लुका 8 - पुर्वीय मगरयेशूकी सघडीच मास्टोको 1 होस न्हुइङ येशू परमेश्वरौ राज्यौ बारेयाङ सेछ समाचार सेटाक्चै सहर-सहर र लाङ्घा-लाङ्घाङ व्हाकी ठाला। होसको खाटा बार्ह जना चेलाको र लेया। 2 होस बेला कुडीक मास्टोको र होसको खाटा व्हामन्या र होखुरीक चहीँ दुष्ट आत्मा र रोग लकीङ गेप्चको लेया। होखुरीक मढ्याङ साट वटा दुष्ट आत्मा ख्योम्ह गेप्च मग्डलीनी डेच मरीयम म्यार्मीनौ मास्टो र लेया। 3 होटै हेरोद राजौ दरबाराङ काम जाट्च हाकीम खुजासौ मास्टो योअन्ना खाटा सुसन्ना र अरु वास्टै मास्टोको लेया। होखुरीकै येशू प्रभु र चेलाकोलाक धन सम्पत्ति याहार सहयोग जाट्नन्या। छोयो भेरेट्चौ उखान ( मत्ती १३:१-९ ; मर्कूस ४:१-९ ) 4 होटै वास्टै भर्मीको लाङ्घा र सहर लकीङ येशू लेठाङ राहा। होखुरीककी येशूये काट उखान सेटाका। 5 “काट जना भर्मीये य्हाङ नुङार छोयो भेरेटा। छोयो भेरेट्नाङ कुडीक छोयो लामाङ पर्या र भर्मीकै पीचीया होटै ग्वाजाकै ज्याम याहा। 6 कुडीक छोयो चहीँ ल्हुङ घारीयाङ पर्या। होटै होसे छोयो गीट्की च गीटा, टर चीसो झा मालेचबाटै छोक्की क्योटा। 7 कुडीक छोयो चहीँ जु घारीयाङ पर्या र बीरुवाको खाटा न जुको ल्होङार राहा। होटै होसे बीरुवाकी ल्होङ्की माय्हा। 8 टर कुडीक छोयो चहीँ सेछ झाङ पर्या। होटै सेम्हजा गीटार ल्होङा होचे सय गुना मीस्याको स्याटाका।” इडीक डेम भ्यारखीङ होसकै बाड्को सोरै इट डेया, “सुओ सेच मेन्केप ले होचे सेख्यौ!” उखानौ अर्थ ( मत्ती १३:१०-२३ ; मर्कूस ४:१०-२० ) 9 होटै येशूओ चेलाकै इसे उखानौ अर्थ चहीँ ही आले? डेयार येशूकी गीना। 10 होटै येशूये डेया, “नाखुरीककी च परमेश्वरौ राज्यौ भीत्री कुरा वार्छ ज्ञान याम्हने, टर अरुखाटा चहीँ ङा उखानाङ ङाक्ले, हीजैडेनाङ ‘होखुरीकै ङोस्नाङ र माडाङ्ख्यो र सेम र माबुझडीस्ख्यो’। 11 “इसे उखानौ अर्थ याङ्च हो। छोयो चहीँ परमेश्वरौ बचन हो। 12 लामाङ पर्च छोयो चहीँ होखुरीक हो, परमेश्वरौ बचन सेकी च सेले, टर मीमनाङ डाकी माय्होक्ले, हीजैडेनाङ बचन सेयार विश्वास माजाट्ख्यो र माजीवाख्यो डेम शैतानै होखुरकुङ मीमन लकीङ बचन ढुमार आल्खी क्योट्ले। 13 ल्हुङ घारीयाङ पर्च चहीँ होखुरीक हो, बचन सेयार खुसी खाटा ग्रहण जाट्ले। टर होच्यो जरा माछान्ले, होखुरीकुङ विश्वास चहीँ कालापौ लागी मट्टै छान्ले। टर परीक्षौ बेलाङ होखुरकुङ पटन छान्ले। 14 जु घारीयाङ पर्च छोयो होखुरीक हो, बचन च सेले, होटै न्हुइङ जीवनौ चीन्टा, संसारुङ धन सम्पत्ति र मोज मज्जाङ पर्यार ल्होङ्की माडीन्ल्हे होटै होच्यो मीस्या म्हीन्की माडुप्ले। 15 टर असल झाङ पर्च छोयो चहीँ होकुरीक हो, बचन सेयार सेछ र भलो रीदयाङ जोगडीम डाले, होटै लेन्न र मीस्या स्याटाक्ले। ढाच बट्टीयो उखान ( मर्कूस ४:२१-२५ ) 16 “बट्टी ढाकार कुचेर डालोये माहुप्ले, न खाट म्होकी डाले। बरु इम भीत्री राछ कोलाक ट्याङ्ख्यो डेम बट्टीकी सामदानाङ डाले। 17 इटजाट्न न आर्च्युकार डाच ही-ही ले, होसे पट्ट न डाङ्ले र माबुझडीस्च ही-ही कुराको ले होसे र पट्ट न थाहा डीन्ल्हे, होटै पट्टकै बुझडीस्ले। 18 होटबाटै नाखुरीकै सेच कुरा मीमनाङ सेम्हजा डानी, हीजैडेनाङ सु खाटा ले होसकी झन फाट्न याल्हे, टर सु खाटा हीर माले, होचे लाहा खाटा हीले डेम आर्मीट्ले होसे र होस लकीङ स्याट्न याल्हे।” येशूओ मोइ र भाइको ( मत्ती १२:४६-५० ; मर्कूस ३:३१-३५ ) 19 कायाक येशूकी डुप्की डेम मेखोल्हौ मोइ र भाइको राहा। टर वास्टै भर्मीकुङ भीडै जाट्नाङ होसकुङ खेरेप राखी माय्होका। 20 होला लेचकै येशूकी डेया, “नाकोकी डुप्की डेम नाकुङ मोइ र भाइको बाहीर टोङ्ह ङुमे।” 21 येशूये होखुरीक पट्टकी डेया, “सुये परमेश्वरौ बचन सेले र मन्डीले होखुरीक न ङौ मोइ र भाइको हो।” येशूये नाम्सु र समुन्द्रौ छाल बाहा ( मत्ती ८:२३-२७ ; मर्कूस ४:३५-४१ ) 22 कायाक येशू लहो चेलाको खाटा डुङ्गाङ काल्हार डेया, “कान टाल पार्लाक नुइङ है” होटै होखुरीक डुङ्गाङ काल्हार व्हा। 23 नुङ्ङ न लेनाङ येशू मीमीक झुकार मीसा। होडीक न बेला बाड्को नाम्सु र समुन्द्रौ छाल राहा र डुङ्गाङ डी न्हेप्की पा होटै होखुरीक आपटाङ पर्या। 24 होटै चेलाको येशू छीनी राहार होसकोकी सोट्चै इट डेकी ठाला, “ए गुरुज्यु, काल्हाको ठाखी पाम भ्या।” होटै येशू सोवार नाम्सु र समुन्द्रौ छालकी हक्कारीया। होडीक न बेला नाम्सु र समुन्द्रौ छाल बाहा र सान्ट छाना। 25 होटै येशूये चेलाकोलाक डेया, “नाखुरीकुङ विश्वास कुला नुङा?” चेलाको होसे कुरा डाङार छक्क पर्या, होटै बीर्हीचै मेखुरीक-मेखुरीक इट डेयार कुरा जाट्की ठाला, “इसको सु आले? होसकै हक्कारीनाङ च नाम्सु र समुन्द्रौ छाल र बाछ लेसा!” दुष्ट आत्मा लक्डीस्च भर्मी गेप्च ( मत्ती ८:२८-३४ ; मर्कूस ५:१-२० ) 26 होटै येशू मेखोल्हौ चेलाको खाटा गालील लकीङ पार्लाक गेरासेनसौ ठावाङ टाहा। 27 होटै डुङ्गा लकीङ ख्योर्हखीङ येशूये होसे सहरुङ काट भर्मीकी डुपा होसकी दुष्ट आत्मा लक्डीस्नन्या। होसे भर्मीये वास्टै समय लकीङ बढीन माबील्न्या। होटै इमाङ माङुमन चीहानौ ओडाराङ ङुम व्हामन्या। 28 होचे येशूकी डाङ्च बीट्टीकै साफ्फी चीघारीसार होसको अगाडी खुखुप छानार डेया, “ए कराङ्छ परमेश्वरौ मीजा येशू, नाकुङ ङाखाटा ही काम? ङा बिन्ती जाट्ले ङाकी डुख माय्हानी।” 29 येशूये दुष्ट आत्माकी ख्योव्हार नुङ्ना डेयार आज्ञा याम्हन्या। होटबाटै होसे भर्मीये इटजाट्न ङाक्न्या। वास्टै खेप दुष्ट आत्मै होसे भर्मीकी डुख याम्हन्या। फलामौ साङ्लीये मीहुट मीखुट्याङ छ्याकार डानाङ र होसे भर्मीये साङ्ली भाराक्की क्योट्न्या होटै होसे भर्मीकी दुष्ट आत्मै उजाड-ठाँवाङ आल्न्हन्या। 30 येशूये होसकी गीना, “नुओ म्यार्मीन ही हो?” होचे डेया, “फौज”। हीजैडेनाङ होसे भर्मीकी वास्टै दुष्ट आत्मा लक्डीस्नन्या। 31 होखुरीककी अटल कुन्डाङ माबीर्न्हकाख्यौ डेम होखुरीकै येशूकी बिन्ती जाटा। 32 होसे डाँडौ पाखाङ वास्टै वाकौ हुलको स्यास्न ङुमन्या। होटबाटै दुष्ट आत्माकै वाकौ हुलाङ पर्की यान्ही डेम येशू खाटा बिन्ती जाटा। होटै होसकै नुङ्की याहा। 33 होटै पट्ट न दुष्ट आत्माको होसे भर्मीलकीङ ख्योव्हार वाकको भीत्री सुल्हुवा। होटै वाकौ हुल पट्ट न भीर लकीङ कुरुव्हार डीयौ टालाङ थाहार सीया। 34 याङ्च छान्च डाङार वाक आर्छाचको भोक्डीसा। होटै होखुरीक सहर र लाङ्घालाक नुङार पट्ट न कुराको सेटाका। 35 होटै वास्टै भर्मीको ही छान्ननेसा डेयार ङोस्की डेम येशू लेठाङ राहा। होटै होखुरीक येशू लेठाङ रान्हाङ होसे भर्मीलकीङ दुष्ट आत्माको ख्योम्ह सेम्हजा बढीन बील्हार येशूओ मीकु छीनी सज्जन छानार ङुम ङुच डुपा। होसे भर्मीको र इसे डाङार बीर्हीया। 36 होसे घटना डाङ्चकै अरु ङोस्की राछ भर्मीकोलाक दुष्ट आत्मा लक्डीस्च भर्मीकुटजाट्न गेपा डेम सेटाका। 37 होटै गेरासेनसौ खेरेपुङ पट्ट लाङ्घुङ भर्मीकै येशूकी होखुरीकुङ लाङ्घा लकीङ नुङ्की क्योट्नी डेयार बिन्ती जाटा। हीजैडेनाङ होखुरीक सार्है बीर्हीम्या। होटबाटै येशू डुङ्गाङ काल्हार नुङ्की पानाङ, 38 होडीक बेला दुष्ट आत्मा लक्डीसार गेप्च भर्मीये येशूकी बिन्ती जाटा, “हजुर, ङाकी र नाको खाटा आल्न्ही।” टर येशूये होसकी इट डेया, 39 “नाको नाखोलौ इमाङ ल्हेस्नी र परमेश्वरै नाकोकी ही जाट्न याहा, होसे कुरा अरुकोलाक र सेटाक्नी।” होटै होसे भर्मी सहरलाक नुङा र लाहाकी येशूये जाट्न याछ कुरा पट्ट सहराङ सेटाक्चै व्हा। याइरसौ मास्टो मीजा र हीउ जोक्च मास्टो ( मत्ती ९:१८-२६ ; मर्कूस ५:२१-४३ ) 40 होटै येशू ल्हेसार रान्हाङ होला लेच भीडै होसकोकी स्वागट जाटा, हीजैडेनाङ होखुरीक पट्टै होसकोकी लेन्न ङुमन्या। 41 होटै न्हुइङ काट याइरस म्यार्मीनौ भर्मी राहा। होसे चहीँ सभाङुच इमुङ हाकीम लेया। होच्ये येशूकी मेनो इमाङ राम्ह यान्ही डेम बिन्ती जाटा। 42 हीजैडेनाङ आसकुङ काट्जा बार्ह वर्षौ मास्टो मीजा छाम सीकी पामन्या। इसे कुरा सेम येशू नुङ्चै जाट्नाङ वास्टै भर्मीकुङ भीडै होसकोकी ढुस्न न लेया। 43 होसे भीडाङ बार्ह वर्षसम्म य्हु जोकार छाम ङुच काट मास्टो लेया। होसकी सुयेर गेपाक्की माय्होक्नन्या। 44 होसे मास्टोये येशूओ न्हुङलकीङ राहार होसकुङ बढीनौ छेवाङ छुच बीट्टीकै य्हु जोक्की रोकडीसा। 45 होटै येशूये, “ङाकी सुये छुवा?” डेम गीना। सुयेर ङै छुवा डेम माडेया, होटै पत्रुसै डेया, “गुरुज्यु, भर्मीकुङ पट्ट भीडै नाकोकी घेरीम ढुस्न न ले।” 46 टर येशूये डेया, “सुयेर ङाकी छुच न हो, हीजैडेनाङ ङा लकीङ शक्ति ख्योव्हार नुङ्च ङै थाहा डीन्हा।” 47 होटै लाहा आर्च्युम्ह ङुकी माय्होक्च छाना डेम वार्हार होसे मास्टो बीर्हीया होटै बुरुक्चै राहार येशूओ मीहीलाङ खुखुप छाना। होटै होसे मास्टोये होसकोकी हीजै छुवा होटै छुच बीट्टीकै गेप्च कुरा पट्ट भर्मीकुङ म्याहासाङ डेम याहा। 48 होटै येशूये डेया, “ए मास्टो मीजा, नाकुङ विश्वासै नाकोकी गेपाक्ङने, शान्ति खाटा नुङ्नी।” 49 होसको ङाक्चै जाट्नाङ हाकीमौ इम लकीङ काट भर्मी खबर लार राहा होटै याइरसकी इट डेया, “नाकुङ मास्टो मीजा सीम भ्या। अब गुरुकी डुख माय्हानी।” 50 टर येशूये इसे कुरा सेयार याइरसकी डेया, “बीर्हीखी मापर्ले विश्वास मट्टै जाट्नी! नाकुङ मास्टो मीजा गेप्ले।” 51 होटै होसको याइरसौ इमाङ राहा र होसकै पत्रुस, याकुब, युहन्ना र मास्टो जजौ बोइ-मोइ बाहेक अरु सुकीर मेखोल्हा खाटा भीत्री पर्की माय्हा। 52 होला जम्मा छान्च भर्मीको पट्ट न राप्चै, डुख मन्डीम ङुमन्या। होटै होसकै डेया, “माराप्नी! इसे च मासीमे, टर मीमीक मट्टै झुक्नने।” 53 होसकुङ कुरा मापट्डीयार होखुरीक रेटा, हीजैडेनाङ मास्टो जजा सीच न हो डेयार होखुरीकै वार्न्हन्या। 54 टर येशूये होच्यौ मीहुट घोवार आर्घा, “ए नानी, सोनी!” 55 होटै होच्यौ प्राण ल्हेसार राहा, होटै जुरुक्क सोवा, र येशूये मास्टो जजाकी हीर ज्याकी याखी डेया। 56 मेनो मोइ-बोये अचम्म मन्डीया, टर येशूये इसे कुरा सुकीर माडेकी डेम होखुरीककी आदेश याहा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.