्जाकुङ अढीनाङ ङुकी डेम पाहाक्ख्यौ। इडीक होखुरीकै होट जाटा डेनाङ परमेश्वरौ बडनाम माछान्ले। 6 होटजाट्न न तीतस नाकै रेन्जा भर्मीकोलाक र लहे लाहाकी न अढीनाङ डाकी डेम पाहाक्नी। 7 नाकै न पट्ट ठोकाङ सेछ काम जाटार होखुरीककी नमुना छानार टान्हाक्नी। अनी नाखुरीकै पाहाक्नाङ इमान्दारी खाटा गम्भीर छानार, 8 बलीयो शिक्षा पाहाक्नी टा की सुयेर होसे शिक्षा चेकी माय्होक्ख्यौ। अनी कानुङ विरुधाङ सट्रुकै हीर खराब कुरा माडुपार मेखुरीक न कारामसेकी पर्ले। 9 नोकरकोलाक र पट्ट न कुराङ लहो मालीककुङ अधिनाङ ङुकी पाहाकार, मेङेर माल्हेट्न होखुरीकै डेच कुराको जाटार होखुरीककी खुसी पार्ख्यौ। 10 होखुरीकै हीर माखुस्ख्यौ, टर सधैँभरी सेछ र विश्वासीलो छान्न ङुख्यौ। इटजाट्न कानकी मुक्ति याछ कानुङ परमेश्वरौ शिक्षाकी पट्ट कुराङ सम्मान याल्हे। 11 हीजैडेनाङ पट्ट न भर्मीकै मुक्ति डुप्ख्यौ डेयार परमेश्वरौ अनुग्रह टान्हाक्ङने। 12 इसे अनुग्रहये सुये लाहाकी अढीनाङ डार, परमेश्वरकी आदर माजाट्च होसे मास्च जीवन र संसारुङ चाहनाकी डासार इटै आलाक परमेश्वरौ म्याहासाङ होसकोकी आदर जाट्च भक्तिपुर्ण जीवन जीवाकी पाहाक्ले। 13 होटजाट्न न कानै आशा डाच कुरा पुरा छान्च डीनौ लाम ङोस्ले। होसे डीनाङ कानुङ महान परमेश्वर र कानकी मुक्ति याछ येशू ख्रीष्टौ बाड्को महीमा डाङ्ले। 14 येशू ख्रीष्टै लहो जीवन वलिदान याहार कानकी पट्ट न खाल्या पापलकीङ छुट्कारा याहा। अनी होसकै कानकी पवित्र खास्कीयो लागी लहो जाटी खासा र सेछ काम जाट्की जोसीलो पार्या। 15 नाकै पाहाक्नाङ पुरा अधिकारखाटा विश्वासीकोलाक उत्साह याखी र च्याक्च जाट्की। सुयेर नाकोकी हेला जाट्च मौका माडुप्ख्यौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.