मत्ती 21 - पुर्वीय मगरयरुशलेमाङ येशूकी स्वागत जाट्च ( मर्कूस ११:१-११ ; लुका १९:२८-४० ; युहन्ना १२:१२-१९ ) 1 येशू र मेकुङ चेलाको यरूशलेमौ खेरेप जैटुन डाँडा छीनी बेथफागे डेच ठावाङ टाराहा। अनी होसकै नीस जना चेलाकोलाक 2 इट डेयार बीर्न्हका, “नाखुरीक उ पारी लाङ्घाङ नुङ्नी। होला टाछ बीट्टीकै नाखुरीकै काट गढौ मीजा मेन मीमा खाटा छ्याक्ङ डाच डुप्ले। होखुरीककी पीसाकार ङा लेठाङ राक्नी। 3 सुयेर नाखुरीककी हीर डेया डेनाङ, ‘प्रभुकी इखुरीक चहडीस्न ने’ डेकी अनी होचे तुरुन्तै होखुरीककी याम्हकाले।” 4 अगमवक्तालकीङ ङाक्च वचन पुरा छान्की इसे छान्च हो, 5 “यरूशलेमुङ भर्मीकोलाक डेनी, ‘ङोस्नी, नाखुरीकुङ राजा, नम्र छानार होसको गढा मीटाक, गढौ मीजा मीटाक काल्हार नाखुरीकलेठाङ राम्हन ले।’” 6 होटै होसकुङ नीस जना चेलाको नुङा र येशूये अर्हडीच लेखा न होखुरीकै जाटा। 7 होखुरीकै होसे गढौ मीजाकी मेन मीमाखाटा न राका, र होखुरीकै होसे गढौ मीजामीटाक लहो बढीनको टाङ्ङ याहा, अनी येशू होसे मीटाक काल्हा। 8 भर्मीकै लाहा लहो बढीनको डोनार होसकोकी स्वागत जाट्की लामाङ टाङ्ङ याहा। अरु कुडीक जनै चहीँ स्याउल्हाको राकार लामाङ टाङ्ङ याहा। 9 येशूओ अगाडी र पछाडी व्हाच पट्ट न भर्मीकै इट डेचै जय जयकार जाट्की ठाला, “दाउदौ मीजाकी होसन्ना! परमप्रभुओ म्यार्मीनाङ राछ कुडीक आसीसीट ले! पट्ट डेनाङ ढेनाम स्वर्गाङ होसन्ना!” 10 जब येशू यरूशलेमाङ टाहा, पुरै सहरुङ भर्मीको मार्हाङा र होखुरीकै गीना, “इसको सु हो?” 11 भीडुङ भर्मीकै डेया, “होसको च गालीलुङ नासरतुङ अगमवक्ता येशू हो।” येशू परमेश्वरौ मन्दिराङ नुङ्च ( मर्कूस ११:१५-१९ ; लुका १९:४५-४८ ; युहन्ना २:१३-२२ ) 12 येशू परमेश्वरौ मन्दिरौ आर्भाङ नुङा। होसकै होला लोम आर्लाम जाट्चको पट्टकी परमेश्वरौ मन्दिर लकीङ लगारीयार बाहीर छ्युका। होसकै पैसा योस्चकुङ टेबुलको घोप्टडीम याहा र परेवा आर्लाचकुङ र ङुच ठाउँको पल्टडीम याहा। 13 होसकै होखुरीककी डेया, “धर्मशास्त्राङ याङ्च रीक्ङने, ‘ङौ इम प्रार्थनौ इम छान्की पर्ले।’ टर नाखुरीकै च इसकी खुसकुङ ओडार टी खास्नने।” 14 मीमीक माडाङ्च र लङ्गडाको परमेश्वरौ मन्दिराङ येशू लेठाङ राहा र होसकै होखुरीककी गेपाका। 15 टर जब मुख्य पुजाहारीको र धर्मगुरुकै होसकै जाट्च अचम्मौ कामको डाङा, र मा-मार्जा जजाकै परमेश्वरौ मन्दिरुङ आर्भाङ “दाउदौ मीजाकी होसन्ना” डेचै च्याक्च सेया, अनी होखुरीक साप्फी मीरीस ख्योहा। 16 होखुरीकै येशूकी डेया, “इसे जजाकै ही डेमने, नाको सेमन ले?” होसकै डेया, “हो सेमन ले। ही नाखुरीकै सेन्र धर्मशास्त्र मापरेस्न ने, ‘मा-मार्जा जजाकै र डुढ-गाचै जाट्च बालककोलाक र नाकै प्रशंसा जाट्की लैडीले’?” 17 अनी होखुरीककी डासार होसको सहरीङ बाहीर ख्योहार बेथानियाङ नुङार होला बास ङुवा। मीस्या मालेच अन्जीरौ म्यार्टुङ ( मर्कूस ११:१२-१४ , २०-२४ ) 18 गोराक न सहरपट्टी ल्हेस्नाङ येशूकी मीटुक रन्छीया। 19 लामौ छेवाङ काट अन्जीरौ म्यार्टुङ डाङार होसको मीस्या लेकी डेम नुङा। टर होला मील्हा बाहेक हीर मालेया। टब होसकै होसे म्यार्टुङकी डेया, “अब लकीङ आलाक नुओ मीस्या सेन्र मास्याख्यौ!” टब होसे म्यार्टुङ होडीक न बेला ओइलडीस्कीक्योटा। 20 याङ्च डाङार चेलाको छक्क पर्यार गीना, “इसे अन्जीरौ म्यार्टुङ कुट जाट्न इडीक छीटो ओइलडीस्कीक्योटा?” 21 अनी येशूये होखुरीककी जवाफ याहा, “ङा नाखुरीककी साँच्ची न डेले, नाखुरीक खाटा विश्वास ले र सेन्र सङ्खा माजाटा डेनाङ, ङै इसे अन्जीरौ म्यार्टुङकी ही जाटा होडीक मट्टै होइन, टर नाखुरीकै इसे डाँडाकी ‘इटै नुङार समुन्द्राङ झालो’ डेया डेनाङ होसे छान्ले। 22 विश्वास जाटार प्रार्थनाङ ही ङेल्हे होसे नाखुरीकै डुप्ले।” येशूओ अधिकारौ बारेयाङ गीन्च ( मर्कूस ११:२७-३३ ; लुका २०:१-८ ) 23 अनी येशू परमेश्वरौ मन्दिर भीत्री पर्यार शिक्षा याम्हन लेया, होडीक बेला मुख्य पुजाहारीको र अगुवाको होसको लेठाङ राहार होसकोकी गीना, “नाकै कुटै अधिकार डुपार इसे काम जाट्नन ले? इसे अधिकार नाकोकी सुये याहा?” 24 येशूये होखुरीककी डेया, “ङा र नाखुरीककी काट कुरा गीन्ले, ङाकी होच्यौ जवाफ याहा डेनाङ, ङा कुसे अधिकारै इसे काम जाट्नने, होसे नाखुरीककी डेले। 25 युहन्नै बप्तिस्मा याछ अधिकार कुटै डुपा? परमेश्वर लकीङ हो की भर्मीलकीङ?” अनी होखुरीक मेखुरीक-मेखुरीक इट डेचै कुरा जाट्की ठाला, “परमेश्वर लकीङ हो डेइङ डेनाङ, होसकै ‘होट डेनाङ नाखुरीकै होसकी हीजै विश्वास माजाटा?’ डेले। 26 टर भर्मीकोलकीङ हो डेइङ डेनाङ, कानुङ विरोधाङ भर्मीको सोले की डेम बीर्हीम सेले। हीजैडेनाङ पट्टकै युहन्नाकी अगमवक्ता हो डेम मन्डीले।” 27 होटबाटै होखुरीकै येशूकी डेया, “कानकी थाहा माले।” होसकै होखुरीककी डेया, “ङा र कुसे अधिकारै इसे काम जाट्नने, होसे नाखुरीककी माडेले।” नीस लेन्जा मीजाकुङ उदाहरण 28 येशूये डेया, “नाखुरीक ही विचार जाट्ले? काट जना भर्मीयो नीस जना लेन्जा मीजाको लेया। होचे जेठा चहीँ लेठाङ राहार डेया, ‘मीजा, छीनी नाङ नुङार अङ्गुर बारीयाङ काम जाट्न योहो।’ 29 होचे जवाफ याहा, ‘ङा मानुङ्ले।’ टर न्हुइङ होच्यो मीमन ल्हेसा अनी होसे नुङा। 30 फेरी होसे बोइ अर्को लेन्जा मीजा लेठाङ नुङार होटन डेया। होचे जवाफ याहा, ‘छान्ले ङा नुङ्ले।’ टर होसे मानुङा। 31 अब इसे नीसाङ कुसे चहीँये बोयो इच्छाकी मन्डीया?” होखुरीकै जवाफ याहा, “जेठै चहीँये।” होटै येशूये होखुरीककी डेया, “साँच्ची न ङा नाखुरीककी डेले, कर सोट्चको र बेस्याको नाखुरीक डेनाङ पहीला परमेश्वरौ राज्याङ नुङ्ले। 32 हीजैडेनाङ बप्तिस्मा याछ युहन्ना नाखुरीक लेठाङ धार्मिकतौ सत्य लाम टान्हाक्की राहा, टर आसकोकी नाखुरीकै विश्वास माजाटा। बरु कर सोट्चको र बेस्याकै चहीँ आसकोकी विश्वास जाटा। नाखुरीकै इसे डाङ्नाङ र लहो पापको माडासा र आसकोकी विश्वास माजाटा।” अङ्गुर बारी र मोहीको ( मर्कूस १२:१-१२ ; लुका २०:९-१९ ) 33 येशूये डेया, “अर्को काट उदाहरण सेनी। काट जना य्हाओ मीमुरुङ लेया, होचे य्हाङ अङ्गुर रोप्डीया। होच्यो वरीपरी बार बार्यार होला अङ्गुर चीप्च काट कोल र अङ्गुर बारी रुङ्च गोठ र खासा। होसे अङ्गुर बारी मोहीकोलाक ठेक्काङ याहार मेल्हा चहीँ लोस नुङा। 34 जब अङ्गुर म्हीन्च बेला छाना, अनी होचे लहो भाग अङ्गुर लाकी मोहीको लेठाङ नोकरको बीर्न्हका। 35 टर होसे मोहीकै नोकरकोलाक घोवार काट्की डुङा, काट्की साटा अनी काट्की ल्हुङै हीर्कडीया। 36 फेरी बारीओ मीमुरुङै पहीलुङ डेनाङ वास्टै नोकरकोलाक मोहीको लेठाङ बीर्न्हका। होखुरीक खाटा र मोहीकै पहीलुङ कोलाक लेखा न जाटा। 37 “अन्टीमाङ बारीयो मीमुरुङै लहो लेन्जा मीजाकी मोहीको लेठाङ बीर्न्हका, अनी होचे आर्मीट्न्या की ‘ङौ लेन्जा मीजाकी च मोहीकै आदर जाट्ले।’ 38 टर मोहीकै जब मीजाकी राम्हन लेच डाङा, अनी मेखुरीक-मेखुरीक डेया, ‘इसे च हकवाला हो। रान्ही होसकी साटीङ र होच्यौ हकुङ सम्पत्ति काल्हौ खासीङ।’ 39 होटै होखुरीकै होसकी घोवार अङ्गुर बारीलकीङ बाहीर आल्हार साटा।” 40 होटै येशूये होखुरीककी गीना, “होटबाटै जब अङ्गुर बारीयो मीमुरुङ राल्हे, अनी होचे होसे मोहीकोलाक ही जाट्ले औँला?” 41 होखुरीकै येशूकी जवाफ याहा, “होचे होसे दुष्ट मोहीकोलाक साट्ले, अनी अङ्गुर बारी अरु मोहीकोलाक ठेक्काङ याल्हे, सुये होसकी लहो अङ्गुरौ भाग समयाङ न याल्हे।” 42 येशूये होखुरीककी डेया, “ही नाखुरीकै धर्मशास्त्राङ रीक्च कुरा सेन्र मापरेस्न ने? ‘कुसे ल्हुङ्की इम खास्च कर्मीकै रद्द जाटा, होसे ल्हुङ चहीँ इमौ गारो सोट्च सुर ल्हुङ छाना। इसे परमप्रभु लकीङ न छान्च हो, अनी इसे कानुङ लागी अचम्मौ ले।’ 43 “होटबाटै ङा नाखुरीककी डेले, परमेश्वरौ राज्य अब नाखुरीकलकीङ स्याट्ले, अनी याङ्च काट जाटीकी याल्हे, होचे होच्यौ मीस्या स्याटाक्ले। 44 इसे ल्हुङ मीटाक झाल्च चहीँ भाटार टुक्रा-टुक्रा छान्ले, टर सु मीटाक इसे ल्हुङ झाल्ले, होसे चहीँ ढुलोपीठो छान्ले।” 45 जब मुख्य पुजाहारीको र फरीसीकै येशूये डेच उदाहरण सेया, अनी होसकै इसे होखुरीकुङ बारेयाङ न डेच हो डेयार वार्हा। 46 अनी होखुरीकै होसकोकी घोकी पा, टर भर्मीको लकीङ बीर्हीया, हीजैडेनाङ भर्मीकै येशूकी अगमवक्ता हो डेम मन्डीमन्या। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.