मर्कूस 10 - पुर्वीय मगरछोड पत्रौ बारेयाङ येशूये याछ शिक्षा ( मत्ती १९:१-१२ ; लुका १६:१८ ) 1 येशू होसे ठाउँकी डासार यहूदियौ इलाकाङ र यर्दन नदियो पारी नुङा। होला भर्मीकुङ बाड्को भीड होसको लेठाङ राहार सढैँ लेखान फेरी होसकै होखुरीककी शिक्षा याखी ठाला। 2 होला कुडीक फरीसीको राहार होसकोकी फसडीकी डेम गीना, “कुसेर भर्मीये ब्याहा जाट्च लहो मास्टोकी छोड पत्र याखी छान्ले की माछान्ले?” 3 येशूये होखुरीककी जबाफ याहा, “मोशै नाखुरीककी ही आज्ञा याम्हने?” 4 होखुरीकै डेया, “छोड पत्र रीकार भर्मीये लहे ब्याहा जाट्च मास्टोकी डास्की खाट्ले डेयार मोशै अनुमति याम्हने।” 5 टर येशूये होखुरीककी डेया, “नाखुरीकुङ मीमनुङ अटेरीये जाट्न मोशै नाखुरीककी इसे आज्ञा रीक्ङ याछ हो। 6 टर सृष्टियो सुरुलकीङ न परमेश्वरै होखुरीककी मास्टो र लेन्जा न जाट्न खासा। 7 ‘इटबाटै भर्मी लहो बोइमोइकी डासार लहो मास्टो खाटा खाटार ङुले। 8 अनी होखुरीक नीस जना काट न शरीर छान्ले।’ होखुरीक फेरी नीस होइन टर काट न शरीर छान्ले। 9 होटबाटै परमेश्वरै सुकी काठोवाङ जोडीमने, होखुरीककी भर्मीकै माभाक्ख्यौ।” 10 इमाङ लेच बेलाङ चेलाकै फेरी इसे कुरौ बारेयाङ येशूकी गीना। 11 होसकै होखुरीककी डेया, “सुये लोहो मास्टोकी छोड पत्र याहार अर्को खाटा ब्याहा जाट्ले, होचे होच्यौ पहीलुङ मास्टोओ विरुद्धाङ व्यभिचार जाट्ले। 12 र कुसे मास्टोये लोहो लेन्जाकी छोड पत्र याहार अर्को खाटा ब्याहा जाट्ले डेनाङ, होचे र व्यभिचार जाट्ले।” बालखकोलाक येशूये आसीस याछ ( मत्ती १९:१३-१५ ; लुका १८:१५-१७ ) 13 भर्मीकै माजा बालखकोलाक येशूये छुवार आसीस याख्यौ डेच उदेश्ये होसको लेठाङ राका। टर चेलाकै होसे भर्मीकोलाक हक्कारीया। 14 याङ्च डाङार येशू मीरीस ख्योव्हा र होखुरीककी डेया, “माजा बालखकोलाक ङा लेठाङ राखी यान्ही, होखुरीककी मारोकडीनी हीजैडेनाङ परमेश्वरौ राज्य इखुरीक ल्याक्चकुङ न हो। 15 साँच्ची न ङा नाखुरीककी डेले, सुये परमेश्वरौ राज्यकी काट माजा बालखै लेखा न ग्रहण माजाट्ले, होसे सेन्र होसे भीत्री पर्की माडुप्ले।” 16 होटै येशूये होखुरीककी मीकुव्हाङ लार होखुरीक मीटाक लहो मीहुट डाम आसीस याहा। धनी भर्मी र स्वर्गौ राज्य ( मत्ती १९:१६-३० ; लुका १८:१८-३० ) 17 येशू लामाङ नुङ्चै जाट्नाङ काट जना भर्मी खेर्न राहार होसकुङ अगाडी घुँडा टुसार होसकोकी गीना, “ए असल गुरु, सेन्र मासीच जीवन डुप्की ङै ही जाट्की पर्ले?” 18 येशूये डेया, “नाको हीजै ङाकी असल डेले? काट मट्टै परमेश्वर बाहेक अरु सुर असल माले। 19 नाकोकी आज्ञाको च ठाहा ले, ‘भर्मी मासाट्की, व्यभिचार माजाट्की, माखुस्की, झुटो गबाही माय्हाखी, माठग्डीकी, लहो मोइ र बोइकी आदर जाट्की।’” 20 होसे भर्मीये होसकोकी डेया, “गुरुज्यु, इसे च पट्ट न ङै माजा लकीङ न जाट्न राम्हने।” 21 येशूये होसकी ङोसा र माया जाटार डेया, “नाकै अझै काट कुरा जाट्की बाँकी ले। नुङ्नी र नाकोखाटा ही-ही ले होसे पट्ट न आर्लानी र गरीब कोलाक यान्ही। अनी नाकै स्वर्गाङ सम्पत्ति डुप्ले। होस न्हुइङ रान्ही र ङाकी डुट्नी।” 22 टर इसे कुरा सेयार होसे भर्मीयो मीटाहा छुम्छ छानार होसे डुखीट छानार नुङ्की क्योटा। हीजैडेनाङ होसे खाटा वास्टै धन सम्पत्ति लेया। 23 येशूये वार्लाक पार्लाक ङोसार लहो चेलाकोलाक डेया, “ढनी भर्मीकोलाक परमेश्वरौ राज्याङ पर्की कुडीक गार्हो ले।” 24 होसकै डेच कुरा सेयार चेलाको अचम्म मन्डीया। टर येशूये फेरी होखुरीककी डेया, “ए भाइको, परमेश्वरौ राज्य भीत्री पर्की कुडीक गार्हो ले। 25 धनी भर्मीको परमेश्वरौ राज्य भीत्री पर्की डेनाङ च आर्चौ व्हाङीङ उँटकी पर्की सजीलो छान्ले।” 26 होखुरीक झन अचम्म छानार लाहा लाहाङ गीना, “होट डेनाङ सु जीवाकी य्होक्ले ट?” 27 येशूये होखुरीककी ङोसार डेया, “भर्मीकुङ लागी च इसे कुरा छान्की माय्होक्ले टर परमेश्वरौ लागी चहीँ पट्ट न कुरा छान्की य्होक्ले।” 28 होटै पत्रुसै होसकोकी डेया, “ङोस्नी, कानै च पट्ट न कुरा डासार नाकोकी डुट्नने।” 29 येशूये डेया, “साँच्ची न ङा नाखुरीककी डेले, सुये ङौ र सेछ समाचारौ खाटीर लहो इम, मोइ बोइ, डाजेभाइ, डै बहीनीको, मीजाको, जग्गा जमीन डास्ले, 30 होखुरीकै इसे न समयाङ सय गुना बढी इम, मोइ बोइ, डाजेभाइ, डै बहीनी, मीजाको र जग्गा जमीन डुप्ले होटै सतावट र राल्हे टर राछ युगाङ सेन्र मासीच जीवन डुप्ले। 31 टर चाहाँ पहीला छान्चको न्हुङ्लाक छान्ले र चाहाँ न्हुङ्लाक छान्चको वास्टै जना पहीला छान्ले।” लाहा सीच बारेयाङ डेच ( मत्ती २०:१७-१९ ; लुका १८:३१-३४ ) 32 येशू र मेखोलौ चेलाको यरूशलेमपट्टी नुङ्ङ न लेया र होसको चहीँ होखुरीकुङ अगाडी-अगाडी व्हामन लेया। चेलाको अचम्म छान्नन्या र अरु होसकोकी डुट्च भर्मीको बीर्हीमन्या। टब होसकै बार्ह जना चेलाकोलाक फेरी आर्घार काटपटी आल्हा र लाहा मीटाक पर्न राछ कुराको होखुरीककी सेटाका। 33 अनी होसकै डेया, “ङोस्नी, कान यरूशलेम पट्टी नुङ्ङ न ले। होला भर्मीयो मीजाकी मुख्य पुजाहारीको र धर्मगुरुकुङ मीहुटाङ जीम्मा याल्हे र होखुरीकै होसकोकी मृत्युदण्ड याखी डेम रोमी कोलाक जीम्मा याल्हे। 34 होखुरीकै होसकी गील्ला जाट्ले र मेठोक ठोक्ले, कोर्रा लैडीले, र होसकी साट्ले। टर सोम याकाङ होसे सीच लकीङ फेरी जीवार सोले।” याकुब र युहन्नौ बिन्ती ( मत्ती २०:२०-२८ ) 35 होटै न्हुइङ जब्दियौ नीस जना लेन्जा मीजाको, याकुब र युहन्ना येशू लेठाङ राहार डेया, “गुरुज्यु, कानै नाकोखाटा ही ङेल्हे होसे जाट्न यान्ही डेच कानुङ मीमन ले।” 36 येशूये होखुरीककी गीना, “नाखुरीकुङ लागी ङै ही जाट्न याखी डेच मीमन जाट्ले?” 37 होखुरीकै होसकोकी डेया, “जब नाको महीमौ सीङ्हसानाङ ङुले टब कान डाजे भाइकी नाकुङ डेबर्या र डोर पट्टी ङुकी यान्ही।” 38 टर येशूये होखुरीककी डेया, “नाखुरीकै ही ङेल्हे होसे नाखुरीक माव्हार्ले। कुसे डुखओ कचौरा ङा गाले, होसे नाखुरीक गाकी य्होक्ले र? कुसे डुखओ बप्तिस्मा ङै लाकी पर्च होसे बप्तिस्मा नाखुरीकै लाकी य्होक्ले र?” 39 होखुरीकै येशूकी डेया, “कान य्होक्ले।” होसकै होखुरीककी डेया, “कुसे कचौरा ङा गाले होसे नाखुरीकै र गाले, कुसे बप्तिस्मा ङै लाकी पर्च होसे नाखुरीकै र लाले। 40 टर सुकी ङौ डोर र डेबर्या पट्टी ङुकी याखी चहीँ ङौ काम होइन। परमेश्वरै सुओ लागी इसे ठाउँको तयार खास्नने होखुरीककी न याल्हे।” 41 इसे कुरा सेयार डस जना चेलाको याकुब र युहन्ना खाटा मीरीस ख्योव्हा। 42 अनी येशूये होखुरीककी लाहा लेठाङ आर्घार डेया, “नाखुरीककी ठाहा न ले, संसाराङ राज्य जाट्चकै प्रजामीटाक लहो खुसी जाटार हक क्योट्ले र बाड्सो भर्मीकै अरुको मीटाक अधिकार जमडीले। 43 नाखुरीककोवाङ चहीँ होङ्च माछान्ले। टर नाखुरीक मध्याङ सुये बाड्को छान्च मीमन जाट्ले, होचे पट्टकुङ सेवा जाट्की पर्ले। 44 नाखुरीककोवाङ सुये पहीला छान्च मीमन जाट्ले, होसे पट्टओ नोकर छान्की न पर्ले। 45 हीजैडेनाङ भर्मीयो मीजा र अरु लकीङ सेवा डुप्की होइन। टर सेवा जाट्की र वास्टै जनौ छुट्कारौ लागी लहो जीवन याखी डेम राछ हो।” अन्धा बारटीमै ( मत्ती २०:२९-३४ ; लुका १८:३५-४३ ) 46 होटै न्हुइङ येशू र मेखोलौ चेलाको यरीहोवाङ टाराहा। होखुरीक बाड्को भर्मीकुङ भीडखाटा यरीहो लकीङ नुङ्ङ लेनाङ टीमैयो लेन्जा मीजा बारटीमै डेच काट ङेछ अन्धा लामौ छेवाङ ङुम ङुमन्या। 47 जब होचे नासरतुङ येशू राम्हन ले डेच सेया र होचे च्याकार डेया, “ए येशू, दाउदौ मीजा, ङा मीटाक दया जाट्नी!” 48 अनी कुडीक जनै चहीँ होसकी माच्याको डेयार हक्कारीया। टर होसे झन सार्हो च्याकार डेया, “ए दाउदौ मीजा, ङा मीटाक दया जाट्नी!” 49 टब येशू टोङ्हा र डेया, “होसकी इला आर्घानी।” होटै होखुरीकै होसे अन्धाकी इट डेयार आर्घा, “आट जाटो र सोना, नाङ्की होसकै आर्घामन ले।” 50 अनी मेन बर्को लोहार होसे जुरुक्क सोवा र येशू लेठाङ राहा। 51 येशूये होसकी डेया, “नाको ही ङेल्हे, ङा नाकुङ लागी ही जाट्न येहीङ?” होसे अन्धा भर्मीये होसकोकी डेया, “गुरु ज्यु, ङै मीमीक डाङ्की य्होकीङ।” 52 होटै येशूये डेया, “नुङ्नी, नाकुङ विश्वासै नाकोकी गेपाक्ने।” टब तुरुन्तै होचे मीमीक डाङा र होसको खाटा लामाङ न्हुङ-न्हुङ नुङा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.