टीटस 1 - पुर्वीय मगर1 ङा पावल परमेश्वरौ डास र येशू ख्रीष्टौ प्रेरितै इसे चीठी रीक्ङन ले। परमेश्वरकी मन पर्च जीवन जीवाख्यौ डेयार परमेश्वर लहे न भाक्चकोलाक विश्वास र सत्यौ ज्ञान बड्डीसाक्ङ याखी ङाकी बीर्न्हकाच हो। 2 फलसोरुप परमेश्वरौ भर्मीकोवाङ सेन्र मासीच जीवनौ आशा छान्ले। अनी सेन्र झुटो माङाक्च परमेश्वरै सृष्टि जाट्की डेनाङ अघीलकीङ न कानकी इसे जीवन याल्हे डेयार प्रतिज्ञा जाट्नन्या। 3 अनी कानुङ मुक्ति याछ परमेश्वरौ आज्ञा अनुसार ङाकी जीम्मा याछ प्रचार लकीङ ठीक समयाङ होसकै लहो बचन टान्हाका। 4 काट न विश्वासाङ लेच ङाल्हौ न लेन्जा मीजा ल्याक्च तीतस नाकोकी इसे चीठी रीक्ङन ले। परमेश्वर बोइ र कानकी मुक्ति याछ ख्रीष्ट येशूलकीङ अनुग्रह र शान्ति। केरेट डेच टापुवाङ तीतसौ काम 5 ङै नाकोकी केरेटाङ बाँकी लेच काम पुरा जाट्कीयो लागी डास्च हो। पट्ट न सहरुङ मन्डलीयाङ अगुवाको भाक्की र ङै अर्हडीच अनुसार काम जाट्की डेम नाकोकी होला डासा। 6 होसे अगुवा छान्च भर्मी चहीँ सुयेर डोस लैडीकी माय्होक्च र काट मट्टै मास्टो लेच छान्की पर्ले। मीजाको र परमेश्वरकी विश्वास जाट्च र डेच मन्डीच र खराब बानी बेहोरा मालेच छान्की पर्ले। 7 हीजैडेनाङ परमेश्वरौ काम जाट्की पर्चबाटै मण्डलीयुङ अगुवा चहीँ हीर दोष मालेच छान्की पर्ले, घमण्ड माजाट्च, छीटो मीरीस माख्योछ, माम्होर्च, सु खाटा र मापुन्छ, र खराब काम जाटार धन सम्पत्ती कमडीच छान्की माछान्ले। 8 टर होसे अगुवा पाहुनाकी मान जाट्च, सेछ कामकी जाक्च, लहे लाहाकी बसाङ डाकी य्होक्च छान्की पर्ले, इमान्दारी, पवित्र, अनुसासीट छान्की पर्ले। 9 लहे पाछ सत्य बचनाङ बलीयो छान्की पर्ले। अरुकी उत्साह याखी य्होक्च छान्की पर्ले। इटजाट्न होचे सत्य बचनौ शिक्षा लकीङ अरु भर्मीकोलाक उत्साह याखी य्होक्ख्यो र विरोधीकुङ गल्टी टान्हाक्की य्होक्च छान्ख्यो। 10 हीजैडेनाङ वास्टै भर्मीको अरुकुङ अढीनाङ माङुच, व्यार्थौ कुरा जाट्च, ढाट्डीचको छान्ले। होखुरीक मढ्याङ, कुडीक जनै चहीँ ँ इट डेले, की मुक्ति डुप्की खतना जाट्की पर्ले। 11 होखुरीकुङ मेङेर ठुन्न याखी पर्ले, हीजैडेनाङ होखुरीकै पाहाक्की न माछान्च कुराको पाहाकार पट्ट न परीवारकोलाक न माखाटाक्ङ याम्हने। होखुरीकै पैसा कमडीकीयो लागी मट्टै इट जाट्च हो। 12 केरेट डेच टापुङ होखुरीकुङ काट जना महान शिक्षकै याङ्च डेमने, “केरेटुङ पट्ट न भर्मीको झुटो ङाक्च, अल्छी घीचुवाको हो र दुष्ट पसुको ल्याक्च न हो।” 13 इसे गबाही सत्य हो। होटबाटै होखुरीककी साप्फी हप्कडीनी अनी होखुरीक विश्वासाङ बलीयो छान्की य्होक्ख्यौ। 14 अब होखुरीकै यहूदीकुङ दन्त्य कठाको सेच भर्मीकोलाक र सत्यकी सुइकार माजाट्च भर्मीकुङ आज्ञाकी मासेख्यो। 15 रीदय शुद्ध लेच भर्मीकुङ लागी पट्ट ठोक शुद्ध ले, टर अशुद्ध रीडय लेच भर्मी र विश्वास माजाट्चकुङ लागी च कुसे ठोक र शुद्ध माछान्ले। हीजैडेनाङ होखुरीकुङ मीमन र बीबेक नीस न भ्रष्ट छान्च छान्ले। 16 होखुरीकै परमेश्वरकी चीन्डीले डेम डाबी च जाट्ले, टर होखुरीकुङ कामलकीङ चहीँ परमेश्वरकी इन्कार जाट्च टान्हाक्ले। होखुरीक झीर्न सेच, अटेरीको ले र कुसेर असल काम जाट्की ज्योस्च माले। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.