लुका 10 - पुर्वीय मगरयेशू प्रभुये सट्टरी जना चेलाकोलाक बीर्न्हकाच 1 होस न्हुइङ प्रभु येशूये अरु सट्टरी जना चेलाको भाका। होटै लाहा नुङ्की पाच काट-काट सहर र लाङ्घा-लाङ्घाङ लाहा डेनाङ अगाडी होखुरीककी नीस-नीस जना खासार बीर्न्हका। 2 होसकै होखुरीककी डेया, “सोट्की पर्च फसल च वास्टै ले, टर य्हामीको चेक्जा मट्टै ले। फसलौ प्रभुकी य्हामी बीर्न्हकानी डेम प्रार्थना जाट्नी, होटै आसकै लहो फसलाङ य्हामीको बीर्न्हकाख्यो। 3 नाखुरीक नुङ्नी, ङोस्नी ङा नाखुरीककी सीलाकुङ मीघ्याङ भेडौ पाठाकोलाक लेखा न बीर्न्हकाले। 4 नाखुरीकै पैसौ ठैली, नाम्जा, जुत्ता, हीर माबुनी र लामाङ सुकीर माझोर्नी। 5 “नाखुरीक कुसे इमाङ पर्ले पहीला न डेनी, इसे इमाङ शान्ति छान्ख्यो। 6 होला शान्ति प्रिय भर्मी लेसा डेनाङ नाखुरीकुङ शान्ति होसे खाटा ङुले, टर माजाक्च लेसा डेनाङ नाखुरीक लेठाङ न ल्हेस्ले। 7 होखुरीकै याछ ज्यामा गामा ज्यार होसे इमाङ न ङुनी। हीजैडेनाङ य्हामीये लहो ज्याला डुप्की ज्योस्ले टर इम-इम व्हाम माङुनी। 8 “नाखुरीक कुसे सहराङ नुङ्ले, होला होखुरीकै नाखुरीककी मान जाटार ज्याकी याछ ठोक ज्यानी। 9 होला लेच छाच कोलाक गेपाक्नी, र होखुरीककी डेनी, ‘परमेश्वरौ राज्य नाखुरीकुङ खेरेप राम्ह भ्यामने।’ 10 टर नाखुरीक जुन सहराङ नुङ्नाङ होलुङ भर्मीकै नाखुरीककी मामन्डीले डेनाङ लामाङ ख्योव्हार डेनी, 11 ‘कानुङ मीहीलाङ लाछ नाखुरीकुङ सहरुङ झाबुल र कान नाखुरीकुङ विरुद्धाङ खार्हाले। टर नाखुरीकै इसे कुरा वार्न्ही, परमेश्वरौ राज्य खेरेप टार्हामने।’ 12 ङा नाखुरीककी डेले, न्यायौ डीनाङ होसे सहरौ भर्मीकुङ हालट डेनाङ च पापै न्हेप्च सदोम सहरुङ भर्मीकुङ हालट सहडीकी य्होक्च छान्ले। विश्वास माजाट्च सहराङ ङुचकुङ डसा ( मत्ती ११:२०-२७ ; १३:१६-१७ ) 13 “खोराजीन र बेथसेदुङ ए भर्मीको, नाखुरीककी ढीक्कार! नाखुरीकुङ मीघ्याङ जाट्च बाड्को कामको टुरोस र सीदोन सहराङ जाट्च लेनाङ होलुङ भर्मीकै पहीला न भाङ्गरा बील्हार बाडाप मोल्न्ह लाहा-लहो पापको डासार परमेश्वर पट्टी ल्हेस्च लेया। 14 टर न्यायौ डीनाङ नाखुरीकुङ डेनाङ च टुरोस र सीडोनुङ भर्मीकुङ हालट सहडीकी य्होक्च छान्ले। 15 ए कफर्नहुमुङ भर्मीको, ही नाखुरीक स्वर्ग टाहार आदर डुप्ले डेम आर्मीट्ने? नाखुरीक च नरकाङ न टाखी पर्ले।” 16 होटै येशूये डेया, “सुये नाखुरीकुङ कुरा सेले होचे ङौ कुरा र सेले। नाखुरीककी मान माजाट्चकै ङाकी र माजाट्ले र ङाकी मान माजाट्चकै ङाकी बीर्न्हकाचकी र माजाट्ले।” बहटर जना चेलाको ल्हेस्न राछ 17 येशूये बीर्न्हकाच बहट्टर जना चेलाको ल्हेस्न राहा। होटै मार्हाङ्चै डेया, “प्रभु, नाकुङ म्यार्मीनौ शक्तिये दुष्ट आत्माको र कानुङ अधिनाङ राहा।” 18 होटै होसकै होखुरीककी डेया, “ङै शैतानकी स्वर्ग लकीङ पीझ्यानाङ लेखा न झाल्चै जाट्च डाङा! 19 सेनी, ङै नाखुरीककी बुलको र बीच्छीको पीचीच र शत्रुकुङ पट्ट न शक्तिकी जुच अधिकार याम्हे। नाखुरीककी हीये र हानी माजाट्ले। 20 टर दुष्ट आत्माको नाखुरीकुङ अधिनाङ ले डेम मार्हाङ्च होइन। बरु लहो म्यार्मीन स्वर्गाङ रीक्ने डेयार मार्हाङ्नी।” 21 होटै होडीक न बेला येशू पवित्र आत्मा लकीङ न्हेपार मार्हाङ्चै डेया, “हे बोइ, स्वर्ग र पृथ्वीयो परमप्रभु, ङा नाकोकी धन्यवाद याल्हे, हीजैडेनाङ बुद्धि लेचको र वार्छको लकीङ आर्च्युकार डाच कुरा नाकै हीर माव्हार्च कोलाक बुझडीम याहा! हे बोइ, नाकोकी इट जाट्की न सेम्ह सेया।” 22 “ङौ बोये ङाकी पट्ट कुराको जीम्मा याम्हे। बोये बाहेक मीजाकी सुयेर माचीन्डीले। बोइ सु आले डेम मीजै बाहेक सुयेर माचीन्डीले र मीजै बोइकी सु सुकी चीन्डीयाक्ले होसे भर्मीकै बाहेक सुयेर चीन्डीकी माय्होक्ले।” 23 होटै चेलाको पट्टी ल्हेसार येशूये सुटुक्कै डेया, “इसे पट्ट न कुरा डाङ्की डुप्च होखुरीक कुडीक आसीसीट ले। जुन कुरा नाखुरीकै डाङने! 24 ङा नाखुरीककी डेले, वास्टै अगमवक्ताको र राजाकै नाखुरीकै डाङ्च इसे कुराको डाङ्की र सेकी वास्टै मीमन जाटा, टर डाङ्की र सेकी माडुपा।” असल सामरीयौ कठा ( मत्ती २२:३४-४० ; मर्कूस १२:२८-३१ ) 25 कायाक धर्मगुरु राहार येशूओ मीमन खुस्चै होसकोकी डेया, “ए गुरु, ङाकी होडीनी, सेन्र मासीच जीवन डुप्की ङै ही जाट्की पर्ले?” 26 येशूये होसकी डेया, “नाकै व्यवस्थाङ ही रीक्च परेसा?” 27 होचे डेया, “नाकै लहो परमप्रभु परमेश्वरकी पट्ट मीमन, पट्ट प्राण, पट्ट बल, पट्ट बुद्धिये माया जाट्नी र लहो छीमेकी कोलाक लाहाकी लेखा न माया जाट्नी।” 28 येशूये होसकी डेया, “नाकै ठीक न डेया। नाकै र होटन जाट्नी, होटै नाकै सेन्र मासीच जीवन डुप्ले।” 29 टर होसे धर्मगुरुये मेल्हाकी धार्मिक खास्चै डेया, “होट डेनाङ ङौ छीमेकी सु आले ट?” 30 येशूये होसकी काट कठा सेटाक्चै डेया, “काट भर्मी यरूशलेम सहरीङ यरीहोपट्टी नुङ्ङ न लेया। होडीक न बेला खुसकै होसकी घोवार नाङ्ग्या खासा। होटै साफ्फी डुङार सीकी न जीवाकी पार्न डासार व्हा। 31 कालापाङ होसे न लाम छान्चै पुजाहारी होला टार्हा। टर होचे घाइट्याकी माडाङ्नाङ लेखा जाटार टर्कडीसार व्हा। 32 होटै कालापाङ लेवी कुलौ काट भर्मी होसे न लाम छान्चै राहा, टर होचे र हीर माडाङ्नाङ लेखा जाटार टर्कडीसार व्हा। 33 होटजाट्न न होसे न लाम छानार अर्को काट सामरी भर्मी होला टार्हा। होसे घाइट्या भर्मीकी डाङार सामरी भर्मीकी साफ्फी रोम सेया। 34 होटै होच्यौ खेरेप नुङार म्हाङ जैटुनौ सीडी र डाखमड्य कार म्हाकी छ्याक्ङ याहा। होटै होसे भर्मीकी लहो गढा मीटाक काल्हाकार आल्हा। चेक पारी बास ङुच इमाङ टाहाका र होसकी राटभरी सय्हारीया। 35 पीउर्हाक लेखो व्हाच बेलाङ होसे सामरी भर्मीये इमुङ मीमुरुङकी डेया, ‘आसकोकी सेम्ह खाटा ङोस्न यान्ही है, अरु माओल्छ पैसा ङा फेरी ल्हेस्न रान्हाङ याल्हे’ डेयार चाँडीयो नीस सीक्का याहा।” 36 इसे कठा डेम भ्याच न्हुइङ येशूये धर्मगुरुकी गीना, “होसे सोम भर्मीको मढ्याङ सुये चहीँ होसे घाइट्याकी लहो छीमेकीये लेखा सेछ व्यवहार जाटा?” 37 होसे धर्मगुरुये डेया, “होसे घाइट्याकी ङोस्च सामरी भर्मीये” होटै येशूये डेया, “नुङ्नी नाको र होटन जाट्नी।” येशूये मार्ठा र मरीयमकी डुप्च 38 येशू र होसकुङ चेलाको नुङ्चै जाट्नाङ काट लाङ्घाङ टाहा। होला होखुरीककी मार्ठा म्यार्मीन जाट्च मास्टोये इमाङ स्वागट जाटा। 39 मार्ठौ मरीयम डेच काट बहीनी र लेया। होसे चहीँ येशूओ मीकु छेवाङ ङुवार होसकुङ बचन सेम ङुमन्या। 40 मार्ठा चहीँ मेजमान जाट्की डेम ज्यामा, गामा खासा। लहे मट्टै काम जाट्च बाटै होचे येशू लेठाङ राहार डेया, “ए प्रभु, पट्ट न काम ङै न जाट्की पर्या। ङौ बहीनीये ङाकी हीर मासघडीले। ही नाकै माडाङ्ने? होचे र ङाकी सघडीख्यो डेम यान्ही।” 41 येशूये जबाफ याहार डेया, “ए मार्ठा, नाको वास्टै कुराकुङ चीन्टा जाट्ले र ब्याकुल छान्ले। 42 टर चहडीस्च कुरा काट मट्टै ले, होसे न असल कुरा मरीयमै रोजडीमे होटै होसे कुरा होसे लकीङ सुयेर स्याट्की माय्होक्ले।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.