लुका 20 - पुर्वीय मगरयेशूओ अधिकारौ बारेयाङ गीन्च ( मत्ती २१:२३-२७ ; मर्कूस ११:२७-३३ ) 1 कायाक परमेश्वरौ मन्दिराङ येशूले भर्मीकोलाक शिक्षा याम्हन लेया। होखुरीककी सेछ समाचार सेटाक्न न लेया। होडीक न बेला मुख्य पुजाहारीको, धर्मगुरुको र अगुवाको होसको लेठाङ राहा। 2 होटै होसकोकी इट डेम गीना, “कानकी डेनी, कुसे अधिकारै नाकै इसे काम जाट्नने, नाकोकी इसे अधिकार सुये याहा?” 3 होसकै होखुरीककी याङ्च जबाफ याहा, “ङा र नाखुरीककी काट कुरा गीन्ले, ङाकी डेनी। 4 युहन्नै याछ बप्तिस्मौ अधिकार स्वर्ग लकीङ लेया, की भर्मीलकीङ लेया?” 5 होटै होखुरीक लाहा-लाहा कुरा जाट्की ठाला, “स्वर्ग, लकीङ डेया डेनाङ, ‘नाखुरीकै युहन्नाकी हीजै विश्वास माजाटा ट?’ डेयार होसकै गीन्ले। 6 ‘भर्मीलकीङ’ डेइङ डेनाङ, पट्ट भर्मीकै कानकी ल्हुङै ङाप्ले। हीजैडेनाङ युहन्ना अगमवक्ता हो डेच होखुरीककी पक्का विश्वास ले।” 7 होटबाटै होखुरीकै होसकोकी इट डेया, “खोइ, कान हीर माव्हार्ले।” 8 होटै येशूये होखुरीककी डेया, “होट डेनाङ ङा कुसे अधिकारै इसे काम जाट्ले, ङा र नाखुरीककी माडेले।” अढीया जाट्चको ( मत्ती २१:३३-४६ ; मर्कूस १२:१-१२ ) 9 होटै येशूये भर्मीकोलाक उदाहरण याछै डेया, “काट भर्मीये य्हाङ अङ्गुर रोप्डीया। होचे भर्मीकोलाक अढीया जाट्की याहार मेल्हा चहीँ वास्टै याकौ लागी लोस देशाङ नुङा। 10 अङ्गुर म्हीन्च न्हुइङ होचे काट जना नोकरकी लहो भाग लाकी डेम बीर्न्हका। टर होसे अढीया जाट्च भर्मीकै नोकरकी डुङार हीर मायाम्ह मर्ल्याङ्न ल्हेसाका। 11 फेरी होचे अर्को नोकरकी बीर्न्हका। अढीया जाट्च भर्मीकै होसकी र डुङार बेइजट जाटा। होटै हीर मायाम्ह मर्ल्याङ्न ल्हेसाका। 12 होटै होचे फेरी अर्को नोकरकी र बीर्न्हका। टर होखुरीकै होसकी र घाइट्या खासार लोम्ह याहा।” 13 “होटै अङ्गुर बारीयो मीमुरुङै डेया, ‘अब ङा ही जाटीङ? ङाल्हौ जाक्च मीजाकी न बीर्न्हकाले। ङौ मीजाकी च होखुरीकै आदर आजाटै।’ 14 टर अढीया जाट्च भर्मीकै मीमुरुङौ मीजा राछ लोसीङ न डाङार लाहा-लाहाङ कुरा जाटा, ‘होसे च बारी मालीकौ मीजा हो। कान इसकी साटीङ होटै होच्यौ पट्ट सम्पत्ति कानुङ छान्ले।’ 15 होटै होखुरीकै होसकी र अङ्गुर बारीयो बाहीर आल्हार साटा। अब अङ्गुर बारीयो मीमुरुङै होखुरीककी ही जाट्ले औँला?” 16 “होटै मालीक राहार होसे दुष्ट अढीया जाट्च भर्मीकोलाक साट्ले र लहो य्हा अरुकोलाक जाट्की याल्हे। भर्मीकै इसे कुरा सेयार डेया, ‘याङ्च च सेन्र माछान्ख्यो।’” 17 टर येशूये होखुरीककी ङोसार डेया, “ङोस्नी इसे रीक्च ही होट? ‘होसे ल्हुङ्की इम खास्च कर्मीकै रड्ड जाटा, होसे ल्हुङ न इमौ गारो सोट्च सुर ल्हुङ छाना।’ 18 “होसे ल्हुङ टकी झाल्च पट्ट न भाट्ले। टर होसे ही मीटाक झाल्ले होचे होसकी ढुलोपीठो खास्ले।” कर टेरीच बारेयाङ गीन्च ( मत्ती २२:१५-२२ ; मर्कूस १२:१३-१७ ) 19 होटै धर्मगुरुको र मुख्य पुजाहारीकै इसे उदाहरण मेखुरीकुङ विरोधाङ डेच हो डेम वार्हा होडीक न बेला येशूकी घोकी पा। टर होखुरीक भर्मीको खाटा बीर्हीम्या। 20 होट छान्न होसकोकी सुटुक्कै घोकी होखुरीकै डाउ ङोस्की ठाला। होखुरीकै होसकोकी घोवार रोमी बडा-हाकीमौ मीहुटाङ जीम्मा याखी मीमन जाट्न ङुम्या। इमानदार छान्च ल्हेसार येशूखाटा कुरा खुसार फँसडीङ, डेम होखुरीकै भर्मीकोलाक घुस याहार बीर्न्हका। 21 होटै होसे भर्मीकै नुङार येशूकी गीना, “ए गुरुज्यु, कानकी थाहा ले, नाकै डेच कुरा र पाहाक्च शिक्षा ठीक ले। नाकै सुओर पक्षपात माजाट्ले र परमेश्वरौ सत्यौ लाम टान्हाक्ले। 22 होटबाटै कानकी इसे कुरा डेम यान्ही, ही कानै कैसरकी कर टेरीकी सेम्ह ले की माले?” 23 टर होसकै होखुरीकुङ मासेछ बीचार वार्हार डेया, 24 “ङाकी काट रोमी सीक्का टान्हाक्नी, इला सुओ नक्सा र सुओ म्यार्मीन ले?” होखुरीकै डेया, “कैसरौ ले।” 25 होसकै होखुरीककी डेया, “होट डेनाङ ही कैसरौ हो कैसरकी यान्ही र परमेश्वरौ ही हो परमेश्वरकी यान्ही।” 26 होखुरीकै भर्मीकुङ म्याहासाङ होसकोकी कुसे कुराङ र फँसडीकी माय्होका। होटै अचम्म मन्डीचै माच्याक्ङ ङुवा। पुनरुठानौ बारेयाङ येशूकी गीन्च ( मत्ती २२:२३-३३ ; मर्कूस १२:१८-२७ ) 27 होटै कुडीक सदुकीको चहीँ येशू लेठाङ राहा। भर्मी सीच लकीङ फेरी पुनरुठान माछान्ले डेच होखुरीकुङ कुरा लेया। होखुरीकै होसकोकी गीना, 28 “गुरुज्यु, मोशै कानकी रीक्ङ याछ व्यवस्था लेखा, कुसेर भर्मीयो ब्याहा जाट्च डाजे मीजाको माछान्न न सीया डेनाङ, भाइ चहीँये होच्यौ मास्टोकी ब्याहा जाटार डाजेओ लागी सन्टान खास्न याखी पर्ले। 29 काट समयाङ साट जना डाजे-भाइको लेया, जेठा डाजे चहीँ ब्याहा जाटा टर मीजा माछान्न सीया। 30 होटबाटै माहीलै भौज्यु खाटा ब्याहा जाटा टर होसे र मीजाको माछान्न न सीया। 31 होटै साहीँलै र भौज्यु खाटा ब्याहा जाटा। होटजाट्न न होसे साटै जनै भौज्यु खाटा ब्याहा जाटा टर होखुरीक मीजाको माछान्न सीया। 32 होटै न्हुइङ होसे मास्टो र सीया। 33 होटबाटै सीच लकीङ पुनरुठान छान्नाङ होसे मास्टो होखुरीक साट जना मढ्याङ सुओ मास्टो छान्ने? हीजैडेनाङ होसे साटै जनौ मास्टो छान्नन्या।” 34 होटै येशूये होखुरीककी डेया, “इसे संसाराङ मट्टै भर्मीकै ब्याहा जाट्ले र ब्याहा जाट्न याल्हे। 35 टर सीच लकीङ जीवाम स्वर्गाङ नुङ्की लागी योग्य छान्च भर्मीकै चहीँ ब्याहा जाट्च कुरा न माछान्ले। 36 होखुरीक फेरी मासीले, हीजैडेनाङ होखुरीक स्वर्गदूत ल्याक्च न छान्ले र होखुरीक पुनरुठानौ सन्टान छान्च बाटै परमेश्वरौ सन्टान छान्ले। 37 होटबाटै सीचको जीवाम सोले डेच कुरा मोशै र म्हे ढाम ङुच पोठ्रौ घटनाङ परमप्रभुकी अब्राहामौ परमेश्वर, इसहाकौ परमेश्वर र याकुबौ परमेश्वर डेयार पुकारीमे। 38 होसको सीचकुङ परमेश्वर होइन, टर जीवाचकुङ परमेश्वर हो, हीजैडेनाङ होसकुङ म्याहासाङ पट्ट न जीउँडै ले।” 39 होटै धर्मगुरुको मढ्याङ सु-सुये डेया, “गुरुज्यु, नाकै ठीक न डेया।” 40 होटै होसकोकी फेरी सुयेर हीर गीन्की आट माजाटा। मुक्ति याछ ख्रीष्ट सुओ मीजा हो डेम गीन्च ( मत्ती २२:४१-४६ ; मर्कूस १२:३५-३७ ) 41 होटै येशूये होखुरीककी डेया, “मुक्ति याछ ख्रीष्ट दाउदौ मीजा हो डेम होखुरीकै कुटजाट्न डेले? 42-43 हीजैडेनाङ दाउदै रीक्च भजनाङ मेखोल्है न डेमने, ‘परमप्रभुये ङौ प्रभुकी डेया, ङै नाकुङ शत्रुकोलाक नाकुङ मीखुट्या म्होकी मापार्ठर नाको ङौ डोर मीहुट पट्टी ङुनी।’ 44 “इटजाट्न दाउद मेखोल्है न ख्रीष्टकी प्रभु डेमने डेनाङ, कुटजाट्न होसको दाउदौ मीजा छान्ले?” धर्मगुरुको खाटा होसीयारी छान्नी ( मत्ती २३:१-३६ ; मर्कूस १२:३८-४० ) 45 होटै पट्ट भर्मीकै सेमन लेनाङ येशूये लहो चेलाकोलाक डेया, 46 “धर्मगुरुको लकीङ होसीयार छानार ङुनी। होखुरीक अरुकी टान्हाक्कीयो लागी लो-लोट्च बढीन बील्हार इलाक-आलाक व्हाले। बजाराङ लाहाकी भर्मीकै मान अट जाटै डेम पाम व्हाले र सभा ङुच इमाङ भोज ज्याच ठावाङ बा-बाड्सो भर्मीको ङुच ठावाङ ङुकी मीमन जाट्ले। 47 होखुरीकै बीढुवाकुङ इम-य्हा पट्ट न ठोक स्याट्ले र टान्हाक्कीयो लागी लो-लोट्च प्रार्थना जाट्ले। होटबाटै होखुरीकै न वास्टै दण्ड र डीन्ल्हे।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.