लुका 18 - पुर्वीय मगरबीढुवा र न्यायढीस 1 होटै न्हुइङ येशूये चेलाकोलाक “सढैँ न प्रार्थना जाट्की पर्ले र नीरास छान्की माछान्ने” डेयार बुझडीकी होसकै होखुरीककी काट उखान डेया, 2 “काट सहराङ काट जना न्यायाधीश लेया। होसे परमेश्वर खाटा र माबीर्हीम्या, भर्मीकोलाक र होचे वास्टा माजाट्नन्या। 3 अनी होसे न सहराङ काट जना बीढुवा र लेया। होसे घरी-घरी न्यायाधीश लेठाङ नुङार डेमन्या, ‘ङौ झगडीया र ङौ मीघ्याङ न्याय जाट्न यान्ही।’ 4 कालाप डीन सम्म च होचे बीढुवौ कुरा न मासेया। टर न्हुइङ होचे लहो मीमनाङ डेया, ‘लेकीयो लागी च ङा परमेश्वर खाटा र माबीर्हीले, भर्मीकोलाक र वास्टा माजाट्ले। 5 टर इसे बीढुवै ङाकी सार्है न डुख याछ बाटै ङै इच्यो न्याय जाट्न याखी पर्ले। नभा च इचे एकोहोरो राहार ङाकी कच-कच जाटार काबु पार्ले’।” 6 होटै प्रभुये डेया, “सेनी, होसे मासेछ अधर्मी न्यायाधीशै ही डेमे? 7 होटजाट्न न परमेश्वरै मेखोल्हाकी नाबीक नामसीन पुकारीच, लहे भाक्च भर्मीकोलाक अन्याय लकीङ माजोगडीले र? ही होसकै होखुरीककी साहायटा जाट्की ढीलो जाट्ले र? 8 ङा नाखुरीककी डेले, होसकै छीटो न होखुरीककी न्याय जाट्न याल्हे। टर भर्मीयो मीजा रान्हाङ ही होचे पृथ्वीयाङ विश्वास डुप्ले र?” प्रार्थना जाट्च नीस जना भर्मी 9 होटै येशूये लाहाकी मट्टै भरोसा जाट्चको र लाहाकी मट्टै धर्मी आर्मीटार अरुकी हेला जाट्चकोलाक काट उखान डेया, 10 “फरीसी र कर सोट्च नीस जना भर्मी परमेश्वरौ मन्दिराङ प्रार्थना जाट्की नुङा। 11 होटै फरीसीये टोङ्हार मीमन-मीमनाङ इटजाट्न प्रार्थना जाटा, ‘ए परमेश्वर, ङा नाकोकी धन्यवाद याल्हे। हीजैडेनाङ ङा अरु भर्मी ल्याक्च लोभी र ढुटाहा माले। ङै व्यभिचार र माजाट्नने। ङा इसे कर सोट्च भर्मी ल्याक्च र माले। 12 ङा हप्टाङ नीस खेप उपवास ङुले र ङै कमडीच पट्ट न ठोकौ दशांश र याल्हे।’ 13 टर कर सोट्च भर्मी चहीँ लोस न टोङ्हार स्वर्गलाक ङोस्की आट माजाट्न लहो छाटीयाङ हीड्कडीचै डेया, ‘हे परमेश्वर, ङा ल्याक्च पापी मीटाक दया जाट्न यान्ही!’” 14 होटै येशूये डेया, “ङा नाखुरीककी डेले, होसे फरीसी डेनाङ बरु कर सोट्च भर्मी चहीँ परमेश्वरौ म्याहासाङ धर्मी ठहरीसार लहो इमाङ ल्हेसा। सुये लाहाकी माजा खास्ले, होसे बाड्को छान्ले टर सुये लाहाकी बाड्को खास्ले होसे माजा छान्ले।” येशूये जजाकोलाक आसीस याछ ( मत्ती १९:१३-१५ ; मर्कूस १०:१३-१६ ) 15 होटै वास्टै भर्मीकै लाहा-लहो मीजाकोलाक येशूये अट छुम येहे डेम होसको लेठाङ राका। चेलाकै इसे डाङार होखुरीककी हकारीया। 16 टर येशूये होखुरीककी आर्घार इट डेया, “जजाकोलाक ङा लेठाङ राखी यान्ही, होखुरीककी मारोक्डीनी। हीजैडेनाङ परमेश्वरौ राज्य याङ्चकुङ न हो। 17 साँच्ची न ङा नाखुरीककी डेले, परमेश्वरौ राज्यकी जजाकै लेखा न ग्रहण माजाट्ठर होला सुर पर्की माय्होक्ले।” धनी शासक ( मत्ती १९:१६-३० ; मर्कूस १०:१७-३१ ) 18 काट जना इस्राएली धनी शासकै येशूकी इट डेम गीना, “ए असल गुरु, सेन्र मासीच जीवन डुप्की ङै ही जाट्की पर्ले?” 19 होटै येशूये होसकी डेया, “नाको हीजै ङाकी असल डेले? परमेश्वर बाहेक अरु सुर असल माले। 20 नाकै परमेश्वरौ व्यवस्थाङ लेच आज्ञा च पट्ट न वार्ल्हे। व्यभिचार माजाट्की, भर्मी मासाट्की, माखुस्की, झुटो गबाही माय्हाखी, मोइ-बोइकी आदर जाट्की।” 21 होचे डेया, “इसे पट्ट न आज्ञा च ङै माजा लकीङ न मन्डीचै राछ हो।” 22 याङ्च कुरा सेरखीङ येशूये होसकी डेया, “नाकै अझै काट काम जाट्की बाँकी ले। नाको खाटा लेच पट्ट न ठोक आर्लाम गरीबकोलाक पुङ्ङ यान्ही। नाकुङ स्वर्गाङ धन छान्ले। होटै रान्ही र ङाकी डुट्नी।” 23 टर इसे कुरा सेरखीङ होसे सार्है खीन्न छाना। हीजैडेनाङ होसे अलेख धनी लेया। 24 होटै येशूये होसकी ङोसार डेया, “धन सम्पत्ति लेच भर्मीकोलाक परमेश्वरौ राज्य भीत्री पर्की कुडीक सार्हो लेसा। 25 धनी भर्मीकी परमेश्वरौ राज्याङ पर्की डेनाङ च बरु उँटकी आर्चौ नाथ्रीयाङ केल्खी सजीलो छान्ले!” 26 होटै सेचकै येशूकी इट डेया, “होट डेनाङ सुये मुक्ति डुप्की य्होक्ले ट?” 27 होसकै डेया, “भर्मीये जाट्की माय्होक्च काम, परमेश्वरै जाट्की य्होक्ले।” 28 होटै पत्रुसै डेया, “ङोस्नी, कानै इमको पट्ट न डासार नाकोकी डुट्नने।” 29 येशूये होखुरीककी डेया, “साँच्ची न ङा नाखुरीककी डेले, परमेश्वरौ राज्यौ लागी सुये लहो मोइ-बोइ, डाजे भाइ र मीजाको डास्ले, 30 होचे चाहाँ न होसे डेनाङ वास्टै डुप्ले। होटै स्वर्गाङ सेन्र मासीच जीवन डीन्ल्हे।” येशूये लहो मृत्युओ बारेयाङ जाट्च भविष्यवाणी ( मत्ती २०:१७-१९ ; मर्कूस १०:३२-३४ ) 31 येशूये बार्ह जना चेलाकोलाक काट पट्टी आल्हार डेया, “सेनी, काल्हा यरूशलेम पट्टी नुङ्ङ न ले। अगमवक्ताकै भर्मीयो मीजौ बारेयाङ रीक्च पट्ट न कुराको अब ओल्ल्हे। 32 होसे रोमी भर्मीकुङ मीहुटाङ पर्ले। होटै होसकी गील्ला जाट्ले, बेइजट जाट्ले र मेठोक ठोक्ले। 33 होटै होखुरीकै होसकी कोर्रै ङाप्ले र साट्ले। टर सोमयाकाङ होसे सीच लकीङ फेरी जीवाम सोले।” 34 टर चेलाकै इसे कुराको हीर माबुझडीसा। होखुरीकुङ लागी इसे कुरौ अर्थ आर्च्युक्न्या। होटबाटै इसे कुरा होखुरीकुङ मीमनै आर्मीट्की र माय्होका। मीमीक माडाङ्च भर्मीये डाङ्च ( मत्ती २०:२९-३४ ; मर्कूस १०:४६-५२ ) 35 होटै येशू यरीहो सहर खेरेप टाहा। होला काट जना मीमीक माडाङ्च भर्मी लामौ छेवाङ ङुवार ङेम्ह ङुमन्या। 36 वास्टै भर्मीकुङ भीड होसे न छेवीङ नुङ्चै जाट्च सेयार, “इला ही छान्नन ले?” डेम होचे गीना। 37 भर्मीकै होसकी डेया, “नासरतुङ येशू इटै न नुङ्ङ न ले।” 38 होटै इसे सेयार होसे मीमीक माडाङ्च भर्मीये साफ्फी चीघारीसार डेया, “ए दाउदौ मीजा येशू ङा मीटाक दया जाट्नी!” 39 अगाडी व्हाचकै होसकी माच्याको डेम हकारीया। टर होसे झन बाड्को सोरै चीघारीस्चै डेया, “ए दाउदौ मीजा ङा मीटाक दया जाट्नी!” 40 येशू व्हानाङ-व्हानाङ न टोङ्हा र “होसकी इला राक्नी” डेया। होटै खेरेप रार्हखीङ होसकी येशूये गीना, 41 “नाको ही मीमन जाट्ले? ङा नाकुङ लागी ही जाटीङ?” होचे डेया, “प्रभु, ङा मीमीक डाङ्की य्होकीङ” डेम बिन्ती जाटा। 42 येशूये इट डेया, “नाको डाङ्च छान्की क्योट्नी, नाकुङ विश्वासै नाको गेप्मने।” 43 होटै होडीक न बेला होचे मीमीक डाङार परमेश्वरौ जय-जयकार जाट्चै येशूओ न्हुङ-न्हुङ व्हा। इसे डाङार पट्ट न अरु भर्मीकै र परमेश्वरौ जय-जयकार जाटा। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.