मत्ती 19 - पुर्वीय मगरछोड पत्र ( मर्कूस १०:१-१२ ) 1 येशूये इसे कुराको डेम भ्याच न्हुइङ, होसको गालील डासार यर्दन नदि पारी यहूदौ इलाका पट्टी नुङा। 2 भर्मीकुङ बाड्को भीड होसको न्हुङ-न्हुङ राहा, अनी होला होखुरीक मध्युङ कुडीक जना छाचकोलाक होसकै गेपाका। 3 कुडीक जना फरीसीको येशू लेठाङ राहार होसकुङ मन खुसकी डेम गीना, “कानुङ व्यवस्था अनुसार सुयेर लहो मास्टोकी हीर कारनै छोड पत्र याखी खाट्ले की माखाट्ले?” 4 टर होसकै जवाफ याहा, “ही नाखुरीकै धर्मशास्त्राङ मापरेस्न ने? सुरुवाङ सृष्टि जाट्चये लेन्जा र मास्टो खासा। 5 होसकै डेया, ‘होटबाटै भर्मीये लहो मोइ-बोइकी डासार लहो मास्टोखाटा खाट्न ङुले र होसे नीस जना काट न जीउ छान्ले।’ 6 होखुरीक अब नीस होइन, टर काट न जीउ छान्नने। होटबाटै परमेश्वरै सुकी काठोवाङ न जोडीमने, होखुरीककी सुयेर माभाक्ख्यो।” 7 फरीसीकै येशूकी गीना, “इडीक होटडेनाङ मोशै हीजै लेन्जै लहो मास्टोकी छोड पत्र रीकार डास्च आज्ञा याहा ट?” 8 होसकै जवाफ याहा, “नाखुरीकुङ कठोर मीमनै जाट्न न मोशै मास्टो डास्च अनुमटी नाखुरीककी याछ हो। टर सुरुवाङ च याङ्च मालेया। 9 ङा नाखुरीककी डेले, सुये व्यभिचारौ दोष बाहेक लहो मास्टोकी डासार अर्कोकी ब्याहा जाट्ले, होसे लेन्जै र व्यभिचार न जाट्ले।” 10 चेलाकै येशूकी डेया, “लेन्जा-मास्टौ सम्बन्ध याङ्च न हो डेनाङ च, ब्याहा माजाट्की न सेम्ह छान्ले।” 11 येशूये होखुरीककी जवाफ याहा, “पट्ट न भर्मीकै इसे वचन ग्रहण जाट्की माय्होक्ले। होखुरीकै मट्टै य्होक्ले सुकी परमेश्वरै बुझडीस्च शक्ति याल्हे। 12 हीजैडेनाङ कुडीक जना चहीँ डीन्न्हाङ न नपुङ्सक छान्ले, र कुडीक जना चहीँ भर्मीये खास्च नपुङ्सक छान्ले, कुडीक जना चहीँ स्वर्गौ राज्यौ लागी ब्याहा माजाट्न न ङुकी चुन्डीचको र छान्ले। सुये इसे ग्रहण जाट्की य्होक्ले, होचे होसे ग्रहण जाट्ख्यौ।” येशू र मार्जा जजाको ( मर्कूस १०:१३-१६ ; लुका १८:१५-१७ ) 13 होडीक बेला येशूये जजाको मीटाक मीहुट डार प्रार्थना जाट्न याख्यो डेयार भर्मीकै लहो मा-मार्जा जजाकोलाक येशू लेठाङ राका। टर चेलाकै होसे भर्मीकोलाक हक्कारीया। 14 टर येशूये डेया, “मार्जा जजाकोलाक ङा लेठाङ राखी यान्ही होखुरीककी मारोक्डीनी। हीजैडेनाङ स्वर्गौ राज्य याङ्चकुङ न हो।” 15 येशूये जजाको मीटाक मीहुट डार आसीस याम्ह भ्याच न्हुइङ होसको होटै व्हाकी क्योटा। धनी रेन्जा भर्मी ( मर्कूस १०:१७-३१ ; लुका १८:१८-३० ) 16 काट जना रेन्जा भर्मी येशूलेठाङ राहार गीना, “ए गुरु, सेन्र मासीच जीवन डुप्की ङै कुङ्च सेछ काम जाट्की पर्ले?” 17 येशूये होसकी डेया, “सेछ ही हो होसे विषयाङ नाको ङाकी हीजै गीन्ले? असल च काट जना मट्टै ले। टर नाको सेन्र मासीच जीवन डुप्च मीमन जाट्ले डेनाङ, आज्ञाको पालना जाट्नी।” 18 होचे येशूकी गीना, “कुसे-कुसे आज्ञाको चहीँ हो?” येशूये डेया, “नाकै भर्मी मासाट्की, व्यभिचार माजाट्की, माखुस्की, झुटो गबाही माय्हाखी, 19 लहो मोइ-बोइकी आदर जाट्की, लहो छीमेकी कोलाक लाहाकी लेखा न माया जाट्की।” 20 होसे रेन्जा भर्मीये होसकोकी डेया, “इसे पट्ट न आज्ञाको च ङै मन्डीमने। अझै अरु ङै ही जाट्की पर्ले?” 21 येशूये होसे रेन्जा भर्मीकी डेया, “नाको सिद्ध छान्की मीमन जाट्ले डेनाङ, नुङार नाकोखाटा लेच पट्ट न आर्लार गरीबकोलाक यान्ही र नाकै स्वर्गाङ धन डुप्ले। होटै राहार ङाकी डुट्नी।” 22 जब याङ्च कुरा सेया टब होसे रेन्जा भर्मीये मीटाहा छुम्छ खासार नुङा, हीजैडेनाङ होच्यो वास्टै धन-सम्पत्ति लेया। 23 अनी येशूये लहो चेलाकोलाक डेया, “साँच्ची न, ङा नाखुरीककी डेले, स्वर्गौ राज्याङ पर्की धनी भर्मीकी गार्हो छान्ले। 24 फेरी ङा नाखुरीककी डेले, धनी भर्मीकी परमेश्वरौ राज्यभीत्री पर्की डेनाङ च बरु उँटकी आर्चौ व्हाङीङ पर्की सजीलो छान्ले।” 25 चेलाको इसे कुरा सेयार छक्क पर्चै गीना, “होट डेनाङ सुये चहीँ मुक्ति डुप्की य्होक्ले ट?” 26 येशूये होखुरीककी ङोसार डेया, “भर्मीकुङ लागी इसे कुरा छान्की माय्होक्ले, टर परमेश्वरौ लागी चहीँ पट्ट न कुरा छान्की य्होक्ले।” 27 होटै पत्रुसै होसकोकी डेया, “ङोस्नी कानै च पट्ट न ठोक डासार नाकोकी डुट्नने। कानै चहीँ ही डुप्ले ट?” 28 येशूये होखुरीककी डेया, “साँच्ची न, ङा नाखुरीककी डेले, नाखुरीक ङाकी डुट्चको, जब परमेश्वरै पट्ट ठोक नयाँ खास्ले भर्मीयो मीजा लहो महीमौ सिंहासनाङ ङुले, होडीक बेला नाखुरीक र बार्ह सिंहासनाङ ङुले र इस्राएलुङ बार्ह कुलमीटाक शासन जाट्ले। 29 ङौ म्यार्मीनौ खाटीर सु-सुये लहो इम, डाजेभाइको, डै-बहीनीको, मोइ-बोइ, मीजाको, जग्गाको डास्ले, होचे इसे डेनाङ सय गुना वास्टै डुप्ले र सेन्र मासीच जीवन र डुप्ले। 30 टर चाहाँ वास्टै अघी लेचको न्हुङ्लाक छान्ले, र वास्टै न्हुङ्लाक लेचको अघी छान्ले।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.