मत्ती 24 - पुर्वीय मगरअन्टीम डीनुङ चीन्हको ( मर्कूस १३:१-१३ ; लुका २१:५-१९ ) 1 येशू परमेश्वरौ मन्दिरलकीङ ख्योहार नुङ्ङ न लेया। होडीक बेला चेलाको होसको लेठाङ राहार होसकोकी मन्दिरौ इमको टान्हाका। 2 टर येशूये होखुरीककी डेया, “नाखुरीकै इसे पट्ट न डाङ्ङने, होइन ट? ङा साँच्ची न नाखुरीककी डेले, इलुङ काट ल्हुङ र अर्को ल्हुङ मीटाक माङुले, पट्ट न भट्कडीयार लोम्ह काले।” 3 येशू जैटुन डाँडाङ ङुमङुनाङ चेलाको सुटुक्क राहार होसकोकी गीना, “गुरुज्यु, कानकी डेनी, इसे कुराको सेन छान्ले? नाको फेरी ल्हेस्न रान्हाङ अनी इसे संसारौ अन्त्यौ चीन्ह ही छान्ले?” 4 येशूये होखुरीककी जवाफ याहा, “होसीयार छान्नी नाखुरीककी सुयेर माझुक्डीख्यौ! 5 हीजैडेनाङ वास्टै जना ङौ म्यार्मीनाङ ‘ङा न मुक्ति याछ ख्रीष्ट हो’ डेचै राल्हे र वास्टै भर्मीकोलाक ढाँट्डीले। 6 “नाखुरीकै लडाइँ छाना डेच र लडाइँ छान्च हल्लाको सेले। टर होडीक बेला नाखुरीक माबीर्हीखी। होसे पट्ट न कुरा च छान्की न पर्ले, टर होडीक बेला न च संसारौ अन्त्य माछान्ले। 7 जाटी जाटीयो मीघ्याङ र राज्य राज्यौ मीघ्याङ लडाइ क्योस्ले। ठाउँ ठावाङ अनीकाल छान्ले र भुइँचालो नुङ्ले। 8 टर इसे च डुखौ सुरु मट्टै हो। 9 “टब होडीक बेला भर्मीकै नाखुरीककी कष्टौ लागी घोवार आल्हे र साट्ले। अनी ङाकी विश्वास जाट्च बाटै पट्ट न जाटीयुङ भर्मीकै नाखुरीककी झीर्ले। 10 “होसबेला वास्टै जना लहो विश्वासकी डास्ले, काटै काटकी ढोका याल्हे र झीर्ले। 11 वास्टै झुटो अगमवक्ताको राल्हे र वास्टै भर्मीकी बहकडीले। 12 “दुष्टता बट्डीस्च बाटै वास्टै भर्मीकुङ मीघ्याङ माया घट्डीसार नुङ्ले। 13 टर अन्टीम सम्म स्थिर ङुचकोलाक चहीँ जीवाटाक्ले। 14 अनी इसे राज्यौ सेछ समाचार चहीँ पट्ट जाटीकुङ लागी गबाहीयो रुपाङ संसार भरी प्रचार जाट्ले, टब संसारौ अन्त्य राल्हे। सङ्कस्टौ समय ( मर्कूस १३:१४-२३ ; लुका २१:२०-२४ ) 15 “नाखुरीकै दानिएल अगमवक्तै डेच ‘बीनास जाट्च झीर्न सेच ठोक’ पवित्र ठावाङ टोङ्छ डाङ्ले (इच्यो अर्थ परेस्चकै वार्ख्यो)। 16 होडीक बेला यहूदियाङ लेचको पहाडलाक भोग्डीस्ख्यो। 17 इम बाहीर लेच भर्मीको सामानको लाकी इम भीत्री मापर्न न बाहीर लकीङ न भोक्डीस्ख्यो। 18 य्हाङ लेच भर्मीको लहो बढीन लाकी ल्हेसार मान्न न भोक्डीस्ख्यौ। 19 होडीक बेला मीटुकाङ मीजा लेच र मीकुहाङ मीजा लेच मोइकोलाक झन कुडीक बीजोक छान्ले। 20 जुङ्च महीना अठबा म्हुङ बाट्चनीक नाखुरीक भोग्डीस्की मापर्ख्यो डेयार प्रार्थना जाट्नी। 21 हीजैडेनाङ होडीक बेला संसारौ सुरुलकीङ चाहाँसम्म माछान्च र फेरी सेन्र माछान्च महासङ्कष्ट छान्ने। 22 इडीक होसे डीनको घटडीम माय्हाछ लेनाङ च सुर माजीवाच लेया। टर होसकै चुन्डीच भर्मीकुङ कारनै होसे डीनको घटडीम याल्हे। 23 “होडीक बेला नाखुरीककी सुयेर ‘ङोस्नी, मुक्ति याछ ख्रीष्ट इला ले’ अठबा ‘होसको होला ले’ डेया डेनाङ विश्वास माजाट्नी। 24 हीजैडेनाङ याङ्च झुटो ख्रीष्टको र झुट्टा अगमवक्ताको राल्हे। होखुरीकै बाड्सो-बाड्सो चीन्ह र अचम्मौ कामको टान्हाकार य्होक्ठर परमेश्वरै चुन्डीचकोलाक र भड्कडीले। 25 “ङोस्नी, ङै नाखुरीककी इसे कुरा अघीलकीङ न डेम याम्हने। 26 होटबाटै होखुरीकै नाखुरीककी, ‘ङोस्नी, होसको च उजाड ठावाङ ले’ डेनाङ र नाखुरीक होला मानुङ्नी। नाखुरीकै, ‘ङोस्नी, होसको च भीत्री कोठाङ ले’ डेनाङ र नाखुरीकै होसे कुरा विश्वास माजाट्नी। 27 हीजैडेनाङ कुटजाट्न भर्मीकै सर्घाङ बीजुली पीझ्यानाङ पूर्वलकीङ पस्चीमसम्म ट्याङ्छ डाङ्ले, होटजाट्न न भर्मीयो मीजा रान्हाङ भर्मीकै होसकोकी डाङ्ले। 28 कुला सीनु ले, होला न गीड्ढको र भेला छान्ले। भर्मीयो मीजा राछ डीन ( मर्कूस १३:२४-२७ ; लुका २१:२५-२८ ) 29 “होसे सङ्कष्टौ डीनको भ्याच बीटीक्कै नाखान छुम्पाक डाङ्च छान्ले, ग्याहोटै ट्याङ्छ याखी डास्ले, सर्घालकीङ टुगाको झाल्ले र सर्घुङ शक्तिको होयोले। 30 “होडीक बेला ङा भर्मीयो मीजौ चीन्ह सर्घाङ डाङ्ले र पृथ्वीयुङ पट्ट न जाटीकै विलाप जाट्ले। अनी होखुरीकै भर्मीयो मीजाकी सर्घुङ डेबुवाङ शक्ति र बाड्को महीमाङ राम्हन लेच डाङ्ले। 31 बाड्को सोराङ टुरही आर्म्हाट्ले अनी भर्मीयो मीजै लहो स्वर्गदूतकोलाक बीर्न्हकाले र होखुरीकै पृथ्वीयुङ पट्ट लकीङ होसकै चुन्डीचकोलाक भेला जाट्ले। अन्जीरौ म्यार्टुङ लकीङ शिक्षा ( मर्कूस १३:२८-३१ ; लुका २१:२९-३३ ) 32 “अब अन्जीरौ म्यार्टुङ लकीङ काट कुरा पान्ही। जब होच्यो हाँगाको कलीलो छानार मुनाको राछ बीट्टीकै अब खान्छ समय खेरेप राहा डेयार नाखुरीककी थाहा छान्ले। 33 होटजाट्न न नाखुरीकै इसे पट्ट न कुराको डाङ्ले, टब भर्मीयो मीजा खेरेप जा गालामटुङाङ न ले डेयार वार्न्ही। 34 साँच्ची न ङा नाखुरीककी डेले, इसे पट्ट न कुरा पुरा माछान्ठर इसे पुस्ता म्हाटार मानुङ्ले। 35 स्वर्ग र पृथ्वी म्हाटार नुङ्ले, टर ङौ वचन सेन्र म्हाटार मानुङ्ले। होसीयार छान्की पर्च शिक्षा ( मर्कूस १३:३२-३७ ; लुका १७:२६-३० , ३४-३६ ) 36 “टर परमेश्वर बोइकी बाहेक होसे डीन र घडी सेन राल्हे डेयार सुकीर थाहा माले। न ट स्वर्गुङ स्वर्गदूतकोलाक, न ट मीजाकी। 37 भर्मीयो मीजा रान्हाङ र नोऔ डीनकोवाङ लेखा न छान्ले। 38 हीजैडेनाङ जलप्रलय छान्की डेनाङ अगाडी नोआ जहाज भीत्री पर्च डीन सम्म र भर्मीको ज्याम, गाम, ब्याहाबारी जाट्न ङुमन्या। 39 अनी जलप्रलय राहार होखुरीक पट्टकी जोकाकार माआल्ठर होखुरीकै थाहा न माढीना। भर्मीयो मीजा राछ बेलाङ र होङ्च न छान्ले। 40 होडीक बेला नीस जना य्हाङ काम जाट्न ङुचको मध्याङ काट जनाकी आल्ल्हे र अर्कोकी डास्ले। 41 झाटा नुक्ङ ङुच नीस जना मास्टोको मध्याङ काटकी आल्ल्हे, अर्कोकी डास्ले। 42 “होटबाटै नाखुरीक होसीयार छानार ङुनी, हीजैडेनाङ नाखुरीकुङ प्रभु कुस्नीक राल्हे, होसे नाखुरीककी थाहा न माछान्ले। 43 टर इसे कुरा आर्मीट्न डानी, खुस कुसे बेला राल्हे डेम थाहा डीन्छ लेनाङ च इमुङ मीमुरुङ मामीस्न न ङुच लेया र खुसकी भीत्री पर्की न माय्हाछ लेया। 44 होटबाटै नाखुरीक र होसीयार छानार ङुनी, हीजैडेनाङ भर्मीयो मीजा नाखुरीकै माचीटडीच बेलाङ राल्हे। इमान्दार र बेइमान नोकर ( लुका १२:४१-४८ ) 45 “विश्वासीलो र बुद्धिमानी नोकर होसे हो, होसकी न मीमुरुङै लहो इमुङ पट्ट न कामको जीम्मा याल्हे र अरु नोकरकोलाक नीस्चीट समयाङ होखुरीककी ज्याच ठोक याखी डेम खटडीले। 46 इमुङ मीमुरुङ ल्हेसार रान्हाङ होटजाट्न न काम जाट्न ङुच डुपा डेनाङ झन होसकी स्याबास याल्हे। 47 साँच्ची न ङा नाखुरीककी डेले, मीमुरुङै होसे नोकरकी मेखोल्हौ पट्ट न धन-सम्पट्टीयो जीम्मा याल्हे। 48 टर इडीक होसे नोकर दुष्ट ले डेनाङ ‘ङौ मीमुरुङ ढीलो राल्हे’ डेयार मेन मीमनाङ आर्मीट्ले, 49 अनी लाहा खाटा काम जाट्च नोकरकोलाक डुङार म्होर्चको खाटा ज्याम, गाम जाट्की ठाल्ले। 50 होटै होच्यो मीमुरुङ होचे माआरमीट्च डीन र घडीयाङ झोस टाराल्हे। 51 होटै होसकी बाड्को दन्ड याल्हे र नरकाङ होच्यो हालट चहीँ कपटीकुङ लेखा न छान्ले। होला भर्मीको राप्ले र मीस्याक जीक्ले।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.