मत्ती 20 - पुर्वीय मगरअङ्गुर बारीयो य्हामीकुङ उदाहरण 1 “स्वर्गौ राज्य चहीँ याङ्च हो। कागोराक न काट जना बारीयो मीमुरुङ लहो अङ्गुर बारीयाङ काम लैडीकी भर्मी पाकी ख्योहा। 2 ‘कायाकौ ज्याला चाँडीयो काट सीक्का याल्हे’ डेम भर्मीकोलाक काम लैडीया। 3 जब होसे नौ बजे पट्टी बजाराङ नुङा, होला कुडीक जना भर्मीको काम माछानार होट न टोङ्ह ङुच डाङा। 4 होचे होसे भर्मीकोलाक डेया, ‘नाखुरीक र ङौ अङ्गुर बारीयाङ नुङार काम जाट्नी, ङा नाखुरीकै डुप्की पर्च ज्याला याल्हे।’ 5 होटै होखुरीक काम जाट्की नुङा। फेरी होचे बार्ह बजे पट्टी र सोम बजे पट्टी बाहीर ख्योहार होटजाट्न न अरु भर्मीकोलाक र कामाङ लैडीया। 6 फेरी होटजाट्न न बाङा बजे पट्टी बाहीर ख्योहा, होडीक बेला र कुडीक जना भर्मीको काम मालेम टोङ्ह ङुच डाङा। अनी होचे होखुरीककी गीना, ‘नाखुरीक हीजै इला डीनभरी काम बीना न टोङ्ह ङुच?’ 7 होखुरीकै जवाफ याहा, ‘कानकी सुयेर कामाङ मालैडीया।’ अनी होचे होखुरीककी डेया, ‘नाखुरीक र नुङार ङौ अङ्गुर बारीयाङ काम जाट्नी।’ 8 “होटै नाम्बीकरखीङ अङ्गुर बारीयो मीमुरुङै लहो काम जाट्चकुङ नाइक्याकी आर्घार डेया, ‘य्हामीकोलाक आर्घार ज्याला योहो न्हुइङ राछ लकीङ लार अगाडी राछको पट्टकी न।’ 9 अनी बाङा बजे कामाङ लक्डीस्चको राहा र होखुरीक पट्टकै पुरा डीनौ ज्याला काट-काट चाँडीयो सीक्का डुपा। 10 पट्ट डेनाङ पहीला कामाङ लक्डीस्चको र राहा र होखुरीकै चहीँ वास्टै डुप्ले डेम विचार जाटा। टर होखुरीक पट्टये कायाकौ काट-काट चाँडीयो सीक्का डुपा। 11 होखुरीकै लाहा लहो ज्याला लाम भ्यारखीङ बारीयो मीमुरुङ लेठाङ नुङार गन-गन जाट्की ठाला। 12 होखुरीकै डेया, ‘इसे न्हुइङ राछ भर्मीकै च काट घन्टा मट्टै काम जाटा, टर नाकै होखुरीककी कान खान्छ नाखान सहडीयार डीन भरी काम जाट्चकोलाक टडीक न ज्याला याहा।’ 13 टर मीमुरुङै होखुरीक मध्याङ काट जनाकी जवाफ याछै डेया, ‘लाफा, ङै नाको मीटाक हीर अन्याय माजाट्ने। ही नाको पुरा कायाकौ ज्यालाङ काम जाट्की राजी छान्च होइन र? 14 नाकै डुप्की पर्च ज्याला लार इमाङ नुङ्नी। ङा इसे ढीलो राछकोलाक र नाकोकी टडीक न ज्याला याछ मीमन ले। 15 ही ङाकी लहो पैसा ङाकी मीमन सेचकोलाक याखी ङौ अधिकार माले र? ङा उडार छान्नाङ हीजै नाङ मीरीस जाट्ले?’” 16 येशूये डेया, “इटजाट्न न न्हुङ्लाकुङ पहीला र पहीलुङको न्हुङ्लाक छान्ले।” येशूये लाहा सीकी पर्च कुरा फेरी डेच ( मर्कूस १०:३२-३४ ; लुका १८:३१-३४ ) 17 यरूशलेमलाक नुङ्ङ न लेनाङ येशूये लहो बार्ह जना चेलाकोलाक काट पट्टी आल्हार डेया, 18 “ङोस्नी, काल्हा ढेनाम यरूशलेम पट्टी नुङ्ङ न ले। होला भर्मीयो मीजाकी मुख्य पुजाहारीको र धर्मगुरुकुङ मीहुटाङ याल्हे। अनी होखुरीकै होसकोकी मृत्युदण्डौ योग्य ठहरीले। 19 अनी होसकोकी गील्ला जाट्की, कोर्रा ङाप्की, र क्रूसाङ टङ्गडीकी डेम होखुरीकै अन्यजातिकुङ मीहुटाङ सुम्पडीम याल्हे। र सोम याकाङ होसको सीच लकीङ फेरी जीवाम सोले।” मोयो बिन्ती ( मर्कूस १०:३५-४५ ; लुका २२:२४-२७ ) 20 जब्डीयो नीस लेन्जामीजाकी मेन मोये लार येशू लेठाङ राहा। अनी होसकुङ अघी घुँडा टुसार होसको खाटा बिन्ती जाटा। 21 अनी येशूये होसकी गीना, “लु डेनी, ही चहडीसा?” होचे होसकोकी डेया, “बिन्ती ले, नाकुङ राज्याङ ङौ इसे नीस लेन्जा मीजाको नाकुङ डोर र डेब्र्यापट्टी ङुकी डुप्ख्यो।” 22 टर येशूये होखुरीककी डेया, “नाखुरीकै ही ङेम्हन ले, होसे नाखुरीक माव्हारले। ही ङै गाकी पर्च डुखौ कचौरा लकीङ नाखुरीक गाकी य्होक्ले?” होखुरीकै डेया, “कान य्होक्ले।” 23 येशूये होखुरीककी डेया, “ङै गाच कचौरा लकीङ नाखुरीक र गाले, टर ङौ डोर र डेब्र्यापट्टी ङुकी याछ कुरा चहीँ ङौ मीहुटाङ माले। इसे ठाउँको च ङौ बोये सुओ लागी तयार खास्नने, होखुरीकुङ लागी मट्टै हो।” 24 जब इसे कुरा अरु डस जना चेलाकै सेया, अनी होखुरीक होसे नीस जना डाजेभाइ खाटा मीरीस ख्योहा। 25 टर येशूये होखुरीक पट्टकी काठोवाङ आर्घार डेया, “नाखुरीककी थाहा न ले, अन्यजातिकुङ शासककै लहो पर्जाको मीटाक लहो खुसी जाटार हक क्योट्ले अनी बाड्को भर्मीकै होखुरीक मीटाक अधिकार क्योट्ले। 26 अनी नाखुरीक मीघ्याङ चहीँ होङ्च छान्की माछान्ले। टर सु नाखुरीक मध्याङ बाड्को छान्की मीमन जाट्ले, होचे अरु पट्टकुङ सेवा जाट्की पर्ले। 27 नाखुरीक मध्याङ सु पहीला छान्च मीमन जाट्ले, होसे अरुकुङ डास छान्की पर्ले। 28 होटजाट्न न भर्मीयो मीजा र सेवा डुप्की होइन टर सेवा जाट्की र वास्टै जनौ छुट्कारौ लागी लहो जीवन याखी राछ हो।” येशूये नीस जना मीमीक माडाङ्चकोलाक गेपाक्च ( मर्कूस १०:४६-५२ ; लुका १८:३५-४३ ) 29 येशू र मेकुङ चेलाको यरीहो लकीङ नुङ्ङ न लेनाङ, भर्मीकुङ बाड्को भीड होसकुङ न्हुङ-न्हुङ लक्डीसा। 30 नीस जना मीमीक माडाङ्च भर्मीको लामौ छेवाङ ङुम-ङुमन्या। अनी होखुरीकै येशू होसे लामलकीङ न नुङ्ङ न ले डेच सेया, टब होखुरीक इट डेम च्याका, “ए प्रभु, दाउदौ मीजा, कान मीटाक दया जाट्न यान्ही!” 31 भर्मीकै होखुरीककी “माच्याक्नी” डेयार हक्कारीया। टर होखुरीकै झन चीघारीसार डेया, “ए प्रभु, दाउदौ मीजा, कान मीटाक दया जाट्नी!” 32 टब येशू टोङ्हा र होखुरीककी आर्घार गीना, “नाखुरीकुङ लागी ङै ही जाट्न येहीङ?” 33 होखुरीकै डेया, “ए प्रभु, कानै मीमीक डाङ्की य्होकीङ!” 34 येशूकी रोम सेया र होखुरीकुङ मीमीक छुम याहा। र होडीक न बेला होखुरीकै मीमीक डाङ्की य्होका, होटै होखुरीकै येशूकी डुटा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.