मत्ती 23 - पुर्वीय मगरधर्मगुरु र फरीसीकोलाक धिक्कार ( मर्कूस १२:३८-३९ ; लुका ११:४३ , ४६ ; २०:४५-४६ ) 1 येशूये भर्मीकुङ भीडकोलाक र लहो चेलाकोलाक डेया, 2 “धर्मगुरुको र फरीसीकै मोशौ व्यवस्था पाहाक्च अधिकार डुप्मने। 3 होटबाटै होखुरीकै डेच कुरा मन्डीनी र जाट्नी। टर होखुरीकै ही जाट्ले होसे चहीँ माजाट्नी, हीजैडेनाङ होखुरीकै अरुकी च पाहाक्ले, टर मेखुरीकै चहीँ माजाट्ले। 4 होखुरीकै अरुकी चहीँ धर्म कर्मौ लीस्च बुकी र माय्होक्च भारी छ्याकार भर्मीकुङ काँढाङ डाम याल्हे। टर होखुरीक लाहा चहीँ होसे सोट्की काट औँलै र माछुले। 5 होखुरीक लहो पट्ट न काम अरु भर्मीकोलाक टान्हाक्कीयो लागी जाट्ले। होखुरीक लहो मीटार र पाखुराङ बा-बाड्सो व्यवस्था पत्र खासार छ्याक्ले, र लहो बढीनौ झुम्काको लोलोट्च खास्ले। 6 होखुरीक भोजाङ आदर डुप्च ठाउँको र यहूदीकुङ सभाङुच इमकोवाङ सेछ ठावाङ ङुकी मीमन जाट्ले। 7 होखुरीकै बजार नुङ्नाङ भर्मीकै लाहाकी आदर जाट्ख्यो र पट्टये ‘गुरु’ डेयार आर्घाख्यो डेच मीमन जाट्ले। 8 “टर नाखुरीककी सुयेर ‘गुरु’ माडेख्यो, हीजैडेनाङ नाखुरीकुङ गुरु काट मट्टै ले, अनी नाखुरीक चहीँ पट्ट न डाजेभाइको र डैबहीनीको लेखा न हो। 9 इसे पृथ्वीयाङ नाखुरीकै सुकीर ‘बोइ’ माडेकी, हीजैडेनाङ नाखुरीकुङ काट मट्टै बोइ ले, होसको स्वर्गाङ ले। 10 नाखुरीककी सुयेर ‘अगुवा’ माडेख्यो, हीजैडेनाङ नाखुरीकुङ अगुवा काट मट्टै ले, होसको मुक्ति याछ ख्रीष्ट हो। 11 नाखुरीक मध्याङ सु बाड्को ले, होचे नाखुरीकुङ सेवा जाट्की पर्ले। 12 हीजैडेनाङ सुये लहाकी बाड्को खास्ले, होसे मार्जा छान्ले र सुये लहाकी मार्जा खास्ले, होसे बाड्को छान्ले। कपटीकुङ बीरुद्धाङ चेतावनी ( मर्कूस १२:४० ; लुका ११:३९-४२ , ४४ , ५२ ; २०:४७ ) 13 “नाखुरीककी धिक्कार, ए धर्मगुरुको र फरीसीको, नाखुरीक कपटीको! हीजैडेनाङ नाखुरीकै भर्मीकुङ अगाडी स्वर्ग राज्यौ गालाम ठुन्ने। नाखुरीक लाहा र भीत्री मापर्ले, पर्की मीमन जाट्चकोलाक र पर्की माय्हाले। 14 [“धिक्कार नाखुरीककी, धर्मगुरुको र फरीसीको, कपटीको! नाखुरीकै बीढुवाकुङ इम स्याट्न याल्हे र लहाकी धर्मी हो डेम टान्हाक्कीयो लागी लोलोट्च प्रार्थना जाट्ले। होटबाटै अरुये डेनाङ नाखुरीकै वास्टै दन्ड डुप्ले।] 15 “धिक्कार नाखुरीककी, ए धर्मगुरुको र फरीसीको, नाखुरीक कपटीको! नाखुरीक काट जनाकी लहो धर्माङ राक्की संसार भरी पाम व्हाले, अनी होसे नाखुरीकुङ धर्माङ राछ पछी होसकी लहाकी डेनाङ डोबर नरकौ भागीडार खास्ले। 16 “धिक्कार नाखुरीककी, अन्धा अगुवाको! नाखुरीक इट डेले, ‘सुयेर मन्दिरौ म्यार्मीनाङ शपथ ज्या डेनाङ होसे शपथै होसकी माछ्याक्ले, टर मन्दिरुङ सुनौ शपथ ज्या डेनाङ चहीँ होसे शपथै होसकी छ्याक्ले।’ 17 नाखुरीक अन्धा मुर्खको! कुसे बाड्को हो, सुन की, सुनकी चोखडीच मन्दिर? 18 नाखुरीक इट र डेले, ‘सुयेर वेदीयो म्यार्मीनाङ शपथ ज्या डेनाङ होसे शपथै होसकी माछ्याक्ले, टर वेदी मीटाक डाच भेटीयो म्यार्मीनाङ शपथ ज्या डेनाङ होसकी मेन शपथै छ्याक्ले।’ 19 नाखुरीक अन्धा भर्मीको! कुसे चहीँ बाड्को हो, भेटी की, भेटीकी शुद्ध जाट्च वेदी? 20 होटबाटै सुये वेदीयो शपथ ज्याले, होचे वेदीयो र होसे मीटाक लेच पट्ट ठोककुङ शपथ ज्याले। 21 अनी सुये मन्दिरौ म्यार्मीनाङ शपथ ज्याले, होचे मन्दिरौ म्यार्मीन र मन्दिर भीत्री बास जाट्च परमेश्वरौ म्यार्मीनाङ शपथ ज्याले। 22 सुये स्वर्गौ शपथ ज्याले, होचे परमेश्वरौ सिंहासनौ अनी होसमीटाक ङुच परमेश्वरौ म्यार्मीनाङ शपथ ज्याले। 23 “धिक्कार नाखुरीककी, धर्मगुरुको र फरीसीको, नाखुरीक कपटीको! नाखुरीकै इसे मा-मार्जा कुराकुङ पुदीना, सोफो र जीरौ दशाँश चहीँ याल्हे, टर नाखुरीकै व्यवस्थौ झन मुख्य कुराको न्याय, दया, र परमेश्वरखाटा विश्वासीलो छान्की चहीँ डास्नने। इसे कुराको नाखुरीकै जाट्की पर्च लेया, अनी होसे कुराको माडास्की पर्च लेया। 24 ए अन्धा अगुवाको, नाखुरीक भुसुनाकी च भाक्ले, टर उँटकी चहीँ मेलेक्ले! 25 “धिक्कार, नाखुरीककी धर्मगुरुको र फरीसीको, नाखुरीक कपटीको! नाखुरीक ठाल र बेलौ बाहीर चहीँ हुर्ले, टर नाखुरीक भीत्री चहीँ लोभ र स्वार्ठै न्हेप्च छान्ने। 26 ए अन्धा फरीसीको! पहीला बेलौ भीत्री पट्टी ठुट्नी अनी बाहीर पट्टी र सफा छान्ले। 27 “धिक्कार नाखुरीककी, धर्मगुरुको र फरीसीको, नाखुरीक कपटीको! नाखुरीक बोचझइ लाक्च चीहानको ल्याक्च ले, होसे बाहीर पट्टी चहीँ सेछ डाङ्ले, टर भीत्री चहीँ सीच भर्मीकुङ घेरेल्च हाडोको र पट्ट न अशुद्ध कुरै न्हेप्च छान्ने। 28 होटजाट्न न नाखुरीक र बाहीर चहीँ भर्मीकुङ म्याहासाङ धर्मी ल्हेस्ले, टर भीत्री चहीँ कपट र दुष्टै न्हेप्च छान्ने। दोषी भर्मीकोलाक दन्ड ( लुका ११:४७-५१ ) 29 “धिक्कार नाखुरीककी, धर्मगुरुको र फरीसीको, नाखुरीक कपटीको! नाखुरीक अगमवक्ताकुङ मजुङ-मजुङ चीहानको खास्ले र धर्मी भर्मीकुङ चीहानको र सीङ्गारीले। 30 अनी नाखुरीक डेले, ‘इडीक कानुङ बोइ बाज्युकुङ समयाङ कान लेनाङ च अगमवक्ताकोलाक साट्नाङ होखुरीक खाटा कान सहभागी माछान्च लेया।’ 31 इटजाट्न नाखुरीक अगमवक्ताकोलाक साट्चकुङ सन्तान हो डेच प्रमाण लहे लाहाकी न याल्हे। 32 होटबाटै अब नाखुरीकुङ बोइ बाज्युकै सुरु जाट्च पापौ काम पुरा जाट्नी! 33 “ए बुलको, बीसालु बुलौ मीजाको! नाखुरीक कुटजाट्न नरकुङ दन्ड लकीङ भीस्ले? 34 होटबाटै ङा नाखुरीक लेठाङ अगमवक्ताको, बुद्धिमान भर्मीको र धर्मगुरुको बीर्न्हकाले। होखुरीक मध्याङ कुडीक जनाकी नाखुरीकै साट्ले र क्रूसाङ टङ्गडीले, अनी कुडीक जनाकी यहूदीकुङ सभाङुच इमकोवाङ कोर्रा ङाप्ले, र काट सहर लकीङ अर्को सहर सम्म सटडीले। 35 इटबाटै पृथ्वी मीटाक जोकाक्च पट्ट धर्मी भर्मीकुङ य्हु निर्दोष हाबीलौ य्हु लकीङ लार बेरेक्याहौ मीजा जकरीयौ य्हु सम्म, सुकी नाखुरीकै पवित्र ठाउँ र वेदीयो मीघ्याङ साटा, होसे नाखुरीकुङ न मीटालुवाङ पर्ले। 36 ङा साँच्ची न नाखुरीककी डेले, इसे पट्ट न कुराकुङ दन्ड इसे न पुस्ता मीटाक आइपर्ले। यरुशलेमकी चेतावनी ( लुका १३:३४-३५ ) 37 “यरूशलेमुङ भर्मीको, ए यरूशलेमुङ भर्मीको, नाखुरीकै अगमवक्ताकोलाक साट्ले, अनी नाखुरीक लेठाङ बीर्न्हकाच कोलाक ल्हुङै हीर्कडीले! कुटजाट्न गोमानै लहो मीजाकोलाक बटुलीयार मीखारै हुप्ले, होटजाट्न न ङै वास्टै खेप नाखुरीककी बटुलीच मीमन जाटा, टर नाखुरीकै मामन्डीया। 38 ङोस्नी, नाखुरीकुङ इम नाखुरीकुङ लागी उजाडीस्नने। 39 हीजैडेनाङ ङा नाखुरीककी डेले, ‘पर्मप्रभुओ म्यार्मीनाङ राछ कुडीक आसीसीट ले’ फेरी माडेठरसम्म नाखुरीकै ङाकी माडाङ्ले।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.