लुका 5 - पुर्वीय मगरयेशूये पहीलो चेलाको भाक्च ( मत्ती ४:१८-२२ ; मर्कूस १:१६-२० ) 1 कायाक प्रभु येशू गनेसरेतुङ टाल छेवाङ टोङ्ह ङुम्या। वास्टै भर्मीको चहीँ परमेश्वरौ बचन सेकी डेम ढुसा-ढुस जाट्न न लेया। 2 होसे टालौ कीनाराङ येशूये नीस डुङ्गा डाङा, टर जालङाप्चको चहीँ डुङ्गा लकीङ बाहीर ङुवार जालको हुर्न ङुम्या। 3 होसे नीस डुङ्गाङ काट चहीँ सीमोनौ लेया। येशू होसे डुङ्गाङ काल्हा र सीमोनकी कीनार लकीङ चेक पार्लाक आल्खी लैडीया। होटै येशूये डुङ्गाङ ङुम भर्मीकोलाक शिक्षा याखी ठाला। 4 ङाक्ङ भ्याच न्हुइङ येशूये सीमोनकी डेया, “डुङ्गाकी लुप्च डी पट्टी आल्न्ही र डीस्या घोकी लहो जाल ङाप्नी।” 5 टर सीमोनै डेया, “गुरुज्यु, कानै नाबीलाङ लकीङ गोराक सम्म जाल ङापा, टर काट र डीस्या मापर्या। इडीक नाकै डेले डेनाङ ङा काखेप फेरी जाल ङाप्ले।” 6 होटै सीमोनै जाल ङापा र होस न्हुइङ इडीक वास्टै डीस्या पर्या की जाल न च्याखी पा। 7 होटै होखुरीकै अर्को डुङ्गाङ लेच लाफाकोलाक र सघडीकी आर्घा। होसे लाफाकै डुङ्गा लार डीस्या बटुलीकी राहा। नीस डुङ्गाङ न वास्टै डीस्याको न्हेपार डीयाङ ठाखी पा। 8 होटै येशूये याङ्च काम जाट्च डाङार सीमोन पत्रुसै येशूओ मीहीलाङ खुखुप छानार डेया, “ए प्रभु, ङा लकीङ लोस नुङ्की क्योट्नी, हीजैडेनाङ ङा काट पापी भर्मी हो!” 9 वास्टै डीस्या पर्च बाटै सीमोन र मेनो लाफाको र छक्क पर्या। 10 होटै न्हुइङ सीमोन खाटा काम जाट्च जब्दियो मीजाको याकुब, युहन्ना र छक्क पर्या। येशूये सीमोनकी डेया, “माबीर्हीनी! अब लकीङ आलाक भर्मीकोलाक घोले।” 11 होटै होखुरीकै लहो डुङ्गा कोलाक पाखा छ्युका र पट्ट न ठोक डासार येशूकी डुट्की ठाला। येशूये कुष्ठरोगीकी गेपाक्च ( मत्ती ८:१-४ ; मर्कूस १:४०-४५ ) 12 कायाक येशू काट सहराङ लेया। होसे सहराङ कुष्ठरोग लक्डीस्च काट भर्मी लेया। होसे भर्मीये येशूकी डाङार होसकुङ मीहीलाङ खुखुप छान्चै बिन्ती जाट्चै डेया, “ए प्रभु, नाकै मीमन जाटा डेनाङ, ङाकी गेपाक्की य्होक्ले।” 13 येशूये होसे मीटाक मीहुट डार डेया, “ङा मीमन जाट्ले, नाङ गेप्की क्योटो।” होडीक न बेला होसे कुष्ठरोग लक्डीस्च भर्मी गेप्की क्योटा। 14 होटै येशूये होसकी आज्ञा याछै डेया, “इसे कुरा सुकीर मासेटाक्की! टर पुजाहारी लेठाङ नुङार टान्हाको। मोशौ व्यवस्थाङ डेनाङ लेखा न भर्मीकोलाक नाङ गेप्च साक्षीयो लागी भेटी योहो।” 15 होस्नीक लकीङ येशूओ चर्चा झन फैलडीस्चै नुङा। होटै होसकुङ शिक्षा सेकी र लाहा लहो रोग लकीङ गेप्की डेम वास्टै भर्मीको राखी ठाला। 16 टर होसको चहीँ सुर मालेच ठावाङ नुङार प्रार्थना जाट्नन्या। येशूये पक्षाघाती रोगीकी गेपाक्च ( मत्ती ९:१-८ ; मर्कूस २:१-१२ ) 17 कायाक येशूये शिक्षा याम्हन लेनाङ गालील र यहूदियुङ पट्ट न लाङ्घीङ र यरूशलेम लकीङ राछ फरीसीको र धर्मगुरुको होसकुङ खेरेप न ङुम ङुमन्या। परमप्रभुओ गेपाक्च शक्ति होसको खाटा लेया। 18 होटै भर्मीकै काट पछेघाटी रोगीकी खाट खाटा न बुवार राका। होखुरीकै होसकी इम भीत्री येशू लेठाङ आल्खी पा। 19 टर भर्मीकुङ भीड लेचबाटै भीत्री आल्खी माय्होका। होटै होखुरीकै बीरामीकी इमौ छानाङ काल्हाका। होटै छाना च्याटार बीरामीकी खाट खाटा न येशू लेठाङ बीस्टारै झालाका। 20 होसे भर्मीकै याङ्च विश्वास जाट्च डाङार येशूये डेया, “नाकुङ पाप क्षमा छान्नने।” 21 येशूओ इसे कुरा सेयार धर्मगुरु र फरीसीकै मेखुरीक-मेखुरीक इट डेया, “इसोर निन्दा जाट्च इसे सु आले? परमेश्वरै मट्टै पाप क्षमा जाट्की य्होक्ले।” 22 टर येशूये होखुरीकुङ मीमनुङ कुरा वार्हार डेया, “नाखुरीकै मीमनाङ हीजै याङ्च आर्मीट्ने? 23 ‘नाकुङ पाप क्षमा छान्नने’ डेकी की ‘सोवार व्हानी’ डेकी कुसे चहीँ सजीलो ले? 24 टर भर्मीयो मीजाकी संसाराङ पाप क्षमा जाट्की अधिकार ले डेयार नाखुरीकै वार्न्ह डानी।” अनी येशूये होसे पक्षाघातीकी इट डेया, “ङा नाकोकी डेले सोनी लहो खाट सोटार नुङ्नी।” 25 होटै न्हुइङ होसे भर्मी जुरुक सोवार होखुरीकुङ म्याहासाङ न खाट सोटार परमेश्वरौ जय जय डेचै इम लाक व्हा। 26 पट्ट भर्मीको छक्क पर्या र होखुरीकै परमेश्वरौ महीमा जाटा होटै बीर्हीचै डेया, “छीनी कानै अचम्मौ कुरा डाङा!” येशूये लेवीकी आर्घाच ( मत्ती ९:९-१३ ; मर्कूस २:१३-१७ ) 27 येशू होटै नुङ्चै जाट्नाङ कर सोट्च लेवी म्यार्मीन जाट्च भर्मीकुङ कर सोट्च अड्डाङ डुपा र येशूये होसकी डेया, “ङाकी डुटो।” 28 लेवीये इसे कुरा सेच न्हुइङ पट्ट न ठोक डासार येशूकी डुटा। 29 होसे न्हुइङ लेवीये येशूकी मेनो इमाङ ज्यामा-गामा जाट्की डेम आर्घा। होला कर सोट्चको र अरु वास्टै भर्मीको र भोजाङ ङुमन्या। 30 याङ्च डाङार फरीसी र होखुरीकुङ धर्मगुरुकुङ हुड्डाकै गन-गन जाट्चै येशूओ चेलाकोलाक डेया, “नाखुरीक हीजै कर सोट्चको र पापी भर्मीको खाटा ङुवार ज्याले-गाले?” 31 होटै येशूये होखुरीककी डेया, “रोगी कोलाक टी बैड्य चहडीस्ले। मारोगी कोलाक माचहडीस्ले! 32 ङा र धर्मी कोलाक होइन, टर पापीकोलाक पापको डासार परमेश्वर पट्टी ल्हेस्नी डेम आर्घाकी राछ हो।” उपवास बारेयाङ गीन्च ( मत्ती ९:१४-१७ ; मर्कूस २:१८-२२ ) 33 कुडीक भर्मीकै येशूकी डेया, “युहन्नौ चेलाको च वास्टै लेखा उपवास ङुवार प्रार्थना जाट्ले। फरीसीकुङ चेलाकै र होट न जाट्ले टर नाकुङ चेलाकै चहीँ ज्याले गाले।” 34 होटै न्हुइङ येशूये होखुरीककी डेया, “ही ब्याहुला खाटा काठोव्हाङ लेठर जन्टी कोलाक उपवास ङुकी लैडीकी य्होक्ले? 35 टर होसे डीन र राल्हे, ब्याहुला होखुरीक लकीङ भाक्ले। होटै मट्टै होखुरीक उपवास ङुले।” 36 फेरी येशूये काट उदाहरण याछै इट डेया, “सुयेर नयाँ बढीन च्याटार पुरानो बढीनाङ टाल्हो माकाले। इडीक टाल्हो का डेनाङ र नयाँ बढीन र बीगारीस्ले। हीजैडेनाङ पुरानो बढीनाङ नयाँ टाल्हो र माज्योस्ले। 37 कुसे भर्मीये र नयाँ डाखमड्य पुरानो छालौ मसकाङ माकाले, नभा च नयाँ मड्यै मसक च्याट्ले होटै डाखमड्य आय्हाट्ले, मसक र नस्ट छान्ले। 38 नयाँ डाखमड्य चहीँ नयाँ छालौ मसकाङ न डाकी पर्ले। 39 कुसे भर्मीये र पुरानो डाखमड्य गार नयाँ डाखमड्य गाकी मापाले, हीजैडेनाङ होचे डेले, ‘पुरानो डाखमड्य जाप्च छान्ले।’” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.