लुका 7 - पुर्वीय मगररोमी कप्टानौ विश्वास ( मत्ती ८:५-१३ ) 1 लहे डेकी पर्च पट्ट न कुरा भर्मीकोलाक डेम भ्याच न्हुइङ येशू कफर्नहुमाङ नुङा। 2 होला काट रोमी कप्तानै वास्टै रोच मेनो नोकर छाम सीकी पामन्या। 3 होचे येशूओ बारेयाङ सेया, होटै मेन नोकरकी गेपाक्ङ यान्ही डेकी डेम येशूकी आर्घाकी यहूदिकुङ धर्मगुरुकोलाक बीर्न्हका। 4 होखुरीक येशू लेठाङ राहार इट डेया, “रोमी कप्टानै नाकुङ सहायटा डुप्की सेम्ह छान्ले। 5 हीजैडेनाङ होचे कान यहूदि जातिकोलाक प्रेम जाट्ले, होचे न कानुङ लागी सभाङुच इम खास्न याम्हने।” 6 होटै न्हुइङ येशू होखुरीक खाटा नुङा। होखुरीक कप्तानौ इम खेरेप टान्हाङ कप्टानै लहो लाफाकोलाक येशूकी याङ्च खबर याम्हका, “हजुर, लौ डुख माजाट्नी। नाकोकी ङौ इम भीत्री आल्खी ज्योस्च ङा माले, 7 ङाल्हा र नाकुङ म्याहासाङ राखी योग्यौ माले। टर नाकै बचन मट्टै ङाक्ङ यान्ही, ङौ नोकर गेप्ले। 8 हीजैडेनाङ ङा र बाड्को हाकीमकुङ अधिनाङ ङुमने। ङौ अधिनाङ र सीपाहीको ले। काटकी ‘नुङ्ना’ डेले, होसे नुङ्ले, अर्कोकी ‘रान्हा’ डेले, होसे राखी क्योट्ले। ङौ नोकरकी ‘इसे जाटो’ डेले, अनी होचे जाट्ले।” 9 कप्टानौ याङ्च कुरा सेयार येशू छक्क पर्या। होटै लहो न्हुङ-न्हुङ राछ भर्मीकुङ भीडकी ङोस्चै डेया, “ङै इस्राएलाङ र याङ्च विश्वास माडाङ्ङने।” 10 होसे खबर राक्च भर्मीको इमाङ ल्हेसार रान्हाङ होसे छाच नोकरकी होखुरीकै गेप्न भ्याच डुपा। येशूये बीढुवौ लेन्जा मीजाकी जीवाक्च 11 येशू हीर समय न्हुइङ नाइन डेच सहराङ नुङा। होसकुङ चेलाको र अरु वास्टै भर्मीकुङ भीड होसको न्हुङ-न्हुङ नुङा। 12 येशू सहरौ गालाम खेरेप टाखी पानाङ काट सीच भर्मीकी बुवार मलामीको नुङ्ङ न लेया। होसे सीच भर्मी चहीँ काट बीढुवौ काट्जा लेन्जा मीजा लेया। होसे बीढुवा खाटा मलामी नुङ्चको सहरुङ वास्टै भर्मीको र लेया। 13 प्रभुये बीढुवौ डुख डाङार रोचै डेया, “नाको माराप्नी!” 14 होटै येशू खेरेप नुङार मुर्डा बुच बाकसकी छुवा र मलामीको टोङ्हा। होसकै डेया, “ए रेन्जा भर्मी, ङा नाकोकी डेले, सोनी!” 15 सीच भर्मी सोवार ङुवा होटै ङाक्की ठाला र येशूये होसकी मेनो मोइकी जीम्मा याहा। 16 होला पट्ट भर्मीको बीर्हीया र परमेश्वरौ महीमा जाटा र डेया, “काट जना कर्हाङ्छ अगमवक्ता कानुङ मीघ्याङ डाङ्नने र परमेश्वरै लहो भर्मीकोलाक जीवाक्की डेम राछ हो।” 17 येशूये रेन्जा भर्मीकी जीवाटाक्च खबर पट्ट यहूदिया देशभरी र वार्लाक-पार्लाकुङ ठाँउवाङ फैलडीसा। येशू र बप्तिस्मा याछ युहन्ना ( मत्ती ११:२-१९ ) 18 येशूये जाट्च पट्ट न कुराको युहन्नौ चेलाकै युहन्नाकी सेटाका। 19 होटै आसकै मेखोल्हौ नीस जना चेलाकोलाक आर्घाम प्रभु येशू लेठाङ इट डेम गीन्की बीर्न्हका, “कानै आसा जाट्च मुक्ति याछ राजा नाको न हो की कानै अरुओ न लाम ङोसीङ?” 20 होटै होखुरीक येशू लेठाङ राहार गीना, “‘कानै आसा जाट्च मुक्ति याछ राजा नाको न हो की कानै अरुओ न लाम ङोसीङ?’ इसे कुरा गीन्की बप्तिस्मा याछ युहन्नै कानकी बीर्न्हकाच हो।” 21 होडीक न बेला येशूये वास्टै भर्मीकुङ रोग र दुष्ट आत्मा लक्डीस्च कोलाक गेपाक्ङ न लेया र मीमीक माडाङ्चको र डाङ्च छाना। 22 युहन्नौ चेलाकोलाक येशूये इट डेया, “नाखुरीकै ही-ही डाङ्ने र सेमने, नुङार युहन्नाकी पट्ट न कुरा सेटाक्नी। मीमीक माडाङ्चकै डाङ्ङने, मीकु माक्योस्चको व्हामने, कुष्ठरोगीको गेप्नने, मेन्केप मासेचकै सेमने, सीचको जीवाम सोमने र डुकलाचकै सेछ समाचार सेकी डुप्ने। 23 ङाकी सङ्खा माजाट्च भर्मी साँच्ची न आसीसीट हो!” 24 युहन्नौ चेलाको ल्हेस्च न्हुइङ होला लेच भर्मीकोलाक येशूये युहन्नौ बारेयाङ इट डेया, “नाखुरीक उजाड-ठाँवाङ ही ङोस्की नुङन्या? ही नाम्सुये होक्योचै जाट्च आर्क्यामकी? 25 की सेछ-सेछ बढीन बील्छ भर्मीकोलाक ङोस्की नुङा? सेनी, सेछ-सेछ बढीन बील्छ भर्मीको च राजौ दरबाराङ मोज-मज्जा जाटार ङुले। 26 ङाकी डेनी, नाखुरीक ही ङोस्की नुङन्या? ही अगमवक्ताकी? हो ङा नाखुरीककी डेले, नाखुरीकै अगमवक्ताकी डेनाङ काट कर्हाङ्छकी डाङ्नने। 27 हीजैडेनाङ युहन्नौ बारेयाङ इट डेम रीक्ङने, ‘ङोस्नी, ङा ङौ दूतकी नाकुङ अघी बीर्न्हकाले र आसकै न नाकुङ अघी लाम टयार खास्ले।’ 28 “ङा नाखुरीककी डेले, मास्टो भर्मीलकीङ डीन्छ मध्याङ युहन्ना डेनाङ बाड्को सुर माले। टर परमेश्वरौ राज्याङ पट्ट डेनाङ मार्जा सु ले, होसे न युहन्ना डेनाङ महान छान्ले।” 29 युहन्नौ बारेयाङ याङ्च कुरा सेयार पट्ट भर्मीको र कर सोट्चकै, परमेश्वरौ लाम साँच्ची न ठीक लेसा डेम मन्डीया हीजैडेनाङ होखुरीकै युहन्ना लकीङ बप्तिस्मा लामन्या। 30 टर फरीसीको र व्यवस्थौ धर्मगुरुकै चहीँ युहन्ना लकीङ बप्तिस्मा मालाच बाटै परमेश्वरै होखुरीकुङ लागी खास्च योजनाकी मामन्डीया। 31 येशूये इट डेया, “इसे पुस्तुङ भर्मीकोलाक ही खाटा डाँजडीङ? होखुरीक कुङ्च ले? 32 होखुरीक बजाराङ ङुच मा-मार्जा जजाको ल्याक्च ले। लाहा-लाहा न इट डेचै च्याक्ले, ‘कानै नाखुरीकुङ लागी बाजाको आर्म्हाटा, टर नाखुरीक मास्याहा। कान डुख मन्डीयार राप्नाङ र नाखुरीक मारापा।’ 33 “बप्तिस्मा याछ युहन्ना राहा। आसकै रोटो र माज्या होटै डाखमड्य र मागा। टर नाखुरीकै आसकोकी दुष्ट आत्मा लक्डीस्च भर्मी डेया। 34 भर्मीयो मीजा राहा, होसकै ज्या, गा होटै नाखुरीकै डेया, ‘ङोस्नी, घीचुवा र गाम व्हाच भर्मी, कर सोट्चको र पापीकुङ लाफा’ डेले। 35 बुद्धि ठीक हो डेच कुरा बुद्धि अनुसार व्हाचकै न प्रमाणित जाट्ले।” येशूये पापी मास्टोकी क्षमा याछ 36 येशूकी काट जना फरीसीये इमाङ ज्यामा ज्याकी आर्घा। होटै येशू नुङार फरीसीयो इमाङ ज्यामा ज्याकी ङुवा। 37 होसे सहराङ काट पापीनी मास्टो लेया। येशू फरीसी भर्मीयो इमाङ ज्यामा गामा जाट्की राम्हे टा डेम सेयार होचे सीङ्गमरमरौ सीसीयाङ अट्टर लार होसे इमाङ राहा। 38 होटै येशूओ न्हुङ्लाक मीखुट्या छीनी टोङ्हार, राप्चै होसकुङ मीखुट्या मीराप डीये छीम्हाक्की ठाला, र लहो मीछामै सीट्चै होसकुङ मीखुट्याकी चुम्हा र होसे अट्टर मोल्न्ह याहा। 39 होसे फरीसी भर्मीये याङ्च कुरा डाङार मेनो मीमनाङ इट डेया, “इडीक इसको अगमवक्ता हो डेनाङ च मेखोल्हाकी छुच मास्टो सु हो कुङ्च मास्टो हो डेयार इसकै वार्छ लेया, हीजैडेनाङ इसे च पापीनी हो।” 40 येशूये होसे फरीसीकी डेया, “ए सीमोन, हीर कुरा ङा नाकोकी डेले।” होचे डेया, “गुरुज्यु, डेनी।” 41 “नीस जना भर्मीये काट साहु खाटा रीन लामन्या। काटै बाङा सय चाँडीयो सीक्का र अर्कोये चहीँ पचास चाँडीयो सीक्का। 42 होसे नीसै रीन टेरीकी माय्होक्च बाटै साहुये नीसौ न रीन मीन्हा जाट्न याहा। लु अब डेनी, कुचे चहीँ होसे साहुकी वास्टै प्रेम जाट्ले औँला?” 43 सीमोनै डेया, “ङौ बीचाराङ सुये वास्टै क्षमा डुपा” होटै येशूये डेया, “नाकोये ठीक न बीचार जाटा।” 44 होटै मास्टो पट्टी ल्हेसार येशूये सीमोनकी डेया, “इसे मास्टोकी ङोस्नी! ङा नाकुङ इमाङ राहा, टर नाकै ङाकी मीकु हुर्की डेम डी ढरी माय्हा। टर इचे च ङौ मीकुकी मीराप डीये छीम्हाक्ङ याहा र लहो मीछामै सीटा। 45 नाकै ङाकी चुम्हार स्वागट माजाटा, टर इचे च इला रान्हाङ लकीङ न ङौ मीकुवाङ चुम्न्ह ङुम ङुमे। 46 नाकोये ङौ मीटालुवाङ सीडी र मोल्न्ह माय्हा, टर इचे च ङौ मीकुवाङ अट्टर मोल्न्ह याम्हने। 47 ङा नाकोकी डेले, इच्यो पाप वास्टै लेया टर क्षमा छान्नने। होटबाटै इसे मास्टोये ङाकी वास्टै माया टान्हाका। चेक्जा पाप क्षमा छान्च भर्मीये चहीँ चेक्जा न माया जाट्ले।” 48 होटै येशूये होसे मास्टोकी डेया, “नाकुङ पाप क्षमा छान्नने” 49 होला ज्याकी ङुच भर्मीकै मेखुरीक-मेखुरीक डेकी ठाला, “पाप क्षमा जाट्च इसे सु आले?” 50 येशूये होसे मास्टोकी डेया, “नाकुङ विश्वासै नाकोकी जीवाटाक्ने, शान्ति खाटा नुङ्नी।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.