मत्ती 18 - पुर्वीय मगरपट्ट डेनाङ बाड्को सु हो? ( मर्कूस ९:३३-३७ ; लुका ९:४६-४८ ) 1 होडीक बेला चेलाको राहार येशूकी गीना, “स्वर्गुङ राज्याङ पट्ट डेनाङ बाड्को सु हो?” 2 येशूये काट मार्जा जजाकी खेरेप आर्घार होखुरीकुङ मीघ्याङ टोङ्खी लैडीया। 3 र डेया, “साँच्ची न ङा नाखुरीककी डेले, लहो मीमन परिवर्तन जाटार नाखुरीक मार्जा जजाको लेखा न माछाना डेनाङ सेन्र स्वर्गौ राज्याङ पर्की माय्होक्ले। 4 टर सुये इसे मार्जा बालक लेखा न लाहाकी नम्र खास्ले, होसे न स्वर्गौ राज्याङ पट्ट डेनाङ बाड्को छान्ले। 5 सुये ङौ म्यार्मीनाङ काट मार्जा बालककी ग्रहण जाट्ले, होचे ङाकी र ग्रहण जाट्ले। पापाङ पार्च कुराको ( मर्कूस ९:४२-४८ ; लुका १७:१-२ ) 6 “इडीक सुयेर ङा मीटाक विश्वास जाट्च इसे मार्जा बालकको मध्याङ काट जनाकीर पाप जाट्की लैडीले डेनाङ, बरु होच्यो मीघाटीयाङ बाड्को झाँटा च्योलोकार लुप्च समुन्द्राङ लोम्हकाकी न सेम्ह छान्ले। 7 भर्मीकोलाक पाप जाट्की लैडीच कुराकुङ लागी इसे संसारकी धिक्कार! याङ्च कुराको च राखी न पर्ले, टर धिक्कार होसे भर्मीकी सुलकीङ पाप जाट्की लैडीच कुराको राल्हे! 8 “इडीक नुओ मीहुट वा मीखुटेइ नाङ्की पापाङ पार्ले डेनाङ होसकी चेयार लोम्हकौ। नीस न मीहुट वा मीखुट्या लार सेन्र मासीच म्हेयाङ पर्की डेनाङ च डुड्या र लङ्गडो छानार सेन्र मासीच जीवन डुप्की न सेम्ह छान्ले। 9 इडीक नुओ मीमीकै नाङ्की पाप जाट्की लैडीले डेनाङ, होसकी डोनार लोम्हकौ। नीस मीमीक खाटा नरकुङ म्हेयाङ नुङ्की डेनाङ च बरु काट मीमीक खाटा मट्टै सेन्र मासीच जीवन डुप्की सेम्ह छान्ले। म्हाट्च भेडौ उदाहरण ( लुका १५:३-७ ) 10 “होसीयार छान्नी, नाखुरीकै इसे मार्जाको मध्याङ काट जनाकीर हेला माजाट्नी। ङा नाखुरीककी डेले, स्वर्गाङ लेच होखुरीकुङ डुटको सढैँ स्वर्गुङ ङौ बोयो म्याहासाङ ङुम ङुले। 11 [हीजैडेनाङ भर्मीयो मीजा च म्हाट्चकोलाक जीवाक्की डेम राछ हो।] 12 “नाखुरीककी कुङ्च सेले? काट जना भर्मीयो काट सय वटा भेडा लेया, होसे मध्याङ काट भेडा लाम ल्हीटार म्हाटा डेनाङ, होचे उनान्सय वटा भेडाकोलाक चर्हनाङ न डासार होसे लाम ल्हीटार म्हाट्च भेडाकी पाकी मानुङ्ले र? 13 ङा साँच्ची न नाखुरीककी डेले, अनी होसे लाम ल्हीटार म्हाट्च भेडाकी डुपा डेनाङ, अरु लाम माल्हीट्च उनान्सयौ डेनाङ होसे काटौ लागी होसे मार्हाङ्ले। 14 होटजाट्न न इसे मार्जा बालकको मध्याङ काट जना र माम्हाट्ख्यौ डेच नाखुरीकुङ स्वर्गाङ लेच बोयो इच्छा ले। अपराध जाट्च भाइ ( लुका १७:३ ) 15 “इडीक कुसेर विश्वासीये नुओ विरुद्धाङ पाप जाटा डेनाङ, नुङार होसे र नाङ नीस जना मीघ्याङ मट्टै होसे पाप टान्हाक्ङ योहो। अनी होचे नुओ कुरा सेया डेनाङ, नुओ भाइ छाना। 16 टर होचे नुओ कुरा मासेया डेनाङ अरु काट नीस जनाकीर आल्खी, अनी नीस अठबा सोम जना साक्षी लकीङ पट्ट न कुरा पक्का छान्ख्यौ। 17 इडीक होचे होखुरीकुङ कुरा र सेकी मामन्डीया डेनाङ, नुङार इसे कुरा मण्डलीकी डेम योहो। अनी होचे मण्डलीयो कुरा र सेकी मामन्डीया डेनाङ, अब होसे नुओ लागी मुर्ति पुजा जाट्च र कर सोट्चको सरह छान्ख्यौ। 18 “ङा साँच्ची न नाखुरीककी डेले, नाखुरीकै पृथ्वीयाङ ही छ्याक्ले, होसे स्वर्गाङ र छ्याक्ले। अनी नाखुरीकै पृथ्वीयाङ ही पीसाक्ले, होसे स्वर्गाङ र पीसाक्ले। 19 फेरी ङा नाखुरीककी डेले, पृथ्वीयाङ नाखुरीक मध्याङ नीस जनै कुसेर कुराङ खाटार हीर कुरा ङेहा डेनाङ, स्वर्गाङ लेच ङौ परमेश्वर बोये नाखुरीकुङ लागी होसे याल्हे। 20 हीजैडेनाङ कुला नीस की सोम जना ङौ म्यार्मीनाङ भेला छान्ले, होला ङा होखुरीकुङ मीघ्याङ छान्ले।” निर्दयी नोकरौ उदाहरण ( लुका १७:४ ) 21 येशू लेठाङ राहार पट्रुसै गीना, “ए प्रभु, सुयेर ङौ विरुद्धाङ पाप जाट्न ङुवा डेनाङ होसकी ङै कुडीक पल्ट सम्म क्षमा याखी? साट पल्टसम्म?” 22 येशूये होसकी जवाफ याहा, “ङा नाङ्की डेले, साट पल्ट होइन, टर सट्टरी गुना साट पल्ट। 23 होटबाटै स्वर्गौ राज्य काट राजा ल्याक्च न हो, होचे लहो नोकरकोखाटा हीसाब लाच मीमन जाटा। 24 जब होसे राजै हीसाब लाकी सुरु जाटा, अनी डस हजार सुनौ सीक्का रीन लाच काट जना भर्मी होसे लेठाङ राका। 25 टर होसे भर्मीये रीन टेरीकी माय्होका। होटबाटै राजै लहो नोकरकी इट डेम हुकुम याहा, ‘होसे भर्मीकी, मेन मास्टो, मेन मीजाको र होसेखाटा लेच पट्ट न ठोक आर्लार रीन चुक्टा जाट्की।’ 26 होसे नोकरै राजौ अघी घुँडा टुसार बिन्ती जाटा, ‘मालीक, ङाकी कालाप लेन्न यान्ही, ङा नाकुङ पट्ट न रीन चुक्टा जाट्ले।’ 27 अनी होसे नोकरौ राजै होसे मीटाक दया जाटार होच्यौ पट्ट न रीन माफ जाट्न याहा र होसकी नुङ्की याहा। 28 “टर होसे नोकरै ख्योहार नुङ्नाङ लाहा खाटा काम जाट्च काट जना नोकरकी डुपा, होसे खाटा होच्यो काट सय चाँडीयो सीक्कौ रीन लेया। होसकी मीघाटीयाङ घोवार होच्ये डेया, ‘नीये ज्याच ङौ रीन टेरीकी क्योटो!’ 29 टर होच्यो लाफा नोकरै होच्यौ अघी घुँडा टुसार बिन्ती जाट्चै डेया, ‘कालाप लेन्न यान्ही, ङा नाकुङ पट्ट न रीन टेरीले।’ 30 टर होसे मामन्डीया र रीन माटेरीठर होसकी झ्यालखानाङ काम याहा। 31 “होसे नीस जनाखाटा न काम जाट्च अरु लाफाकै र होसे पट्ट न कुरा ङोस्न ङुम्या। होखुरीककी एकडम डुख लग्डीसा। होखुरीक नुङार राजाकी पट्ट न कुरा डेम याहा। 32 अनी राजै होसे नोकरकी आर्घार डेया, ‘ए दुष्ट नोकर! नुओ बिन्ती सेयार ङै नाङ्की पट्ट न रीन मीनाहा जाट्न याहा। 33 ङै नाङ्की दया जाट्नाङ लेखा न नीये र लाहाखाटा काम जाट्च लाफाकी दया जाट्की पर्च होइन र?’ 34 राजा मीरीस ख्योहार नोकरै पट्ट न रीन चुक्टा माजाट्ठर होसकी दण्ड याखी झ्यालखानाङ ठुन्च हुकुम याहा।” 35 होटै न्हुइङ येशूये चेलाकोलाक डेया, “नाखुरीकै लहो रीदयलकीङ लहो पट्टकी क्षमा माय्हा डेनाङ स्वर्गाङ लेच ङौ परमेश्वर बोये र नाखुरीककी होङ्च न जाट्ले।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.