लुका 14 - पुर्वीय मगरयेशूये म्हुङ बाट्चनीक काट भर्मीकी गेपाक्च 1 कायाक येशू म्हुङ बाट्चनीक नीम्टो डुपार फरीसीकुङ काट अगुवौ इमाङ ज्यामा ज्याकी नुङा। होला राछ कुडीक फरीसी भर्मीको चहीँ येशूये हीर मासेछ जाट्ले की डेम चीवा जाट्न न लेया। 2 होला होडीक न बेला मीहुट-मीखुट्या सोक्च काट भर्मी येशूओ मीहासाङ ङुम-ङुम्या। 3 होटै येशूये फरीसीको र धर्मगुरु कोलाक गीना, “ही म्हुङ बाट्चनीक रोगीकी गेपाक्च बारेयाङ व्यावस्थै ही डेमने?” 4 टर होखुरीक हीर माङाक्ङ ङुवा। होटै होसकै होसे रोगीयो जीवाङ मीहुटै छुवार गेपाका र होसे भर्मीकी इमाङ नुङ्की याहा। 5 होटै न्हुइङ येशूये होखुरीककी डेया, “इडीक म्हुङ बाट्च नीक नाखुरीक मढ्याङ सुओर मीजाको वा ङ्हेट-भैसी इनाराङ पर्या डेनाङ नाखुरीकै झ्वाट्टै डोन्की माक्योट्ले र?” 6 होटै होखुरीकै हीर जबाफ याखी माय्होका। 7 होला राछ पाहुनाकै सेछ-सेछ ङुच ठाउँ भाक्च डाङार होसकै काट उदाहरण याछै होखुरीककी डेया, 8 “नाखुरीकै सुओर ब्याहाङ नीम्टो डुपार नुङ्नाङ सेछ ठाउँ भाकार माङुनी। हीजैडेनाङ होला नाखुरीक डेनाङ बा-बाड्सो भर्मीकोलाक र नीम्टो याहार आर्घाकी य्होक्च छान्ले। 9 होटै होखुरीक टार्हारखीङ नीम्टो जाट्च भर्मीये राहार नाकोकी इट डेले, इसकोकी ङुच ठाउँ डास्न यान्ही। होटै नाको चहीँ झाङ ङुकी पर्नाङ साफ्फी काराम सेकी पर्ले। 10 होटबाटै आर्घाच ठावाङ नाको नुङ्नाङ बरु न्हुङ्लाक ङुनी। होटै नाकोकी आर्घाच भर्मीये राहार मान जाट्चै डेले, ‘लौ लाफा, इला ढेनाम सेछ ङुच ठाउँ ले। रान्ही’ डेम मान जाट्चै ङुवाक्ले। 11 हीजैडेनाङ लाहा न बाड्को छान्की पाचको पट्ट न मार्जा छान्ले। होटै लहे लाहाकी मार्जा खास्चको चहीँ बाड्को छान्ले।” 12 होटै येशूये लाहाकी आर्घाच अगुवाकी र इट डेया, “नाकै ज्याकी आर्घानाङ, लहो भर्मीको, डाजेभाइ, कुटुम्ब र खेरेप लेच धनीकोलाक मट्टै माआर्घानी। होइन डेनाङ होखुरीकै नाकोकी र आर्घाम नाकै जाट्च गुन ल्हेट्न याल्हे। 13 बरु नाकै ज्यामा-गामा कास्की आर्घानाङ, गरीब-डुखी, लुला-लङ्गडा र मीमीक माडाङ्च कोलाक आर्घानी। 14 होटै नाकै आसीस डुप्ले। हीजैडेनाङ होखुरीक खाटा हीर मालेचबाटै नाकै जाट्च गुन नाकोकी ल्हेट्की माय्होक्ले। टर धर्मीको फेरी पुनरुठान छान्नाङ नाकै होच्यौ इनाम डुप्ले।” बाड्को भोजौ बारेयाङ उदाहरण ( मत्ती २२:१-१० ) 15 येशू खाटा ज्याकी ङुचको मढ्याङ काट जनै होसकै डेच सेयार डेया, “परमेश्वरौ राज्याङ भोज ज्याकी डीन्छको आसीस डुप्चको हो।” 16 येशूये होसकी इट डेया, “सुर काट जना भर्मीये वास्टै भर्मीकोलाक नीम्टो याहा र बाड्को भोज टयार जाटा। 17 होटै भोज ज्याच बेला छान्च न्हुइङ होच्ये लहो पाहुना कोलाक ‘ज्याच बेला छाना रान्ही’ डेम नोकरकी आर्घाकी बीर्न्हका। 18 टर होसे पट्ट पाहुनाकै काट न खाल्या बाहाना खास्चै सुर राखी मामन्डीया। होटै काटै डेया, ‘ङै च चाम-चाम य्हा लोमे ङोस्की नुङ्की ले, ङाकी माफ जाट्न यान्ही, ङा राखी माय्होक्ले।’ 19 अर्कोये चहीँ डेया, ‘ङै बाङा हल ठोर लोमे, ङा ङोस्की नुङ्की पर्ने ङाकी माफ यान्ही’। 20 फेरी अर्कोये डेया, ‘ङै चाम-चाम मट्टै ब्याहा जाट्नने होटबाटै ङा राखी माय्होक्ले।’ 21 नोकर ल्हेस्न राहार मालीककी पट्ट न कुरा सेटाका। होटै इसे कुरा सेरखीङ इमुङ मालीक साफ्फी मीरीस ख्योछै लहो नोकरकी इट डेया, ‘सहरौ लाम र गल्ली-गल्लीयाङ छीटो नुङ्नी। होटै गरीबकोलाक, मीमीक माडाङ्च कोलाक, लुला-लङ्गडा कोलाक आर्घाम इला राक्नी।’” 22 होटै नोकरै होटन जाटार मालीककी डेया, “हजुर, नाकै डेच लेखा न पट्टकी आर्घाम राका टर अझै ठाउँ खाली न ले।” 23 फेरी मालीकै नोकरकी डेया, “ङौ इम अट न्हेपै डेम सहरौ मुल लामाङ र लाङ्घौ गल्ली-गल्लीयाङ नुङार पट्ट भर्मीकोलाक कर लैडीचै आर्घाम राक्नी।” 24 ङा नाखुरीककी डेले, “पहीला नीम्टो डुप्चकै सुयेर इसे ङौ भोजकी म्याङ्की माडीन्ल्हे।” येशूओ चेलाकै डुःख भोग्डीकी पर्ले ( मत्ती १०:३७-३८ ) 25 कायाक भर्मीकुङ बाड्को हुड्डा येशू खाटा नुङ्ङ न लेया। होटै होसकै होखुरीक पट्टी ल्हेसार डेया, 26 “ङाकी डुट्चकै लहो मोइ-बोइ, जहान, मीजाको, डाजे भाइ, डै-बहीनी पट्ट कोलाक होटै लहे लहो प्राणकी टुच्छ मामन्डीले डेनाङ ङौ चेला छान्की माय्होक्ले। 27 लहो क्रूस बुवार ङौ न्हुङ-न्हुङ माव्हाले डेनाङ होसे र ङौ चेला छान्की माय्होक्ले। 28 “नाखुरीक मढ्याङ सुयेर ढरहरा खास्च मीमन जाटा डेनाङ पैसा ओल्ल्हे की माओल्ल्हे, कुडीक चहडीस्ले डेम पहीला न हीसाब माजाट्ले र? 29 इडीक होचे ढरहरा खास्की जग बाटा र भ्याटाक्की माय्होका डेनाङ डाङ्च भर्मीकै होसकी काराट्चै इट डेले, 30 ‘इसे भर्मीये खास्की च ठाला, टर भ्याटाक्की माय्होका!’ 31 कुसेर राजै अर्को राजा खाटा पुन्खी नुङ्नाङ ‘डस हजार सेना लार बीस हजार सेना लेच खाटा ङै पुन्खी य्होक्ले की माय्होक्ले’ डेयार पहीला न माआरमीट्ले र? 32 पुन्खी माय्होक्ले डेनाङ अर्को राजा लोस लेनाङ न होचे लहो राजदूत कोलाक ही जाटार खाट्की य्होक्ले डेम गीन्की बीर्न्हकाले। 33 होटजाट्न न नाखुरीक मढ्याङ सुये ङौ लागी पट्ट न ठोक डास्की माय्होक्ले डेनाङ होसे ङौ चेला छान्की माय्होक्ले। काम मालग्डीस्च छा ( मत्ती ५:१३ ; मर्कूस ९:५० ) 34 “छा सेछ ठोक हो, टर इच्यो स्वाड व्हा डेनाङ इसकी फेरी हीये सेसाक्की य्होक्ले र? 35 इसे झौ लागी र सेछ माछान्ले होटै मलौ लागी र काम मालक्डीस्ले। होटै भर्मीकै इसकी लोम्ह याल्हे। सु खाटा सेच मेन्केप ले, होचे सेख्यौ।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.