लुका 9 - पुर्वीय मगरयेशूये बार्ह जना चेलाकोलाक बीर्न्हकाच ( मत्ती १०:५-१५ ; मर्कूस ६:७-१३ ) 1 येशूये बार्ह जना चेलाकोलाक काठोव्हाङ न आर्घा होटै होखुरीककी पट्ट न दुष्ट आत्माको छ्युकार लगारीच, रोगको गेपाक्च शक्ति र अधिकार याहा। 2 होसकै होखुरीककी परमेश्वरौ राज्यौ बारेयाङ सेटाक्की र छाच कोलाक गेपाक्की डेम बीर्न्हका। 3 होसकै होखुरीककी डेया, “नाखुरीक व्हाच लामाङ लाहा खाटा हीर माबुनी: डाङ्गा, नाम्जा, रोटो, पैसा, होटै नीस कमीज र माबुकी। 4 कुसे इमुङ भर्मीये नाखुरीककी स्वागट जाट्ले, होसे लाङ्घा लकीङ बिदा माछान्ठर होसे न इमाङ ङुनी। 5 कुसे सहराङ नाखुरीककी स्वागट माजाट्ले होसे सहरीङ ख्योन्हाङ चेटावनी याछै लहो मीहीलुङ झाबुल खार्हाम यान्ही।” 6 होटै चेलाको बिदा छानार होखुरीक पट्ट न ठावाङ सेछ समाचार सेटाक्चै छाच कोलाक गेपाक्चै लाङ्घा-लाङ्घा नुङा। शासक हेरोद अलमल्ल पर्च ( मत्ती १४:१-१२ ; मर्कूस ६:१४-२९ ) 7 इसे पट्ट घटनौ बारेयाङ सेयार गालीलौ शासक हेरोद अलमल्ल छाना। हीजैडेनाङ बप्तिस्मा याछ युहन्ना सीच लकीङ जीवामे डेम कुडीक भर्मीकै डेमन्या। 8 कुडीकै चहीँ एलीयाकी डाङा डेम डेमन्या। होटै कुडीकै चहीँ खायाकुङ अगमवक्ता मढ्याङ काट सोमने डेमन्या। 9 होटै हेरोदै डेया, “युहन्नौ मीटालु च ङै न छ्योलोक्की लैडीच हो। टर होसे भर्मी सु आले, होच्यौ बारेयाङ ङा याङ्च कुराको सेमन ले?” होटै हेरोदै येशूकी डुप्की मीमन जाटा। येशूये बाङा हजार भर्मीकोलाक कास्च ( मत्ती १४:१३-२१ ; मर्कूस ६:३०-४४ ; युहन्ना ६:१-१४ ) 10 बार्ह जना प्रेरितको सेछ समचार सेटाक्ङ ल्हेस्रखीङ मेखुरीकै जाट्च पट्ट न कुराको येशूकी सेटाका। होटै होसकै होखुरीककी लार मेखुरीक मट्टै बेथसेदा डेच सहराङ नुङा। 11 टर याङ्च कुरा थाहा डीन्हार वास्टै भर्मीकै होसकोकी डुटा। होसकै होखुरीककी स्वागट जाटा र परमेश्वरौ राज्यौ बारेयाङ सेटाका, होटै छाच लकीङ गेप्की मीमन जाट्चकोलाक गेपाका। 12 होटै नाङ्खान कीम्खी पानाङ बार्ह जना चेलाको राहार होसकोकी डेया, “भीडकी बिदा यान्ही, र होखुरीक नुङार खेरेपुङ लाङ्घाङ बास ङुख्यौ, र ज्याच ठोकको पाख्यौ। हीजैडेनाङ इसे हीर मालेच ठाउँ हो।” 13 टर येशूये होखुरीककी डेया, “नाखुरीकै न इखुरीककी ज्याकी यान्ही।” होटै होखुरीकै डेया, “कान खाटा बाङा रोटो र नीस डीस्या मट्टै ले। नभा कान नुङार इसे पट्ट न भर्मीकुङ लागी ज्याच ठोक लोकी पर्ले औँला।” 14 होला बाङा हजार टडीक लेन्जा भर्मीको लेया। येशूये चेलाकोलाक डेया, “इसे भर्मीकोलाक पचास-पचास जानौ लहराङ ङुवाक्नी।” 15 होखुरीकै पट्ट भर्मीकोलाक होटजाट्न न ङुवाका। 16 होटै येशूये होसे बाङा रोटो र नीस डीस्या लार स्वर्ग पट्टी ङोस्चै धन्यवाद याहा, होटै होसकै रोटो र डीस्याकी ग्याकार भर्मीकोलाक पुङ्ङ याखी डेम चेलाकोलाक याहा। 17 पट्टकै र्हास्ठर ज्या। होटै ज्याम माबान्छ टुक्राको चेलाकै बार्ह डालो सोटा। पत्रुसै येशूकी मुक्ति याछ ख्रीष्ट डेम सुइकारीच ( मत्ती १६:१३-२३ ; मर्कूस ८:२७-३३ ) 18 कायाक येशू लाहा काट्न प्रार्थना जाट्न न लेया। चेलाको र होसको खाटा लेया। होटै होसकै होखुरीककी गीना, “भर्मीकै ङाकी सु हो डेले?” 19 होखुरीकै डेया, “कुडीकै बप्तिस्मा याछ युहन्ना डेले, कुडीकै एलीया र डेले, र कुडीकै चहीँ खायाकुङ अगमवक्ताको मढ्याङ काट फेरी सोमने डेले।” 20 होसकै होखुरीककी डेया, “टर नाखुरीक चहीँ ही डेले? ङा सु हो?” पत्रुसै जबाफ याहा, “नाको परमेश्वरै बीर्न्हकाच मुक्ति याछ ख्रीष्ट हो!” 21 होटै येशूये इसे कुरा सुकीर मासेटाक्की डेम आज्ञा याछै होखुरीककी चेटावनी याहा। 22 होसकै इट र डेया, “भर्मीयो मीजै वास्टै डुख सोट्की पर्ले, होसकी अगुवाकै, मुख्य पुजाहारीकै, धर्मगुरुकै माजाक्ले। आसकोकी साट्ले टर सीच सोमयाकाङ जीवाम सोले।” चेला छान्नाङ पट्ट न ठोक डास्की पर्च ( मत्ती १६:२४-२८ ; मर्कूस ८:३४–९:१ ) 23 होटै होसकै पट्टकी डेया, “सुर ङौ न्हुङ-न्हुङ राछ मीमन जाट्ले डेनाङ होचे लहो मीमन अनुसार जीवाच इच्छाकी डास्की पर्ले। होटै डीन-डीनै लहो क्रूस बुवार ङाकी डुट्की पर्ले। 24 हीजैडेनाङ सुये लहो प्राण जीवाक्च मीमन जाट्ले होचे होसे गुमडीले। टर सुये ङौ लागी लहो प्राण गुमडीले होचे होसे जीवाक्ले। 25 भर्मीये संसारकी न मीहुटाङ पार्नाङ र लाहाकी चहीँ नास पार्ले वा गुमडीले डेनाङ ही फाइडा छानार? 26 टर सुर ङौ बचन लकीङ काराले डेनाङ भर्मीयो मीजा र लहो महीमाङ, र परमेश्वर बोयो होटै पवित्र दूतगनको महीमाङ रान्हाङ होसे खाटा काराले। 27 टर साँच्ची न ङा नाखुरीककी डेले, परमेश्वरौ राज्यकी माडाङ्ठर इला टोङ्छ कुडीक जनै चहीँ मृत्युकी अनुभव जाट्की मापर्ले।” येशूओ रुप फेरीस्च ( मत्ती १७:१-८ ; मर्कूस ९:२-८ ) 28 इसे कुरा डेच आठ याक न्हुइङ पत्रुस, युहन्ना र याकुबकी लाहा खाटा लार प्रार्थना जाट्की डेम होसको डाँडाङ नुङा। 29 होटै होसकै प्रार्थना जाट्न ङुच बेलाङ होसकुङ मीटहौ रुप फेरीसा र होसकुङ बढीन सर्घाङ पीज्याछ लेखा न चम्कडीस्न बोच छाना। 30 होटै होला नीस जना भर्मी डाङा र येशूखाटा ङाक्की ठाला। होखुरीक मोशा र एलीया लेया। 31 होखुरीक स्वर्गुङ महीमीत रुपाङ राम्ह येशू सीकी पर्ले डेच बारेयाङ कुरा जाट्न न लेया। इसे कुरा चहीँ होसकै यरूशलेमाङ पुरा जाट्की पर्च लेया। 32 पत्रुस र मेन लाफाको मीमीक झुकार लट्ठै छानन्या। टर रीङ्र्हखीङ होखुरीकै होसकुङ महीमा र होसको खाटा टोङ्छ होसे नीस जना भर्मीकोलाक डाङा। 33 होटै होखुरीक होसको खाटा भार नुङ्की पानाङ पत्रुसै येशूकी डेया, “गुरुज्यु, काल्हाकी इला न ङुकी सेम्ह लेसा। काल्हा बास ङुच सोम गोठ खासीङ। काट नाकोकी, काट मोशाकी, र काट एलीयाकी।” टर पत्रुसकी लहे ङाक्च कुरा थाहा न मालेया। 34 पत्रुसै इसे कुरा ङाक्नाङ-ङाक्नाङ होला डेबु राहार होखुरीककी हुपा होटै होखुरीक डेबु भीत्री पर्की पानाङ चेलाको बीर्हीया। 35 होडीक न बेला डेबु लकीङ इट डेच सोर सेया, “इसे ङौ मीजा हो, इसकोकी ङै भाक्ङने इसकुङ बचन सेनी।” 36 याङ्च शब्द सेम भ्यारखीङ होला येशू मेखोल्हा काट न छाना। होटै चेलाको माच्याक्ङ ङुवा र होखुरीकै डाङ्च कुराको होस बेला सुकीर माडेया। दुष्ट आत्मा लक्डीस्च रेन्जा भर्मी ( मत्ती १७:१४-१८ ; मर्कूस ९:१४-२७ ) 37 पीउर्हाक लेखो येशू र चेलाको डाँडा लकीङ झाला, होटै भर्मीकुङ बाड्को भीड होसकोकी डुप्की डेम राहा। 38 होला भीड लकीङ काट भर्मीये बाड्को सोरै ङाक्चै डेया, “गुरुज्यु! ङा नाको खाटा बिन्ती जाट्ले, ङौ लेन्जा मीजाकी दया जाट्न ङोस्न यान्ही, हीजैडेनाङ इसे ङौ काट्जा लेन्जा मीजा हो। 39 ङोस्नी इसकी काट दुष्ट आत्मै घोले, होटै मोसोमायाङ चीगारीस्ले र इसकी अइठडीले र इचे मेङेरीङ घोचोस छ्युक्ले। होटै लछार पछार जाटार बल्ल-बल्ल डास्ले। 40 ङै नाकुङ चेलाकोलाक दुष्ट आत्माकी छ्युक्ङ यान्ही डेम बिन्ती जाटा, टर होखुरीकै माय्होका।” 41 होटै येशूये होखुरीककी डेया, “ए विश्वास मालेच अट्टेरीको, ङा नाखुरीक खाटा कुडीक याक आङुए? र नाखुरीककी ङै कुडीक सहडीकी?” होटै येशूये होसे भर्मीकी डेया, “नाकुङ मीजाकी इला राक्नी।” 42 होटै होसे रान्हाङ-रान्हाङ न दुष्ट आत्मै होसकी पछारीकी क्योटा र अइठन जाटा र होसे पार्टाङ-पार्टाङ छान्की ठाला। टर येशूये होसे दुष्ट आत्माकी हक्कारीया, होटै होसे मीजाकी गेपाकार मेनो बोइकी जीम्मा याहा। 43 इटजाट्न परमेश्वरौ याङ्च बाड्को शक्तियो काम डाङार पट्ट भर्मीको छक्क पर्या। येशूये जाट्च कामाङ पट्ट भर्मीको छक्क पर्च डाङार होसकै मेखोल्हौ चेलाकोलाक डेया, येशूये लाहा सीचऔ बारेयाङ फेरी डेच ( मत्ती १७:२२-२३ ; मर्कूस ९:३०-३२ ) 44 “इसे ङै नाखुरीककी डेच पट्ट कुरा नाखुरीकै सेम्ह सेनी, हीजैडेनाङ भर्मीयो मीजाकी घोवार भर्मीकुङ मीहुटाङ याछ बेला छान्नने।” 45 टर होखुरीकै इसे कुरा ही डेकी पाच डेयार माबुझडीसा। हीजैडेनाङ इसे कुरा माबुझडीस्ख्यौ डेम होखुरीक लकीङ आर्च्युक्नन्या। होटबाटै चेलाकै इसे कुरा होसको खाटा गीन्की बीर्हीम्या। पट्ट डेनाङ बाड्को सु हो ( मत्ती १८:१-५ ; मर्कूस ९:३३-४० ) 46 होटै बार्ह जना चेलाकै मेखुरीक-मेखुरीक सु चहीँ बाड्को औँला डेम कुरा जाटा। 47 टर येशूये होखुरीकुङ मीमनुङ कुरा वार्हार काट मार्जा जजाकी राकार मेखोल्हौ छेवाङ डा, 48 होटै होखुरीककी डेया, “सुये ङौ म्यार्मीनाङ इसे जजाकी मन्डीले, होचे ङाकी मन्डीले, र ङाकी मन्डीचकै ङाकी बीर्न्हकाचकी मन्डीले। हीजैडेनाङ नाखुरीक मढ्याङ सु मार्जा ले, होसे न पट्ट डेनाङ बाड्को छान्ले।” 49 युहन्नै डेया, “गुरुज्यु, काट भर्मीये नाकुङ म्यार्मीनाङ दुष्ट आत्माको छ्युक्च कानै डाङा। होटै कानै होसकी होङ्च काम जाट्की माय्हा, हीजैडेनाङ होचे कान खाटा नाकै डेच लेखा माजाट्ले।” 50 टर होखुरीककी येशूये डेया, “होसकी मारोक्डीनी, हीजैडेनाङ नाखुरीककी विरोध माजाट्चको नाखुरीकुङ न पक्छाङ छान्ले।” सामरीकै येशूकी माजाक्च 51 येशूओ स्वर्ग नुङ्च बेला खेरेप छान्चै राछबाटै होसको यरूशलेमाङ मानुङ्ङ माडास्ले डेम मीमन जाटा। 52 होसकै समाचार आल्छ भर्मीकोलाक अगाडी न बीर्न्हका। होटै होखुरीक नुङा, होसकोकी डेम ङुच र ज्याच ठोकको टयार जाट्की सामरीकुङ काट लाङ्घाङ नुङा। 53 टर होसको यरूशलेमाङ नुङ्ङ न ले डेम सामरीयौ भर्मीकोलाक थाहा छान्च बाटै होसकोकी सुयेर स्वागट माजाटा। 54 होटै याङ्च कुरा थाहा डीन्हार याकुब र युहन्नै डेया, “प्रभु, नाको इसे लाङ्घाकी स्वर्ग लकीङ म्हे झालाकार बाडाप अट छानै डेम कान अर्हडीइङ?” 55 टर येशूये खार्लाप ल्हेसार होखुरीककी च्याका। 56 होटै होखुरीक अर्को लाङ्घा पट्टी व्हा। चेलाकुङ बानी ( मत्ती ८:१९-२२ ) 57 येशू र होसकुङ चेलाको लामाङ नुङ्चै जाट्नाङ काट भर्मी राहार होसकोकी इट डेया, “ए प्रभु, नाको कुला नुङ्ले, ङा र नाकुङ न्हुङ-न्हुङ राल्हे।” 58 येशूये होसकी डेया, “सीलाकुङ ङुच डुलो ले, ग्वाजाकुङ मीम ले, टर भर्मीयो मीजौ च मीटालु आर्च्युक्च ठाउँ र माले।” 59 होटै अर्को काट भर्मीकी येशूये डेया, “ङा न्हुङ-न्हुङ रान्ही” टर होच्ये डेया, “गुरुज्यु, पहीला नुङार ङौ बोइकी ठाक्की यान्ही।” 60 होसकी येशूये डेया, “मुर्डा कोलाक मुर्डाकै न ठाक्ख्यो। टर नाको चहीँ नुङार परमेश्वरौ राज्यौ बारेयाङ सेछ समचार सेटाक्नी।” 61 काट अर्को भर्मीये र होसकोकी डेया, “प्रभु, ङा र नाको न्हुङ-न्हुङ राल्हे, टर पहीला ङौ इमाङ लेचको खाटा ङाकी बिदा लाकी यान्ही।” 62 होसकी येशूये डेया, “लहो मीहुट गोहोरौ अनवाङ डार न्हुङ्लाक ल्हेसार ङोस्च सुर भर्मीको चहीँ परमेश्वरौ राज्यौ लागी काम मालग्डीस्ले।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.